Read chopi Jeremiya 10 Bible Online

Jeremiya 10 - chopi bible

Jeremiya 10

¹Engisani mhaka yi a yi wombako ngu MKOMA, anu nyumba ya ka Israyeli.

²MKOMA a khene: Mi nga gondeni mahanyelo a vamatiko, mi nga thavisweni ngu sikombiso sa nzumani, nguko vamatiko va thaviswa ngu sona.

³Vamatiko va kholwa ka sizimu sa walo. Nguko mndonga wu nga wilwa txitingani, kuthumiswa nzanga ya mvati;

⁴mndongewo wu bombiswa ngu silivhela ni nzalama, ni ku wu tsanisa ngu tikhongo ni txibando, kasi wu si ngudangudi.

⁵Sifananiso sa ku nga phande thembweni ka mikhokho, si ema kona aniko kha si wombawombi; sona si lava kupakatwa, nguko kha si sikoti kutsimbila. Mi nga si thaveni, nguko kha si zivi kumaha kubiha, hambi kuva ni mtamo wo maha tinene.

⁶Khangaho a fananako ni nawe, awe MKOMA; u wa hombe, ditina dako ndahombe ngutu.

⁷ Awe Mfumeli wa matiko, i mani asi ku thaviko kani? U fanete kuthavwa, nguko hagari ka totshe titxhari ta vamatiko, ni ka mifumo yawe yotshe, lambi, khangaho wu a fananako ni nawe.

⁸Votshe va bharukile ni kwa mba ziva, gondo ya sifananiso njo tanda.

⁹Silivhela yi nga atetwa yi nehilwe ngu Tarxixi, ni nzalama ya Ufazi; mthumo wa manza a vatshuli; si ambate mkuxe wa nzuma; sotshe siya, mthumo wa titxhari.

¹⁰Aniko MKOMA Txizimu txa ditshuri, Txizimu txi txi hanyako, Mfumeli wa kupindukela; mafu ma dhudhumela kuhenyani kwakwe, matiko kha ma na kuema masoni ka txiviti txakwe.

¹¹Mi na va gelisa tiya, mi txi khanu: Sizimu si si nga mbi maha nzuma ni mafu, si na mwalala ditikoni, ni hahatshi ka nzuma.

¹²MKOMA a mahile mafu ngu mtamo wakwe, e tsanisa ditiko ngu wutxhari wakwe, ngu wuzivi wakwe a nawulutile nzuma.

¹³Ngako a txi guleta dipswi dakwe, mati ma dhinda nzumani, wa maha marefu ma txita ngu magwito ka mafu, a rumela singwalangwanda kumweko ni nzuma, ni kuhumisa diphuho ngu sisangalani kwakwe.

¹⁴Ngako va txi si wona vathu ve ema, va txi kaye, va si zivi txilo, ni vamahi va nzalama ve wiswa tingana ngu sifananiso sawe so vatwa; nguko sifananiso sawe makuhu, kha si nga ni dihika.

¹⁵Sona kha si nyawuli, mithumo ya wulundumisi; ka mbimo ya kutsayisa si na lova.

¹⁶Awu i ku txiningo txa ka Jakobe kha fanani naso; nguko ngene mmahi wa silo sotshe; Israyeli lixaka la thomba yakwe, ditina dakwe MKOMA wa Mabutho a Tiyimbi.

¹⁷Rwala thundu yako, u txi yi humisa ditikoni, awe u nga aka ka m'ti wu nga randelwa.

¹⁸Nguko MKOMA a khene: Ka yiya mbimo ni na tshotsha kule vazumbi va ditikoni, ni na va xanisa veza ve tipfa, va txi kha vona:

¹⁹Dikhombo kwangu! Ni funyekile! Txilonda txangu txa panda. Aniko ni khani: Kha ditshuri ngu dona dikhombo dangu, ni fanete ku di rwala.

²⁰Ditenda dangu di hasamutwe, ni totshe tingoti tangu ti wikile. Vanana vangu va ni pfhukile, kha va ngaho; khangaho a ni gwimbelako ditenda dangu, ni kunawuluta mijiyo yangu.

²¹Nguko vadyisi va bharukile, kha va xota MKOMA; ngukonaho kha va humeleli, sotshe sibala sawe si hangalakile.

²²Wonani taku data dipswi da nduma, dizunga da hombe di tako ngu Wuphemba, ku ta phemberusa madhoropa a ka Judha ma txi maha marumbi, i ku wukhalo wa maxolwa.

²³MKOMA, na tiziva ti to nzila ya m'thu kha yi nga mtamoni kwakwe. Kambe m'thu kha sikoti kululamisa mazambo akwe.

²⁴Awe MKOMA, ni tsayise, aniko ngu lipimo li ni dinganako, na i si nga kuhenya kwako, ti taku u txi ni lovisa.

²⁵Tshakunuta txiviti txako, txitimwi ka vamatiko, ava va si ku ziviko, ni txitimwi ka tixaka ti ti si dhaniko ditina dako; nguko va kakatxute Jakobe; va mkakatxute, va txi mmita, ni m'ti wakwe va wu mahile dirumbi.