Read chopi Levhi 26 Bible Online

Levhi 26 - chopi bible

Levhi 26

¹ Mi nga ti maheleni sithombe, kambe mi nga ti emiseleni sifananiso so vatwa, mwendo txithombe, hambi kuveka txikombiso txa dirigwi ditikoni kwanu, kasi ku txi khizamela; nguko ani ngani MKOMA, Txizimu txanu.

²Mi na xayisa Masabbata yangu, miva ni txithavo ni nyumba yangu yo sawuleka. Ani ngani MKOMA!

³Ngako mi txi londeta sileleto sangu, mi veketa milayo yangu, ni ku yi maha,

⁴sekoko ni na mi ninga mati a kuwa ngu mbimo ya kona; mafu ma na ninga timbewu ku txi pfuna, mindonga yi na ninga mihando yayingi.

⁵Se kuelula ku na mi hokisa mu ka kuhula, kala ka mbimo ya kuphaya; mi na dya sakudya ngu kuenela, kambe mi na hanya ngu kuzumbiseka amu ditikoni kwanu.

⁶Ni na ninga kudikha ditikoni; se mi na otela mi di tsani, kha ku na mbi va ni wa ku mi dhukisa; kambe ni na fuvisa sihari sa tshofu sa mafu, ni ti to ditikoni kwanu kha ku na mbi maneka ditxhari.

⁷Se mi na tutumisa valala vanu, avale va no dawa ngu matxhari a ditikoni kwanu.

⁸Mtxhanu wa vathu va ka kwanu, va na tutumisa dizana, se 100 da va ka kwanu va na tutumisa 10.000; se valala vanu va na wiswa ngu ditxhari masoni kwanu.

⁹Ni na mi khatalela, ni txi mi maha mi velekela, ni txi mi andisa, kambe ni na tsanisa txitumelelano txangu ni nanu.

¹⁰Mi na dya silo sa mawongwe, asi si ku mu sizendani kwanu, ngu mbimo yayingi, aha mi no si humisa ngu kuthela sa siphya.

¹¹Ni na aka nyumba yangu hagari kwanu, ni moya wangu kha wu na mbi hambana ni nanu.

¹² Ni na va hagari kwanu, ani ni na va Txizimu txanu, nanu mi na va vathu vangu.

¹³Ani ngani MKOMA, Txizimu txanu, ni nga mi humisa ditikoni ka Vaegipta, kasi ku mi si vi tikhumbi tawe; se ni fiunyile makhodha a mrwalo wanu, ni txi mi maha mi tsimbila mi di lulamile.

¹⁴Aniko ngako mi si ni engisi, mi si vekisi sotshe sirumo sangu,

¹⁵ni kungako mi txi eyisa milayo yangu, moya wanu wu txi lamba sileleto sangu, miza mi txi hoka aha ko mbi xayisa mithetho yangu, mi funya txitumelelano txangu,

¹⁶sekoko nani ni na mi maha tiya: Ni na mi tisela kuthava txitimwi kwanu, dikhodho ni txindeyandeya, asile si no mi heta maso ni kuxupha mimoya yanu; mi na phaya walo timbewu tanu, aniko ti na dyiwa ngu valala vanu.

¹⁷Ni na mi tshuralela, kambe mi na xulwa ngu valala vanu; avale va mi vengako va na mi khozisa, se anu mi na tutuma mi txi thava, na mi si tutumiswi.

¹⁸Se ngako mi txi tamarisa mi si ni engisi, ni na mi tsayisa mtxhanu wa sikhati ni simbidi, ngu mhaka ya sionho sanu.

¹⁹Nguko ni na heta kanu ya kutikulisa kwanu, ni maha ti to nzuma yanu yi txi fanana ni simbi, ni mafu anu me fana ni koporo.

²⁰Mi na xakela walo mitamo yanu, nguko mafu anu kha ma na mbi nona me pfunisa silo sanu, ni mindonga ya mu ditikoni kwanu, kha yi na mbi veleka mihando ya yona.

²¹Ngako mi txi hambana ni nani, mi tamarisa mi si ni engisi, ni na engeta ni txi ruma makhombo, ni txi wuyeleteta kambe mtxhanu wa sikhati ni simbidi, kasi ku mi tsayisa, ngu mhaka ya sionho sanu.

²²Ni na leka sihari sa txitinga si dayela vanana vanu, si na heta sifuyo sanu, si mi heta nanu mi sala mi di vadotho, se tinzila tanu ti na maha mapfhela.

²³Ngako mi si tumeli kukhongotelwa ngu ngani, mi tamarisa amu ka kuhambana ni nani,

²⁴nanani ni na hambana ni nanu, ni txi mi tsayisa ngu kuwuyeta kambe mtxhanu wa sikhati ni simbidi, ngu mhaka ya sionho sanu.

²⁵Nguko ni na rumela matxhari txitimwi kwanu, kasi ku ta photela txitumelelano txangu; ka mbimo yile mi no maneka mi di sengeletanile didhoropani kwanu, ni na rumela mtungu hagari kwanu, ni kumaha ti to mi txi ningelwa manzani ka valala vanu.

