Read chopi Levhi 7 Bible Online

Levhi 7 - chopi bible

Levhi 7

¹Asiya nzileleto sa mhamba yo divalela mnandu; etxo njimaha txo sawuleka ngutu.

²Txihari txi fanete kuwilwa thamo, ha wukhaloni hale kudayelwako kona sihari sa mningelo wo hiswa, ni mnoha wa kona, mphaxeli a na wu xwayela ngu wona ka otshe madhawa a ha txiluveloni.

³A na thavisa ka txiharitxo mafura otshe: Mkila ni mafura aha ka mrumbu,

⁴titsho ta kona ni mafura awa ma ti pomelako, ha dikhondo, diwomba da txivindi ni mafura awa ma txi pomelako, si na thaviswe, kumweko ni txivindi.

⁵Se mphaxeli a na hisa ona mafurayo aha ka txiluvelo, kasi kudhumisa MKOMA. Etxo njimaha txo sawuleka ngutu.

⁶Vavamna votshe hagari ka vaphaxeli ngu vona va ku ni fanelo yo dya nyama ya kona. Va dingana ku yi dyela ha wukhaloni ko sawuleka; nguko i mhamba yo sawuleka ngutu.

⁷Mphaxo wa mhamba ya kudihela mnandu, ni mphaxo wa mhamba ya kudivalela txionho, wa fana mlayo wa kona: Nyama ya kona nja mphaxeli wu a nga maha mhamba yo dihela.

⁸Mphaxeli wule a no maha mhamba ya mningelo wo hiswa, didhowo da txihari txa kona di na va di txi lumba mphaxeli eneyo.

⁹Ngu toneto, mhamba ya sakudya so bhikelwa ha txikho, mwendo mu ka khadi mwendo mu ka dipani, si na va si txi lumba mphaxeli wu a nga maha mningelo.

¹⁰Yimwani miningelo ya miphaxo ya sakudya, ayi yi nga vhuwa ni mtona, ni yi yi nga mbi vhuwa ni mtona, yi na phakelwe ngu kufana ka vanana va Aroni.

¹¹Asiya sileleto nza mhamba yo bonga masoni ka MKOMA, ngu mhaka ya mpatano:

¹²Ngako i di mhamba ya kubonga, ni miphaxo ya kubonga kufanete kuningelwa sibhubhutela so mbi tshumbelwa, so vhuwa ni mtona ni sibhubhutela so mbi tshumbelwa ni sona, aniko so thelwa mtona, hambi ni sibhubhutela so mahwa ngu mpupu wo vhuwa ni mtona.

¹³Hahanze ka toneto, ku fanete kumahwa mningelo wa mapawu o tshumbelwa, kasi kumaha mningelo wa mhamba ya kubonga.

¹⁴Se ka wotshe mningelo, a na ningela tximwetxo txa sona, ku va mningelo wo ndiwitelwa masoni ka MKOMA, wu na lumba mphaxeli wule a nga xwayela mnoha wa mningelo wa kudikha.

¹⁵Nyama ya txihari txi txi nga mahwa mningelo wa mhamba ya mpatano, yi fanete kudyiwa yotshe ka dona ditshikudo da mhamba, ku si sali ni txa txidotho txo ta dyiwa mangwanani ka kona.

¹⁶Se i di mhamba ya txixambanyo ngu txithembiso txokari, mwendo mhamba yo mahwa ngu kuranda ka m'thu dwe, nyama yi na dyiwa ka donedo ditshiku; ayi yi no sala yi nata dyiwa mangwanani ka kona.

¹⁷Ka ditshiku da wuraru, nyama yi yi nga sala ha ka mhamba, yi na vekwa ha txikho yi txi hiswa ngu mndilo.

¹⁸Nguko m'thu a txi dya nyama ya mhamba ya mpatano, ayi yi no sala, ka ditshiku da wuraru, mhamba yoneyo kha yi na mbi amukelwa ngu Txizimu, yi na va i si nga yo vhuna txilo; i nyama yo onheka, ni wule a nga yi dya a na rwala mnandu wa kona.

