Read chopi Levhi 27 Bible Online

Levhi 27 - chopi bible

Levhi 27

¹MKOMA a to womba kambe ka Mosi a txi khene:

²Gela vanana va ka Israyeli u txi khawe: Ngako m'thu wokari a txi thembisa ngu txixambayo tito, a na maha mningelo ka Txizimu, ngu male yi yi dinganako mtengo wa m'thu:

³Se ngako i di txithembiso txo mahwa ngu m'thu wule a ku ni tanga ya magumi mambidi a malembe, kala tanga ya mtxhanu wa magumi ni dimwedo, a na humisa mtengo wa mtxhanu wa magumi a maxekele a silivhela, madingano ni mpimo wa dixekele da wukhalo wo sawuleka.

⁴Kambe ngako i di wamsikati wa yoneyo tanga, mtengo wa kona wa male wu na va i di wa magumi mararu a maxekele.

⁵Se ngako i di wa tanga ya mtxhanu wa malembe kala magumi mambidi, ku nava i di ka male ya magumi mambidi a maxekele a silivhela, ngako i di mfana, ni male ya digumi da maxekele a silivhela, ngako i di dihorana.

⁶Se ngako i di wa tanga ya mtxima wumwewo, kala tanga ya mtxhanu wa malembe, mtengo wa male wu na va wa mtxhanu wa maxekele a silivhela, ngako i di mfana, ni male ya maxekele mararu a silivhela, i di dihorana.

⁷Se ngako i di wa tanga ya mtxhanu wa magumi ni dimwedo a malembe ni kuya masoni, ku nava ka male ya digumi da maxekele ni mtxhanu, ngako i di wamwamna, i male ya digumi da maxekele, ngako i di wamsikati.

⁸Ngako i di txisiwana ngutu, asi sikoti kumana male ya mtengo wuwa wu nga emiselwa, m'thu wa kona a fanete kuyiswa ka mphaxeli, kasiku mphaxeli a na ya gema mtengo wa male yo dingana ati a ku ka tona wule a nga maha txixambanyo.

⁹Ngako m'thu wokari a di thembisile kumaha mningelo ngu txihari txa sile si fanelako kuningelwa ka MKOMA, txihari txonetxo txi na va i di txo sawuleka.

¹⁰Kha ti koteki kutxitxiswa txihari ngu tximwani txihari, mwendo nja txinene mwendo hi nga txa txinene. Ngako txihari txonetxo txi txi txitxiswa ngu tximwani txihari, sihari soneso ngu wumbidi wa sona si sawulekile.

¹¹Ngako i di txihari txo mbi basa, atxi ti si kotekiko kumaha mningelo ka MKOMA ngu txona, txi fanete kuyiswa ka mphaxeli.

¹²Se mphaxeli a na dinganisa mtengo wa txona, mwendo txi tshurile mwendo kha txa tshura, sekoko va na maha nga tile mphaxeli a no va a di woni tona, kupimisani kwakwe.

¹³Kambe ngako nyamne wa txihari a txi lava ku txi tekisa, a fanete kuengetela mtengo wa wutxhanu, kuleka mtengo wu u wu lavako.

¹⁴Se ngako m'thu wokari a txi sawulekisa nyumba yakwe kasiku yi txi sawuleka ka MKOMA, mphaxeli a na pimisa mazumbelo a nyumba, mwendo njinene mwendo hi nga ya yinene; se nga ti mphaxeli a no ti wonisa tona, ti nava toneto.

¹⁵Ngako m'thu wule a nga maha mningelo ka MKOMA, ngu nyumba yakwe, se a txi navela ku yi tekisa, a fanete kuengetela ngu mtengo wa male wa magumi mambidi maxekele, txitimwi ka male ya mtengo wa yona, se nyumba yoneyo, yi na va i di yakwe kambe.

¹⁶Ngako m'thu a txi maha mningelo ka MKOMA ngu ndima ya thembwe yakwe, ayile i kuthomba yakwe, ku na pimiswa mtengo wa male ngu mazumbelo a thembwe, nga ti yi humisisako tona timbewu ta yona; ngako yi txi humisa mpimo wa homeri ya sevhadha, mtengo wa yona wu na va wa male ya mtxhanu wa magumi maxekele a silivhela.

