Read chopi Jeremiya 32 Bible Online

Jeremiya 32 - chopi bible

Jeremiya 32

¹Ndiye mhaka yi nga ta ka Jeremiya ngu ka MKOMA, ngu dilembe da wugumi da Zedhekiya, mfumeli wa ka Judha, i ti dilembe da digumi ni mtxhanu ni mararu a Nebhukodhonosori.

²(Ka yoneyo mbimo tiyimbi ta mfumeli wa Bhabhilona ti to randela Jerusalema. Mprofeti Jeremiya a ti ti seketwe nyumbani ka vawoneleli va nyumba ya mfumeli wa ka Judha.

³Nguko Zedhekiya, mfumeli wa ka Judha, a ti ti msekete, a txi khene: U profetela txani u txi khawe: MKOMA a khene: Wona taku na ningela didhoropa diya manzani ka mfumeli wa Bhabhilona, se ene a na di teka;

⁴hambi ene Zedhekiya, mfumeli wa ka Judha kha na mbi huluka manzani ka Vakaldheya; kambe a na ningelwa manzani ka mfumeli wa Bhabhilona, kuva a txi womba-womba nayo, ve wonana ngu maso;

⁵a na yisa Zedhekiya aniya Bhabhilona, a na ya zumba kona kala ni txi mu endela, kuwomba MKOMA. Ngako mi txilwa ni Vakaldheya ina kha mi na mbi humelela kani)?

⁶Jeremiya koko, a ti khene: Dipswi da MKOMA di tile kwangu, di txi kha dona:

⁷Wona ti to Hananeli, mwana Salumi, tatanyani wako, a nata kwako, a txi ta khene: Ti xavele thembwe yangu yi ku Anatote, nguko u ni fanelo ku yi tirula u txi yi xava.

⁸Sekoko Hananeli, mwanana wa tatanyani wangu, a tile kwangu amuwa Banzani ka vawoneleli, nga ti MKOMA a nga womba, a txi khene kwangu: Xava thembwe yangu yi ku Anatote, ditikoni ka Bhenjamini, nguko u ni madingano a kudya thomba, ni a ku yi tirula, njiavelo yona thembwe yiya. Sekoko ni to pimisa ti to ndipswi da MKOMA.

⁹Ni to xava thembwe ya Hananeli, mwana tatanyani wangu, ayi yi ku Anatote, ni to mpimela male, ya digumi ni mtxhanu ni mambidi da maxekele a silivhela.

¹⁰Ni to bhala dipapilo da mxavo, ni txi di tsanisa na ni di ni tifakazi; sekoko ni to pima male txikaloni.

¹¹Ni to teka dipapilo da mxavo, adi di nga tsaniswa ngu mthangeli ni mlayo, ni di di nga mba tsaniswa;

¹²ni to henjeleta dipapilo da mxavo ka Bharuke mwana Neriya, mwana Mahaseya, masoni ka Hananeli, mwana tatanyani wangu, ni masoni ka tifakazi ti ti nga sayina dipapilo da mxavo, ni masoni ka votshe Vajudha vava va nga ti khalahatshile dizumboni ka vawoneleli.

¹³Sekoko ni to laya Bharuke masoni kwakwe, ni txi khani:

¹⁴A womba tiya MKOMA wa Mabutho a Tiyimbi, Txizimu txa Israyeli: Teka mapapilo awa, dipapilo di di nga tsaniswa, ni di di nga mbi sekwa, u txi ma beta ka khadi ya dibumba, kuva ma txi na xayiseka masiku o tala.

¹⁵Nguko a womba tiya MKOMA wa Mabutho a Tiyimbi, Txizimu txa ka Israyeli: Mi ngadi mi txi na xava tinyumba, ni tithembwe, ni mipeto, ka diya ditiko.

¹⁶Se msana ka kuva ni di ningete dipapilo da mxavo ka Bharuke, mwana Neriya, ni to kombela ka MKOMA, ni txi khani:

¹⁷O! MKOMA Txizimu! Ngawe u nga maha nzuma ni mafu ngu mtamo wako wa hombe ni diwoko dako di nga nawulutwa; kha ku na txilo txi tandako kwako:

¹⁸Ngawe u nga mahela wumbilu magumi a mazana, u tshumeta wubihi wa vatate tikhanani ka vanana vawe msana kwawe; u wa hombe, Txizimu Nyamitamo, ditina dako u MKOMA wa Mabutho a Tiyimbi.

¹⁹U wa hombe mu ka makungo, u ni mtamo mu ka kumaha, maso ako ma wona otshe mahanyelo a vathu, kasi kuninga ka mmwani ni mmwani madingano ni mahanyelo akwe, ni madingano ni mihando yakwe.

²⁰Awe u mahile sikombiso ni sixamaliso ditikoni ka Egipta, ni txitimwi ka Israyeli, ni hagari ka vamwani vathu kala ni nyamsi kuwa; u ti mahete ditina di u ku nado ka diya ditshiku;

²¹u to humisa vathu vako va Israyeli ngu ditikoni ka Egipta ngu sikombiso ni sixamaliso, ngu dianza da mtamo di nga nawulutwa, ni kuxamalisa ko thisa.

