Read chopi Levhi 4 Bible Online

Levhi 4 - chopi bible

Levhi 4

¹MKOMA a to womba kambe ka Mosi, a txi khene:

²Womba ka vanana va ka Israyeli u txi khawe: Ngako m'thu a txi onha ngu kulunduma, e maha ti ti tsimbwako ngu Mlayo wa MKOMA, e maha ti ti si lavekiko kumahwa;

³ngako i di mphaxeli, a nga maha txionho, e maha txikhuvekiso ka vathu, a na ningela ka MKOMA, kota mhamba yo kuwula txionho, dirole do mbi limala.

⁴A na ningela dirole ka MKOMA e di tisa ha txikeni ka msengeletano, a na sanzeka dianza ha msungo ka dirole, a di wila mkolo, masoni ka MKOMA.

⁵Sekoko mphaxeli wo totwa mafura, a na teka mnoha wa dirole, e wu tisa mu ditendani ka msengeletano;

⁶se mphaxeli a na beta litiho mu ka mnoha, e xwayela ngu wona mtxhanu wa sikhati ni simbidi, masoni ka MKOMA, masoni ka m'jiyo wa wukhalo sawuleka.

⁷Mphaxeli a na totela ngu mnoha titshoka ta txiluvelo, ahawa ku hiselwako kona dibaselo ngu masoni ka MKOMA, mu ka ditenda da msengeletano, se a na thela mnoha wu wu nga sala wa dirole, aha ka txiluvelo, txa miningelo yo hiswa, txi ku ngu ha txikeni ka ditenda da msengeletano.

⁸A na thavisa otshe mafura a dirole di di nga ningelwa kuva mhamba ya kudivalelwa txionho: Mafura otshe ale ma nga pomela masembe a txihari,

⁹titsho tatimbidi ni mafura awa ma nga ti pomela, ni diwomba da txivindi kumweko ni mafura a kona, adi kambe di thaviswako kumweko ni titsho,

¹⁰nga ti ti mahwako ngu homu ya mmningelo wa kuthtutha; se mphaxeli a na si hisa txitimwi ka txiluvelo txa mningelo wo hiswa.

¹¹Kambe didhowo da dirole, nyama yotshe kumweko ni msungo, maswondo, mswanye ni masembe,

¹²eko yotshe nyama ya dirole, yi na humiswa yi yiswa hahanze ka wugovelo, ha wukhaloni ka mhamba yo sawuleka, ahale ka ditala da dikhuma, se kona ha ditalani hale ka dikhuma, yi na ya hiswa hamndilo.

¹³Ngako i di msengeletano wotshe wa ka Israyeli wu nga onha, ngu kulunduma, wu txi maha ti ti tsimbwako ngu Mlayo wa MKOMA, se votshe ve maneka va di onhile,

¹⁴nga ti txionho txi di tumbutwe, sekoko msengeletano wu na ningela dirole ka MKOMA, da kudivalelwa ka txionho, masoni ka ditenda da msengeletano.

¹⁵Se madhota a msengeletano ma na sanzeka manza a ona ha msungo ka txidhunana, masoni ka MKOMA, konaho didhuna di na wilwa mkolo.

¹⁶Sekoko mphaxeli wu a nga totwa mafura a na teka mnoha wa didhuna e wu yisa mu ka ditenda do sawuleka.

¹⁷Se mphaxeli a na nakanisa litiho amu ka mnoha, e xwayela ngu wona mtxhanu wa sikhati ni simbidi masoni ka MKOMA, ni masoni ka m'jiyo.

¹⁸Se ngu wona mnoha wule, a na totela titshoka ta txiluvelo txi txi ku ngu masoni ka MKOMA, ngu mndani ka ditenda da msengeletano. Wumwani mnoha a na wu thela ha txiluveloni ka mhamba yo hiswa, txi ku ngu masoni ka ditenda da msengeletano.

¹⁹Mafura a didhuna a fanete e ma thavisa otshe a txi ma hisa ha txiluveloni;

²⁰se ka didhuna diya, a na maha nga ti va nga mahisa txona ka didhuna da kudihela txionho. Mphaxeli a na maha mhamba yo divalela txionho, se va ka Israyeli va na divalelwa.

