Read chopi Jeremiya 19 Bible Online

Jeremiya 19 - chopi bible

Jeremiya 19

¹MKOMA a ti khene: Tsula ka muwumbi u txi ya ti xavela khadi ya dibumba, se u na teka masungukati okari a ditiko ni a vaphaxeli,

²huma u tsula mkovani, ka mwana Hinomi, hafuhi ni Txike txa Sirengele, u txhumayela kheyo timhaka ti ni no kugela.

³U txi khawe: “Engisani dipswi da MKOMA, anu vafumeli va ka Judha, ni nanu vazumbi va Jerusalema; MKOMA wa Mabutho a Tiyimbi, Txizimu txa ka Israyeli, a khene: Wonani, ni na tisa dikhombo ka wuwa wukhalo, edo hambi i txo va mani a no dipfa, tinzeve takwe ti na tingwa.”

⁴Nguko va ni lekile, ve nyenyezisa wukhalo wuwa, nguko va nga hisa dibaselo ka simwani sizimu, eso va nga mba si ziva, vona ni vakokwani vawe ni vafumeli va ka Judha; va tatile wukhalo wuwa ngu mnoha wa va va singako ni mnandu;

⁵va akete Bhahali makhalo o guleka, kuva va txi na hisela kona vanana vawe ngu mndilo kota miphaxo yo hiswa ya Bhahali; ati ni nga mbi va laya, hambi ku va gela, mwendo ku ti alakanya.

⁶Ngu konaho, masiku mata, kuwomba MKOMA, ti taku awuwa wukhalo kha wu na mbi ngadi wu dhanwa ku Tofeti, hambi ku va mkova wa mwana Hinomi, aniko mkova wo daya.

⁷Ka wuwa wukhalo ni na hangalasa makungo a Judha ni a Jerusalema; ni na va maha vewa ngu ditxhari da valala vawe, ngu manza a va va xotako wutomi wawe. Sirumbi sawe si na dyiwa ngu sinyana sa nzuma ni sihari sa txitinga.

⁸Ni na maha didhoropa diya diva txidiwukiso ni txiruko; ni wihi a no pinda ngu kona, a na diwuka aha koza e veta mloti ngu kuxamala, ngu mhaka ya otshe makhombo eyo.

⁹Ni na va maha vedya nyama ya vanana vawe va txiwamna ni va txisikati, mmweyo ni mmweyo a na dya nyama ya dixaka dakwe, ka mbimo ya kurandelwa ni ku kuretwa kwawe, eho va na so mwa tshim ngu valala va va xotako wutomi wawe.

¹⁰Sekoko u na faya khadi masoni ka vathu vale va nga ku bangalata,

¹¹u txi khawe: MKOMA wa Mabutho a Tiyimbi a khene: Ni na phwatisa vava vathu ni diya didhoropa, kufana ni kungako ku txi faywa khadi ya muwumbi, ti si kotekiko kutshumela yi tshanganiselwa kambe. Va na tshotshwa Tofeti, ngu kupwata wukhalo wumwani.

¹²Nguto ni no maha ngu wuwa wukhalo, kuwomba MKOMA, ni ka vaaki va kona; ina didhoropa diya ni na di maha ku nga Tofeti.

¹³Tinyumba ta Jerusalema ni tinyumba ta vafumeli va ka Judha, ti nava ni nzambwa, nga wukhalo wa Tofeti; kumweko ni tinyumba ti di nga hiselwa txitimwi ka tona dibaselo ka dotshe dibutho da nzuma, eho va nga ningela miningelo ya so sela ka simwani sizimu.

¹⁴Sekoko Jeremiya a to wuya ngu Tofeti, eyo MKOMA a nga ti mrumile kuya profeta kona, a to ta ema masoni ka Nyumba ya MKOMA, e gela vathu votshe, a txi khene:

¹⁵A womba tiya MKOMA wa Mabutho a Tiyimbi, Txizimu txa ka Israyeli: Wona taku ni na tisa txitimwi ka diya didhoropa, ni ka sotshe sidhoropana, wotshe wubihi wu ni nga wu womba ngu ku diwukela, nguko va bangisile tithamo tawe, kuva va si engisi timhaka tangu.