¹⁹Se nyama yi yi gwesako tximaha txo yila, kha yi na kudyiwa, yi fanete kutshotshwa ha mndiloni yi txi hiswa. Aniko awule a nga lulama wa sikota kudya nyama ya mhamba.

²⁰Kambe ngako m'thu wokari a sa lulama, a txi dya nyama ya mhamba ya mpatano, ayi yi nga mahwa mningelo ka MKOMA, a na tutumiswa ka va ka kwawe.

²¹Ni wule a manekako a di gwesile tximaha txo mbi lulama, mwendo m'thu, mwendo txihari, hambi ni txihi tximaha, mwendo kuva a di dyite nyama ya mhamba ya mpatano, ayi yi mahelwako MKOMA, a na tutumiswa ka va ka kwawe.

²²MKOMA a to gela Mosi a txi khene:

²³Zivisa va ka Israyeli ku khawe: Mi nga dyeni mafura a didhuna, hambi a hamba, mwendo a phongo.

²⁴Mafura a txihari txi txi nga fa mwendo kudawa ngu txihari txa txitinga, nyama ya kona ya sikota kuthumiswa ka timwani timhaka, aniko hambi ku txo txani, yi nga dyiwe.

²⁵Ngako m'thu a txi dya mafura a txihari txi txi nga mahwa mningelo ka MKOMA, a na tutumiswa aha ka msengeletano wa va ka kwawe.

²⁶Hambi ni hani amu mi manekako mi di kona, mi nga dyeni mnoha, hambi wa txihari mwendo txinyana.

²⁷ Awule a tsanako a txi dya mnoha wa lixaka la ni txihi txi txi nga dawa, a na tutumiswa ka va ka kwawe.

²⁸MKOMA a wombile ka Mosi a txi khene:

²⁹Zivisa kambe va ka Israyeli ku khawe: Awule a lavako kumaha mhamba ya mpatano, a fanete ku mahela MKOMA, ngu didhawa di di mlumbako da yoneyo mhamba.

³⁰Ngu manza akwe apune a fanete kumaha mningelo wa si si lumbako MKOMA, i ku mafura ni khana; khana yi fanete kuningelwa ngu ku yi ndiwitela masoni ka MKOMA.

³¹Se mphaxeli a na hisa mafura ha txiluveloni, aniko khana yi na ningelwa ka Aroni ni vanana vakwe.

³²Kambe txiphanga txa txinene txa txihari txi txi mahako mningelo wa mhamba ya mpatano ngu txona, mi fanete ku txi ningela ka mphaxeli txi va i di txiningo txakwe.

³³Mphaxeli i ku mmweyo wa vanana va Aroni, awu a mahako mningelo wa mnoha, ni kuhisa mafura ya mhamba ya mpatano, ngene a fanelako kuningwa txiphanga txa txinene.

³⁴Nguko khana yi ningelwako na ku txi mahwa mhamba yo ndiwitela, ni txiphanga txa txinene, txi txi phawuswako kasi kumaha txyavelo, nzimaha si ani ni nga ti vekela ka totshe ti ti mahwako ngu va ka Israyeli, kasiku ni si ningela ka mphaxeli Aroni ni vanana vakwe. Mthetho wuwa mbwo kala kupinduka, awu va ka Israyeli va ku ni fanelo yo wu xonipha.

³⁵Adiya didhawa nda Aroni ni vanana vakwe, kukhukhela mbimo yi va nga vekwa kuva vaphaxeli va timhamba ka MKOMA.

³⁶Ngu tiya MKOMA a nga leleta ka va ka Israyeli, ti to ve ninga vaphaxeli, kukhukhela ka ditshiku dile va nga totwa ngu dona;[4] awuwa mlayo wa kwa mbi na magwito, ka situkulwana.

³⁷Ayiya mithetho nja timhamba ta mningelo wo hiswa, mningelo wa sakudya, ngu timhamba ta txionho, timhamba ta minandu, ta kutotwa ka vaphaxeli, ni timhamba ta mpatano.

³⁸MKOMA ngene a nga leleta ka Mosi, mmangoni ka Sinayi, ka ditshiku dile a nga khene va ka Israyeli, va na mahe mningelo ka MKOMA, txiwulani ka Sinayi.