²⁶Hahanze ka toneto, ni na mi tekela sakudya sanu; ati to digumi da vavasikati va txi mi bhikela sakudya sanu amu ka khadi yimweyo, va txi mi phamela sakudya sanu ngu ku mi pimela; ahale ko mi na dya, aniko kha mi na mbi khura.

²⁷Kukhukhela konako, ngako mi si ni engisi, aniko mi txi tamarisa amu ko hambana ni milayo yangu,

²⁸sekoko, ni na mi wukela ngu kuhenya, ni txi mi tsayisa kambe, ngu kuwuyeleta mtxhanu wa sikhati ni simbidi, ngu mhaka ya sionho sanu.

²⁹Mi na dya nyama ya vanana vanu va vafana, mi txi dya nyama ya vanana vanu vamahorana.

³⁰Ni na haxulela makhalo anu o guleka, ni txi fayetela sithombe sanu sa ditambo, se ni na tshotsha sirumbi sanu txitimwi ka sirumbi sa sithombe sa sizimu sanu; moya wangu wu na karala ngu nganu.

³¹Madhoropa anu ni na ma maha marumbi, ni khundumusela makhalo anu o nyenyeza, na mbiswa ni txi tsakela mafura a miphaxo yanu, o bhumula.

³²Ni na haxulela ditiko danu, kasiku valala vanu, avale va nota zumba ka dona, va txi ta dhuka ve xamala, masoni ka dona. Ni na mi hangalasa hagari ka mifumo.

³³Ni na mi hangalasa amu matikoni, ni txi mi fuvisa ngu matxhari, ditiko danu di na maha txiwula, madhoropa anu ma na maha marumbi.

³⁴Sekoko ditiko di na vekisa Masabbata a dona, mndani ka otshe masiku ale di no va i di txiwula, mbimo yi anu mi no va mi di ditikoni ka valala vanu; se ditiko di na humula di txi vekisa Masabbata a dona.

³⁵Di na humulela mndani ka masiku otshe ale di nga ti haxukile, ati ti nga mbi maheka amule ka masiku anu a Masabbata, ka mbimo yile mi nga ti zumbile ka dona.

³⁶Avale va no huluka hagari kwanu, ni na va tisela dizowa mu timbiluni kwawe; ka mbimo yile mi no va mi di matikoni ka valala vanu, mi na dhuka, ngu kuwa ka dizokoro do oma, mi na thava ku nga mo thava masoni ka ditxhari, mi na wa, mi si tutumiswi ngu m'thu.

³⁷Mi na humbana mmwani a txi wela txitimwi ka mmwani, ku nga mo tutumiswa hambi mi si tutumiswi, kambe kha mi na mbi sikota kuema masoni ka valala vanu.

³⁸Mi na timela-timela hagari ka mifumo, ni ditiko da valala vanu di na mi khadamula.

³⁹Va ka kwanu, avale va no va i di misalela amu ditikoni ka valala vanu, va na nyameka kudotho-kudotho, ngu mhaka ya wuphuta wawe, amu ditikoni ka valala vawe, kambe va na goma ngu mhaka ya wubihi wa vatate vawe.

⁴⁰Sekoko va na ti tshanza ngu wubihi wawe, ni wubihi wa vatate vawe, ni wuhambunyeti wawe, asile va nga ni onhela ngu sona; kambe va na womba ku kha vona, ngu mhaka ya kule va nga ni onhela,

⁴¹nani ni tsimbilete kule navo, kambe ni va mahile ve wulela ka ditko da valala vawe; sekoko ngako timbilu tawe ta wukhutu ti txi hunduluka, va txi tumela ngu wunene txitsayiso ngu wubihi wawe,

⁴² hambi ani ni na alakanya txitumelelano txangu ni Jakobe, ni txitumelelano txangu ni Isaake, ni txitumelelano txangu ni Abrahamu, ni na ti alakanya, kambe ni na alakanya ditiko diya.

⁴³Ditiko di va ngadi thava di txi sala dokha di txi maha txiwula, di na tshumela di mana kuhumulela ka dona, vona vapune va na pandiseka, ngu wubihi wawe, ngu kuva va di nyenyile sileleto sangu, ni kule moya wawe wu nga hambana ni milayo yangu.

⁴⁴Hambi ka toneto, ngako va di payutwe veya maneka ditikoni ka valala vawe, kha ni na mbi va leka, kha ni na mbi va tsukula aha koza ni txi va fuvisa, ni divala txitumelelano txi ni nga txi maha navo, nguko ani ngani MKOMA, Txizimu txawe.

⁴⁵Ngu mhaka ya vona ni na khumbula txitumelelano txangu, atxile ni nga txi maha ni vatate vawe, avale ni nga va humisa ditikoni ka Egipta, masoni ka mifumo yotshe, kasiku ni txi va ni di Txizimu txawe. Ani ngani MKOMA!

⁴⁶Asiya nzileleto ni mithetho ni milayo yi MKOMA a nga yi emisela ngu Mosi, hagari kwakwe ni vanana va ka Israyeli, mmangoni ka Sinayi.