Read chopi Levhi 8 Bible Online

Levhi 8 - chopi bible

Levhi 8

¹MKOMA a wombile kambe ka Mosi a txi khene:

²Teka Aroni ni vanana vakwe va txi ya ditendani ka msengeletano, u teka syambalo sa wuphaxeli ni mtona wo tota, ni dirole da mhamba ya kudivalela txionho, tihamba timbidi, ni txirundu txa mapawu o mbi tshumbelwa.

³se dhana wotshe msengeletano, kasi ku wu tshangana ha txikeni ka ditenda da msengeletano.

⁴Mosi koko a to maha madingano ni ti MKOMA a nga mleletisa tona; se msengeletano wu to tshangana ha txikeni ka ditenda da msengeletano

⁵Sekoko Mosi a to khene ka msengelatano: Atiya, ngu ti MKOMA a nga ruma ku ti txi mahwa.

⁶Se Mosi a to kombela ka Aroni ni vanana vakwe taku ve tshuketa hafuhi, aha a nga va ruma va txi samba mmidi ngu mati a mphaxo,

⁷se a to mu ambalisa dibhaji da wuphaxeli, e di sunga ngu libhande,[5] a to mfenengeta ngu dibhaji a txi mu ambalisa ngu txitimwi txyambalo txo lapha, e txi sunga ngu ngoti msana ka kona.

⁸Msana keto, a to muambeka nguwo ya hakhana, e veka ka nguwo ya hakhana Urime ni Tumime;

⁹se a to sanzeka txigoko ha msungo kwakwe, ni ha ka txigoko ngu khoheni kwakwe, e veka limo la nzalama[6] m'bhoti wo sawuleka, nga tile MKOMA a nga rumisa tona ka Mosi.

¹⁰Sekoko, Mosi a to teka mtona wo tola e tota wukhalo wo sawuleka, ni sotshe si si manekako konaho, se sotshe si manekile si di sawulekil.

¹¹Se a to xwayela txiluvelo mtxhanu wa sikhati ni simbidi ngu mtona, e tota ngu wona simaha sotshe, mkamba wa kona ni txikazelo txa kona, kasi ku si sawulekisa.

¹²Msana keto, a to thela mtona ha msungo ka Aroni, e maneka a di katekisilwe masoni ka Txizimu.

¹³Kambe Mosi a to dhana vanana va Aroni kasiku ve tshuketa hafuri; a to va ambeka mabhaji, e va sunga ngu tibhande, a to va ambeka sigoko nga ti Txizimu, txi nga ti leletile ka Mosi.

¹⁴Sekoko Mosi a to ruma kuve tisa txirolyana txa mhamba ya txionho; Aroni ni vanana vakwe va to sanzeka manza awe ha msungo ka txirolyana txa mhamba ya kuthavisa txionho.

¹⁵Se Mosi a to wila thamo ya txirolyana; e nakanisa litiho mu ka mnoha, se e totela ngu wona ka madhawa a txiluvelo, ngu kurendelekisa, kasi kusawulekisa txiluvelo. Mnoha wu wu nga sala, a to wu thela hafuhi ka txiluvelo, e txi sawulekisa, ti to mhamba yo kuwula txionho yi txi mahelwa konaho.

¹⁶Msana keto, Mosi a to hisa ha txiluveloni mafura ma pomelako masembe a homu, diwomba da txivindi, ni titsho timbidi, ni mafura a kona.

¹⁷Aniko dirole ni didhowo da kona, ni mafura a kona, ni mswanye, a to ya si tshotsha sotshe ha mndiloni, hahanze ka wugovelo, nga ti Txizimu txi nga ti leletisile tona ka Mosi.

¹⁸Msana keto, Mosi a to ruma ti to hamba yi tiswa, kasi ku ta maha mningelo wa mhamba yo hiswa; se Aroni ni vanana vakwe, va to sanzeka manza awe ha msungo ka hamba;

¹⁹se Mosi a to yi wila thamo, e xwayela ngu mnoha wa kona ka otshe madhawa a txiluvelo.

²⁰Se a to yi wilela ngu sihango e hisa msungo ha txiluveloni, sihango, ni mafura.

²¹Kambe msana ka kuva a di kuwute masembe ni maswondo, ngu konaho, Mosi a to si hisa ha txiluveloni, kumweko ni nyama yotshe ya hamba. Ayiya i mhamba yo hiswa yo bhumula, mhamba yo dhumisa MKOMA, nga ti MKOMA a nga leletisa tona ka Mosi.