²¹Mphaxeli a na ruma ti to didhuna di humiswa hahanze ka wugovelo, se koneyo a na ya di hisa mndiloni, nga ti a nga maha ngu didhuna do khata. Ayiya i mhamba yo mahela txionho txa msengeletano.

²²Ngako i di mthangeli wokari a nga onha ngu kulunduma, a txi maha ti ti tsimbwako ngu Mlayo wa MKOMA Txizimu, a ti mahete mnandu ngu toneto;

²³mwendo txionho txile a nga txi maha, txi txi ziwa, sekoko a tisa mabhongwe wo tekwa hagari ka tiphongo, kasi ku ta maha mphaxo wa kuthavisa txionho.

²⁴Mfumeli wuwa a na sanzeka dianza dakwe ha msungo ka mabhongwe e mu wila mkolo, kona ha wukhaloni hale va mahelako kona mhamba yo hiswa, masoni ka MKOMA. I mhamba yo kuwula txionho.

²⁵Mphaxeli a na teka ngu litiho mnoha wa mabhongwe wu va nga maha ngu ngene mhamba yo kuwula txionho, e tota ngu wona ha ka titshoka ta txiluvelo txa mhamba yo hiswa; sekoko mnoha wu wu nga sala a na wu thela hafuhi ka txonetxo txiluvelo txa mhamba yo hiswa.

²⁶Mafura otshe a txihari a na ma hisa ha txiluveloni, nga ti kumahwako ngu mafura a mphaxo wa ku ti ningela. Mphaxeli a na mahela mfumeliyo mhamba yo divalela txionho, se ngu konaho ene a na divalelwa.

²⁷Se ngako ni wihi m'thu nga kulunduma e onhela Mlayo wa MKOMA, a txi mana mnandu ngu toneto, kufela ku e ziva txionho txi a nga txi maha, a fanete kumaha mphaxo wa txionho txakwe, ngu phongo ya mkati yo mbina wulima.

²⁸Ngako va txi mkomba txionho txi ene a nga txi maha; sekoko na tisa mningelo wa maha mhamba yo kuwula txionho txakwe ngu phongo ya mkati, yo mbi na wulima.

²⁹M'thu eneyo a na sanzeka dianza dakwe ha msungo ka txihari txo ningelwa kasi kudivalelwa sionho, se a txi txi wila mkolo ka wukhalo wa mphaxo.

³⁰Mphaxeli a na beta litiho lakwe mu ka mnoha wa txihari e totela ngu wona titshoka ta txiluvelo txa mhamba yo hiswa, mnoha wu wu salako a fanete ku wu thela hafuhi ka txiluvelo.

³¹ Se a na thavisa otshe mafura, nga ti ti nga rumiswa tona madingano ni mhamba ya mpatano, se a na ma hisa ha txiluveloni, ma txi maha mhamba yo bhumula ka MKOMA. Mphaxeli a na maha mhamba yo divalela, se m'thu eneyo a na divalelwa txionho txakwe.

³²Aniko ngako a txi dhunda kumaha mhamba ngu txinvutana, kasi kudivalelwa txionho, a fanete e maha ngu txinvutana txa makati, txo mbina txibawa.

³³Se a na sanzeka dianza dakwe ha msungo ka txihari e txi wila mkolo, i ku mhamba ya kudivalela txionho, ha wukhaloni hale kudayelwako kona sihari sa timhamba to hiswa.

³⁴Msana keto, Mphaxeli a na beta litiho mu ka mnoha wa txihari e totela titshoka ta txiluvelo txa timhamba to hiswa, sekoko mnoha wu wu nga sala, a na wu thela hafuhi ka txiluvelo.

³⁵Se mphaxeli a thavisa otshe mafura, nga ti a txavisisako tona mafura ka txinvutana txa mhamba ya kudikha, e ma hisa ha mndiloni, txitimwi ka txiluvelo, kasi kudhumisa MKOMA. Ngu toneto, mphaxeli a na maha mhamba yo divalela txionho, txi m'thu a nga maha, se a na divalelwa.