Read chopi Jeremiya 26 Bible Online

Jeremiya 26 - chopi bible

Jeremiya 26

¹Makhatoni a kufuma ka Jehoyakimu, mfumeli wa ka Judha, kutile mhaka yiya ngu ka MKOMA, yi txi kha yona:

²Ema ngu mthandani ka Nyumba ya MKOMA, u txi womba-womba ka vathu va miti ya ka Judha, ava va tako kuta khozela Nyumbani ka MKOMA, ka totshe timhaka ti ni nga kuruma kutxhumayela kwawe, u nga siye ni ya yimweyo.

³Mwendo va na engisa, mmweyo ni mmweyo a txi hunduluka ka nzila yakwe yo biha, kasi ni si va neheli dikhombo di ni nga xuva ku va mahela, ngu mhaka ya simaho sawe so biha.

⁴Va gele, u txi khawe: MKOMA a khene: Ngako mi si engisi mi txi tsimbila ngu mlayo wangu, awu ni nga mi ninga,

⁵kuva mi txi na engisa timhaka ta sithumi sangu i ku vaprofeti, ava ni nga va rumela kwanu, i di ngadi mixo, aniko anu kha ma engisa;

⁶ ani ni na maha ti to nyumba yiya yi txi nga Silo, ni didhoropa diya ni na di maha txiruko ka totshe tihunzu ta mafu.

⁷Va to tipfa vaphaxeli, ni vaprofeti, ni votshe vathu, aha Jeremiya a nga txhumayela timhaka tiya Nyumbani ka MKOMA.

⁸Ngako Jeremiya a di gwitile kutxhumayela, totshe ti a nga rumwa ngu MKOMA kuzivisa votshe vathu, vaphaxeli ni vaprofeti ni votshe vathu, va to kha vona: Ngu ditshuri, u na kufa!

⁹Ngu kutxani awe u nga profeta ngu ditina da MKOMA, u txi khawe: Ayiya nyumba yi na nga Silo, adiya didhoropa di na nga dirumbi, ku si nga ni vo zumba kani? Votshe vathu va to tshangana ni Jeremiya Nyumbani ka MKOMA.

¹⁰Se tinduna ta ka Judha, ngako ti di pfite eto, ti to kwela ngu nyumbani ka mfumeli ti txi ya Nyumbani ka MKOMA ti txi ya khalahatsha ngu ha txikeni ka kuphya ka MKOMA.

¹¹Vaphaxeli ni vaprofeti va to gela tinduna ni vathu votshe, va txi kha vona: Awuwa m'thu a fanetwe ngu kufa, nguko a profetile e wukela didhoropa diya, nga ha mi nga tipfa ngu tinzeve tanu.

¹²Jeremiya a to xamula ka totshe tinduna ni ka votshe vathu, a txi khene: MKOMA a ni rumile kuprofeta ngu yiya nyumba ni diya didhoropa, ngu totshe timhaka ti mi nga tipfa.

¹³Ngu konaho, phemberusani koko mahenyelo anu ni simaho sanu, mi txi engisa dipswi da MKOMA, Txizimu txanu, sekoko MKOMA a na hunduluka ka dikhombo di a ngadi womba ngu nganu.

¹⁴Aniko ngu dangu didhawa, ni mtamoni kwanu; mahani ngu ngani ati i ku ta tinene ni kululama masoni kwanu.

¹⁵Zivani dwe ti taku, mi txi ni daya, mi neha mnoha wo mbi na mnandu txitimwi ka wutumbu wanu, ni txitimwi ka didhoropa diya, ni txitimwi ka votshe va zumbako ka dona; nguko MKOMA ngene a nga ni ruma ku ta txhumayela kwanu totshe tiya timhaka.

¹⁶Sekoko tinduna ni vathu votshe va to kha vona ka vaphaxeli ni ka vaprofeti: Awuwa m'thu kha faneli kufa, nguko a txhumayela kwathu ngu ditina da MKOMA, Txizimu txathu.

¹⁷Se ku to khukha vokari va madhota a ditiko, ve womba ka wotshe msengeletano wa vathu, va txi kha vona:

¹⁸ Mika a to profeta, ka masiku a Ezekhiya, mfumeli wa ka Judha, e gela votshe vathu va ka Judha, a txi khene: MKOMA wa Mabutho a Tiyimbi a khene: “Siyoni ku na dimwa nga thembwe. Ni Jerusalema ku na maha mmumbu wa marigwi; ni ku kuguleka ka dithepele ku nava mmango wa txitinga.”

¹⁹Ina Ezekhiya, mfumeli wa ka Judha, ni dotshe ditiko da ka Judha, va mu date kani? Ina kha thava MKOMA, a txi kombela dikato, kuva MKOMA a txi hunduluka ka dikhombo di a nga womba ngu dona kwawe kani? Se athu, kha hi njo mahela wubihi mihefemulo yathu kani?

²⁰A ti ti ho mmwani m'thu wu a nga profeta ngu ditina da MKOMA, i Uriya, mwana Xemaya, wa Kiriyate-Jeyarimi, awu a nga profeta e wukela didhoropa diya ni ditiko diya, ku nga otshe mapswi a Jeremiya.

²¹Ene mfumeli Jehoyakimu, ni tindena takwe totshe, ni totshe tinduna, ngako va di pfite timhaka takwe, mfumeli a to xota ku m'daya. Aha a nga tipfa Uriya, a to thava, e pfodola eya Egipta.

²²Mfumeli Jehoyakimu a to rumela vathu vo londeta Uriya ditikoni ka Egipta, i Elinatani, mwana Akibhori, ni vavamna vokari a nga ti navo.

²³Va to humisa Uriya ditikoni ka Egipta, va txi mu wuyisa ka mfumeli Jehoyakimu, awu a nga ta m'daya ngu ditxhari, e tshotsha txirumbi txa kona diphalani ka vanyamtshanzale.

²⁴Diwoko da Ahikamu, mwana Xafani, di ti ti kumweko ni Jeremiya, ti taku asi ningelwi manzani ka vathu a txi dawa.