Read chopi Jeremiya 16 Bible Online

Jeremiya 16 - chopi bible

Jeremiya 16

¹Se di tile kwangu dipswi da MKOMA, di txi kha dona:

²“U nga dhuke u teka msikati, hambi kuva ni sizambiyana ni sihoranana ka wuwa wukhalo.”

³Nguko MKOMA a khene xungetano ngu vanana va txiwamna ni va txisikati ava va nga velekwa ka wuwa wukhalo, ni xungetano ni vamame vawe ava va nga va veleka, ni xungetano ni vatate va va nga va veleka ka ditiko diya:

⁴Nguko va na fa ngu mafelo o thisa; kha va na mbi dilelwa hambi kutshotshwa; va na nga fenze mafuni. Va na dawa ngu ditxhari ni nzala; sirumbi sawe si na dyiwa ngu sinyana sa nzuma ni sihari sa txitinga.

⁵Nguko MKOMA a khene: U nga wulele nyumbani ka txidilo, u nga tsule navo kusalukani, hambi ku va xanisekela; nguko ni thavisile kuthutha kwangu ka diya ditiko, kuwomba MKOMA, ina, wunene ni wumbilu.

⁶Vahombe ni vanana va na fa ngu wubihi wawe ditikoni muwa, va si tshotshwi; vathu kha va na mbi va dilela, hambi ku ti txhavela ni kuyola misungo.

⁷Kambe kha nga ho a no phamelwa m'baba wa txidilo, kasi ku mmalata ngu mhaka ya kufelwa; kambe kha na mbi hiwa dijingo do mthavelela ngu mhaka ya tate wakwe, mwendo mwamwakwe.

⁸Kambe u nga dhuke u wulela nyumbani ka m'buso, u khalahatsha udya ni kusela kumweko navo.

⁹ Nguko MKOMA wa Mabutho a Tiyimbi, Txizimu txa ka Israyeli, a khene: Wona, ti to ni na malata dipswi da kuzumbiseka, ni dipswi da litsako, dipswi da mteki, ni dipswi da wo tekwa, masoni kwanu, ka awa masiku.

¹⁰Ngako u di va zivisile vava vathu totshe timhaka tiya, va ti kha vona kwako: Ngu kutxani MKOMA a wombako txitimwi kwathu ngu dikhombo diya da hombe kani? Ngu kuhi kubiha kwathu mwendo kuonha ku hi nga onhela ngu kona MKOMA Txizimu txathu, kani?

¹¹Sekoko u na khawe kwawe: “Vatate vanu va ni lekile, kuwomba MKOMA, ve londetela simwani sizimu, ve si thumela ni ku si khozela; va ni lekile, kha va vekisa mlayo wangu.

¹²Kasiko koko anu mi mahile to biha ni kupinda vatate vanu; nguko mmweyo ni mmweyo wanu a ta so mbetete e bangisa mbilu yakwe yo biha, ti taku mi si ni engisi.

¹³Ngu konaho, ni na mi tshotsha hahanze ka diya ditiko, mi txi ya ka ditiko di mi si di ziviko, anu, hambi vatate vanu; mi na ya si thumela kona simwani sizimu wusiku ni mitshikari, nguko na mbi mi pfela wumbilu.”

¹⁴Ngu toneto, mata masiku, kuwomba MKOMA, aha ku no mbiswa kuwombwa taku: Wa Hanya MKOMA, awu a nga humisa vanana va ka Israyeli ngu ditikoni ka Egipta,

¹⁵Aniko va na kha vona: MKOMA a hanyako, awu a nga humisa vanana va ka Israyeli ngu ditikoni ka Wuphemba, ni ka otshe matiko awa a nga ti va tutumisete ka ona. Ni na va wuyisa kambe ditikoni kwawe adi ni nga ninga vatate vawe!

¹⁶“Ni na dhana vakukuti vavangi, kuwomba MKOMA: Va na va ndinda; ni na dhana vaxoti votala, va na va xota mimangoni kotshe, ni ka simangwana, ni ka totshe tiphako ta marigwini.

¹⁷Nguko maso angu ma ti wonetela tinzilani kwawe kotshe; kha va sisala masoni kwangu, ni si onho sawe kha si sisaleki masoni kwangu.

¹⁸Se kukhata ni na va tshumetela kumbidi wubihi wawe ni sionho sawe, nguko va nyenyezisile ditiko dangu ngu sirumbi sa manyala awe, kambe ngu sinyenyeko sawe va tatile thomba yangu.”

¹⁹O MKOMA, dikhokhola dangu, ni mtamo wangu, ni wuthavelo wangu ngu ditshiku da kuxaniseka! Matiko ma nata kwako ngu magwito ka mafu, ma txi ta kha ona: Vatate vathu thomba yawe i ti ti makuhu ni kutikulisa dwe, si nga si vhuni txilo.

²⁰Ina m'thu wa sikota ku ti mahela sizimu, si i singako sizimu kani?

²¹“Ngu konaho ni na va maha ve ziva, ni na va maha ve ziva dianza dangu ni mtamo wangu, kambe va na ziva taku ditina dangu, ngani MKOMA!”