Read chopi Jeremiya 18 Bible Online

Jeremiya 18 - chopi bible

Jeremiya 18

¹Di tile dipswi da MKOMA ka Jeremiya, di txi kha dona:

²“Khukha, kwitima u txi ya nyumbani ka muwumbi, ni na kugela kona timhaka tangu.”

³Ni to kwitima ni txi ya nyumbani ka muwumbi, ni ya mmana a txi thuma mthumo wakwe txitimwi ka ngongwani.

⁴Mbimo yi ku nga fayeka txiya txi a nga ti txi wumbile manzani kwakwe, a to maha tximwani ngu dona dibumbedo, nga tona ti a nga txi ti lavisa tona ene nyamne.

⁵Sekoko dipswi da MKOMA di to ta kwangu, di txi kha dona:

⁶“Anu nyumba ya ka Israyeli, ina ni nga tandeka ku mi mahisa ti a nga mahisa tona muwumbi wuwa kani? Wona ku nga dibumba di di ku manzani ka muwumbi, ngu toneto mi ku ngu tona manzani kwangu, anu va nyumba ya ka Israyeli.”

⁷Ngu mbimo yokari ni nga womba-womba ni wukela mfumo, ti taku ni wu dula ni kukhundumusa ni ku wu lovisa;

⁸aniko ngako ditiko di ni nga womba-womba ngu dona, di txi hunduluka kubihani ka dona, nanani ni na hunduluka ni leka ku di rumelela dikhombo di ni nga ti lavile ku di rumela.

⁹Ngu ka yimwani mbimo yi ni nga womba-womba ngu ditiko dokari ni mfumo, ti taku ni wu aka ni ku wu phaya;

¹⁰se ngako ditikwedo di txi maha kubiha masoni kwangu, di si engisi dipswi dangu, sekoko ni na leka wunene wu ni nga ti xuvile ku va mahela wona.

¹¹Ngu konaho, gela vavamna va ka Judha ni vazumbi va Jerusalema, u txi khawe: MKOMA a khene: “Na mi longisela dikhombo, ni na maha txikungo txo mi wukela. Ngu konaho, hundulukani mmwani ni mmwani nzilani kwakwe ko biha, mi txhukwatisa mahanyelo anu ni simaho sanu.”

¹²Aniko va na xamula, va txi kha vona: “Wa ti karata walo, hi na maha kuranda kwathu athu vanyamne, mmweyo ni mmweyo a na maha ngu kubanga ka mbilu yakwe yo biha.”

¹³Ngu konaho MKOMA a khene: “Wotisani hagari ka matiko mwendo waho a nga ngapfa to nga toneto kani? Wotuma wa Israyeli a mahile mhaka yo thisa ngutu.

¹⁴Ina i hunguva ya Libhanoni yi nga siya mimango ya marigwi a txitinga kani? Mwendo mati o titila ma khulungako ma txita ngu kule ma nga phwa kani?

¹⁵Nguko vathu vangu va ni divate, va hisile dibaso ka sifananiso. Si va humbile tinzilani kwawe, amu ka mapfhela a kale. Kuva ve wekelela ka nzila yo timeta, ya kwa mbi dhodwa.

¹⁶Eko va maha ti to ditiko dawe diva txixamaliso, ni txiruko ngu ha ku si gwitiko. Ti taku ni wuhi a pindako ngu kona e xamala, e zinginisa msungo wakwe.

¹⁷Ku nga diphuho da muhuma-ditambo ni na va hangalasa masoni ka valala vawe; ngu ditshiku da kuloviswa kwawe. Ni na va tshuralela ni si va kombi khohe.”

¹⁸Sekoko va to kha vona: “Ngonani hi ta maha txikungo txo wukela Jeremiya; nguko vaphaxeli kha va na mbi tandeka ku hi ninga m'layo, hambi txhari ku hi ninga wusungukati, hambi vaprofeti ku hi ninga dipswi. Ngonani hi na ya muhika ngu tidimi tathu, hi si khataleli timhaka takwe.”

¹⁹MKOMA, riya nzeve kwangu, u txi pfa mapswi a valala vangu!

²⁰Ina wunene wu nga tshumetelwa ngu wubihi kani? Nguko va kete diphala kasi wu txi wulela muhefemulo wangu. Alakanya ti taku ni emile masoni kwako, kuva ni womba-womba ngu wunene wako ni kutshumetela kule navo kuhenya kwako.

²¹Ngu konaho ningela vanana vawe nzalani, u va henjeleta kudawani ngu ditxhari; vasikati vawe va na felwe ngu vanana, ni kuva tinoni. Vamna vawe va na dawe ngu mtungu, ni mazambi awe ma na dawe ngu ditxhari kulwani.

²²Tihuwa ti na pfale tinyumbani kwawe; ka dona ditshiku di u tisako makhokhokho kwawe ngu txidhukisa. Nguko va kete diphala da hombe da kuniwuleta ka dona ni kuriyela milawu mikondoni kwangu.

²³Aniko, awe MKOMA, wa txi ziva txikungo txawe, txo xota ku ni daya. U nga divalele wubihi wawe, hambi kupfhita txionho txawe masoni kwako. Va na humbwe va txi wa masoni kwako, va mahele eto ngu mbimo ya kuhenya kwako.