¹⁷Ngako a di mahile mningelo wa thembwe, kukhukhela ka dilembe da kutsaka ka hombe, mtengo wa kona wa male ngu wonewo yi no va ni fanelo yo tekiswa ngu wona.

¹⁸Aniko ngako a di ningete thembwe yakwe msana ka dilembe da kutsaka ka hombe, mphaxeli a na womba mtengo wa male yo dingana kuhokisa ka dilembe da kutsaka ka hombe, se ku na hungulwa mtengo, ka wule wu nga ti ti laveka.

¹⁹Ngako awule a nga maha mningelo ngu thembwe yakwe, na a txi lava ku yi txhatxhisa, a na engetela didhawa da wutxhanu txitimwi ka male ya mtengo wa thembwe, se thembwe yi na va i di yakwe.

²⁰Ngako thembwe yi si tekiswi, se yi txi xaviswa ka mmwani m'thu, kha ti koteki ti to yi nga tekiswa kambe.

²¹Ngu ka dilembe da kutsaka ka hombe, awule a nga xava thembwe yiya, a na huma ka yona, nguko i thembwe ya mningelo ka MKOMA, se yi na va yi txi lumba mphaxeli.

²²Kambe ngako m'thu wokari a txi maha mningelo ka MKOMA, ngu thembwe yi a nga xava, aniko i si nga thembwe ya thomba yo siwa ngu maxaka akwe,

²³mphaxeli a na womba male yo dinganisa mtengo wa male ya thembwe, na a txi bala malembe, kala kuhokisa dilembe da kutsaka ka hombe, mtengo wonawo, wu na hakelwa ka donedo ditshiku, nguko njimaha txo sawuleka ka MKOMA.

²⁴Ka dilembe da kutsaka ka hombe, thembwe yi na tshumela yi txi lumba awule a nga yi xavisa, nguko thembwe i thomba yakwe.

²⁵Kotshe kudinganisa ku na mahwa ngu maxekele a nyumba ya kusawuleka; dixekele dimwedo di ni magumi mambidi a magera.

²⁶Ni wammweyo m'thu kha na kumaha mningelo wa txixambanyo ngu matiwula a txihari, nguko txona txi lumba MKOMA, ngu mlayo; hambi i di matiwula a homu, mwendo nvuta, mwendo phongo.

²⁷Ngako i di txihari txo mbi sawuleka, ta koteka ku txi tekiswa ngu mtengo wa male yi yi no gemwa, ngu kudinganisa, ku txi engetelwa mtengo wa wutxhanu; se ngako txi si tekiswi, txi na xaviswa ngu mtengo wa male yi yi no gemwa, ha kudinganiswani.

²⁸Ni txihi txo ningelwa txi txi nga ningelwa ka MKOMA, txi sawulekile; mwendo m'thu, mwendo i thembwe ayi i kuthomba yakwe, kha txi na kuxaviswa hambi kutekiswa; sotshe si si nga emiselwa toneto, i thomba yo sawuleka ngutu ya MKOMA.

²⁹Hambi ngako i di m'thu, kha ti koteki ti to e tekiswa; hahanze ko dawa dwe.

³⁰ Sotshe si i ku sa didhawa da wugumi, asi i ku timbewu to elulwa amu tithembweni, mwendo mihando ya mindongani, nza MKOMA, si lumba MKOMA.

³¹Kambe ngako m'thu wokari a txi lava kutekisa sile i ku sakwe sa wugumi, a na si tatisa ngu mpimo wa wutxhanu, ka mtengo wa sona.

³²Aniko sotshe sa wugumi ngu didhawa da tihomu ni tinvuta, ka sotshe sile i ku so dyiswa, sa wugumi sa kona si na lumba MKOMA.

³³Kha kulaveki kuziva sa sinene ni sile i singako sa sinene, hambi ku si txitxisa; aniko ngako si txi dhuka si txitxiswa, sotshe ngu wumbidi wa sona si na va i di so sawuleka; kha si na kuthaviswa.

³⁴Ayiya, milayo yi yi nga mahelwa va ka Israyeli, ayi MKOMA a nga leleta Mosi, mmangoni ka Sinayi.