Read chopi Jeremiya 15 Bible Online

Jeremiya 15 - chopi bible

Jeremiya 15

¹Sekoko MKOMA a to khene kwangu: “Hambi i ti ku Mosi ni Samuwele vo ta ema masoni kwangu, mbilu yangu nga yi si sikoti kuva kumweko ni vathu vava. Va tutumise masoni kwangu.

²Ngako va txi ku wotisa, va txi kha vona: Eko hi naya hayi kani? U na va xamula, u txi khawe: MKOMA a khene: Ava va nga emiselwa kufa, va na ya kufani; ava va nga emiselwa ditxhari, va na ya ditxharini; ava va nga emiselwa nzala, va na ya nzalani; ni va va nga emiselwa wukarawa, va na ya wukarawani.

³Ni na va rumelela mune wa makhombo, kuwomba MKOMA, ditxhari di na va xasela, timbwa ti na va pfunulela. Sinyana sa nzuma ni sibanda sa txitinga si na va khobweta si txi va lovisa.

⁴ Ni na va maha ve thisa masoni ka mifumo yotshe ya ha mafuni, ngu mhaka ya Manasi, mwana Ezekhiya, mfumeli wa ka Judha, ngu ti a nga ti maha Jerusalema.”

⁵“I mani a no kupfela wusiwana, awe Jerusalema kani? I mani a no kuxanisekela kani? I mani a nota ku wotisa ngu wutomi wako kani?

⁶U ni lekile, kuwomba MKOMA, u tshumelete msana. Ngu konaho, ni nawulutile dianza dangu, ni kulovisa. Ni karate ngu ku kudivalela.

⁷Ni va hehete ngu difoxola sidingeni ka matiko; vaveleki ni va honyote vanana vawe, ni lovisa vathu vangu. Nguko va nga mbi hunduluka tinzilani kwawe.

⁸Tinoni tawe ti engetekelani kupinda mtxhefa wa linene. Ni nehile mlovisi wu a dayako vamame va mazambi ni mitshikari. Ngu txidhukisa ni rumete txitimwi kwawe kuxaniseka ni kuthava.

⁹Awu a nga veleka mtxhanu wa vanana ni vambidi, a hohovate, a fite; ditambo dakwe di pswitikile na kuve i ngadi mitshikari; a rwate tingana ni kujujeka msungo. Ava va nga sala ni na va ningela ka ditxhari masoni ka valala vawe, kuwomba MKOMA!”

¹⁰Dikhombo kwangu, awe mwamwangu! Ngu kutxani u nga ni veleka, ani m'thu wa mazunga ni kuphikiza ka dotshe ditiko kani? Kha ni se txenekisa txilo ngu mhaka ya dibhindu, vathu kha va ni txeneka txilo; hambi keto, votshe va ni ruketete.

¹¹Hambi i di keto, MKOMA a to xamula, a txi khene: Kunene ni na ku tsaniseta ti to u txi humelela, ni na maha ti to mlala wako e kukombela, ngu mbimo ya makhombo ni kuxaniseka.

¹²Ina m'thu a nga sikota kufunya txikete, txikete txa Wuphemba, hambi ni msuku kani?

¹³Ni na ningela thundu yako ni tithomba tako ti taku si txi handwa, na ti sa xavwa, ngu mhaka ya sionho sotshe sako ka dotshe ditiko dako.

¹⁴Ni na kumaha u thumela valala vako ka ditiko di u si di ziviko; nguko mndilo wa kuhenya kwangu wu dhivetwe, awu wu no mi hisa.

¹⁵Awe MKOMA, awe wa tiziva, ni alakanye u ni endela; ni tshunde kupharela ka vaxanisi vangu; timisela ngu ngani, u nga ni dhukise; ziva ti taku ni rukwa ngu mhaka yako.

¹⁶Timhaka tako ni ti mani, ngu tona i nga ti ti kudya kwangu; tona i ti ti litsako ni kuzilimuka ka mbilu yangu, nguko ni dhanwa ngu ditina dako, awe MKOMA, Txizimu txa Mabutho a Tiyimbi.

¹⁷Kha na zumba msengeletanoni ka vatseketseli, ni tsaka kona; ngu mhaka ya dianza dako ni zumbile nokha, nguko u ni mahile ni tala ngu txiviti.

¹⁸Kupandiseka kwangu kusimamisa ngu kutxani kani? Ni txilonda txangu kha txi thumwi, txi lamba kuhola kani? Ina kwangu u na va txisima txo xengisa kani, mwendo mati awa ma phwako kani?

¹⁹Ngu konaho, MKOMA a khene: Ngako u txi tshumelela kwangu ni na ku wuyisa ti taku u txi maha mlondeteli wangu. Ni kungako u txi tisa sa lisima, u leka si so biha, awe u na va txisofu txangu. Vona va na tshumelela kwako, aniko awe khu na mbi tshumelela kwawe.

²⁰Ni na kumaha uva diguma da msuku ka ditiko diya; va na lwa ni nawe, aniko kha va na mbi ku xula; nguko ani ni kumweko ni nawe, kuva ni kuhulukisa, kuwomba MKOMA

²¹Ni na kuhulukisa manzani ka vabihi, ni na kutirula manzani ka vanyatshiku.