²²Msana keto, Mosi a to ruma ti to kutiswa hamba ya wumbidi ya mhamba yo katekisa mphaxeli, aha Aroni ni vanana vakwe va nga sanzeka manza awe ha msungo ka hamba;

²³se Mosi a to wila thamo ya hamba; mnoha wa kona wa wudotho, a to tota ha tshokani ka nzeve ya txinene ya Aroni ni ka litiho la nyagotwe la mkondoni ka txinene.

²⁴Kambe a to maha ti to vanana va Aroni ve tshuketa hafuhi, aha a nga tota ngu mnoha wa kona wa wudotho tshokani ka tinzeve tawe ta txinene, ka vanyagotwe va manzani ka txinene ni vanyagotwe va mikondoni ka txinene, ka mmweyo ni mmweyo wawe, se ngu mnoha wa kona a to xwayela ngu wona madhawani kotshe ka txiluvelo.

²⁵Se a to teka mafura ni mkila, mafura a masembe, diwomba da txivindi, ni titsho timbidi, ni mafura ale ma ti pomelako, ni txiphanga txa txinene.

²⁶Kambe ngu ka txirundu txa mapawu o mbi tshumbelwa, txi txi nga ti masoni ka MKOMA, a to teka txibhubhutela txo mbi tshumbelwa, ni txibhubhutela txa dipawu da mtona, ni dipawu da kuoma, e si veka txitimwi ka mafura ni txitimwi ka txiphanga txa txinene.

²⁷Se a to veka sotshe manzani ka Aroni ni ka vanana vakwe, kasiku ve maha txikombis txa mhamba, ve ndiwitela masoni ka MKOMA.

²⁸Msana keto, Mosi a to teka ngu manza akwe, a txi si hisa ha txiluveloni, txitimwi ka mningelo wa mhamba yo hiswa. I mhamba yo katekisa ayi yi nga mahelwa kudhumisa MKOMA, yo bhumula, yo tsakisa kunavela kwakwe.

²⁹Se Mosi a to teka khana ya hamba, e maha ngu yona txikombiso txa mhamba, e yi ndiwitela masoni ka MKOMA. Khana ya hamba ayi yi nga mahwa mningelo wo katekiswa yi lumba Mosi, nga ti MKOMA a nga leletisa tona.

³⁰Kambe Mosi a to teka mtona wo tota ngu wona, ni mnoha wu wu nga ti txitimwi ka txiluvelo, xwayela ngu sona Aroni ni syambalo sakwe sa wuphaxeli, kumweko ni vanana vakwe, ni syambalo sawe sa wuphaxeli. Ngu toneto, Mosi a katekisile Aroni ni vanana vakwe, kumweko ni syambalo sa wuphaxeli.

³¹Se Mosi a to khene ka Aroni ni ka vanana vakwe: Bhikani nyama mi di ha txikeni ka ditenda da msengeletano, mi txi yi dyela kona, kumweko ni mapawu ale ma ku txirunduni ka miningelo ya mhamba, nguko Txizimu txi ni leletete, ti to Aroni ni vanana vakwe, ngu vona va ku ni fanelo yo si dya.

³²Asi si salako sa nyama ni mapawu, si fanete si tshotshwa ha mndiloni.

³³Kambe msana ka mtxhanu wa masiku ni mambidi, mi nga humeni ha txikeni ka ditenda da msengeletano; kala ka ditshiku di ku no tatiseka masiku a kusawulekiswa kwanu; nguko ka mtxhanu wa masiku ni mambidi, MKOMA a na mi sawulekisa.

³⁴MKOMA ngene a nga ruma kumaha ati hi nga ti maha konkuwa, kasi ku hi txi mana kudivalelwa sionho.

³⁵Ngu toneto, zumbani ha txikeni ka ditenda da msengeletano, wusiku ni mitshikari, amu ka mtxhanu wa masiku ni mambidi. Mi fanete kuvekisa sileleto siya sa Txizimu, ngako mi si lavi kufa. Sileleto siya ngu sona ni nga gelwa.

³⁶Se Aroni ni vanana vakwe, va vekisile totshe ti MKOMA a nga ti womba ngu txisofu txa Mosi.