²²U va ningile ditiko di u ngadi xambanya ka vatate vawe ati taku u na va ninga dona, ditiko di di khulungako masi ni wulombe;

²³va tota ve ta di khozisa, aniko kha va engisa dipswi dako, hambi kutsimbila ngu mlayo wako; ni totshe ti u nga ti va layile ku ti maha, kha va ti maha; uza u txi va humisela otshe makhombo awa.

²⁴Hi nga wona maguma! Va tete ku ta wukela didhoropa, kasi ku ta di teka, se didhoropa di ningetwe manzani ka Vakaldheya, va valwako navo ngu ditxhari, ni nzala, ni mtungu; se ati u nga womba ti mahekile, ngu tona ti u ti wonako.

²⁵MKOMA Txizimu, hambi ti di ngeto, u ti nga khawe kwangu. Ti xavele thembwe yiya, uva ni tifakazi, kuve didhoropa di ningetwe manzani ka Vakalddheya.

²⁶Sekoko dipswi di tile ka Jeremiya ngu ka MKOMA, di txi kha dona:

²⁷Ngani MKOMA Txizimu txa vathu votshe; ina txi ho atxi ni nga txi tandako kani?

²⁸Ngu konaho, MKOMA a khene: Wona, ni na ningela diya didhoropa manzani ka Vakaldheya, ni manzani ka Nebhukodhonosori mfumeli wa Bhabhilona, a na di teka.

²⁹Vakaldheya va randelako didhoropa diya, va na wulela ka dona va txi di hisa ngu mndilo, va txi hisa ni tinyumba totshe ati ku hiselwako ka tona mabaselo a Bhahali, ni kuningela miningelo ya kusela ka simwani sizimu, va txi ni henyisa.

³⁰Nguko kukhukhela ha wuphyani kwawe, vanana va ka Israyeli, ni vanana va ka Judha, va mahi va wubihi dwe masoni kwangu, nguko vanana va ka Israyeli va ni henyisile ngu mithumo ya manza awe, kuwomba MKOMA.

³¹Nguko adiya didhoropa di vhilusile kuhenya kwangu ni txiviti txangu kukhukhela ditshikwedo va ngadi aka kala nyamsi kuwa; kuva ni txi na di thavisa masoni kwangu.

³²Ngu mhaka ya wubihi wotshe wa vanana va ka Israyeli ni vanana va ka Judha, awu va nga wu maha kasi ku ni henyisa, vona ni vafumeli vawe, ni vathangeli vawe, ni vaphaxeli vawe, ni vaprofeti, ni vathu va ka Judha ni vaaki va Jerusalema.

³³Va ni tshuralete, kha va ni engisa; hambiko ni nga va gondisa kambe ni kambe, kha va engisa ti taku va kawukwa.

³⁴Aniko va to mahetela manyala awe, nyumbani mu kudhanwako ngu ditina dangu, va txi di nyenyezisa.

³⁵ Bhahali va mu akete makhalo o guleka, mkovani ka mwana Hinomi, ve hisela Moloke vanana vawe, va txiwamna ni va txisikati; eto ni nga mba va ruma tona, hambi kumaneka mapimoni kwangu ti taku, va maha manyala awe, ve maha ti to Judha a txi onha.

³⁶Ngu konaho, konkuwa MKOMA, Txizimu txa Israyeli, a khene koko xungetano ngu didhoropa diya, mi di wombako, mi txi khanu: Di ningetwe manzani ka mfumeli wa Bhabhilona ngu ditxhari, ni nzala, ni mtungu.

³⁷Wonani, ni na mi tshanganisela ngu matikoni kotshe, ayo ni nga va tutumisela ka ona kuhenyani kwangu ni txiviti txangu ni dikhulo da hombe; ni na tshumela ni va wuyisa ka wukhalo wuwa, ni va maha ve zumbiseka.

³⁸Vona va na va vathu vangu, nanani ni nave Txizimu txawe.

³⁹Ni na vaha mbilu yimweyo ni va gondisa nzila yimweyo ya ku ni thava kala kupinduka; va na kateka vona ni vanana vawe msana kwawe.

⁴⁰Ni na maha navo txitumelelano txi si gwitelwiko, ati taku kha ni na mbi va tshuralela, ni si leki ku va katekisa; ni veka txithavo txangu timbiluni kwawe, ti taku va si ngadi ve ni tshuralela.

⁴¹Ni na zilimukiswa ngu vona, ni txi va katekisa, kambe ni na va zimeka ditikoni muwa ngu mbilu yangu yotshe ni muhefemulo wangu wotshe.

⁴²Nguko MKOMA a khene: Ngako ni nga tisa dotshe dikhombo diya da hombe txitimwi ka vathu vava, ngu toneto, ni na tisa txitimwi kwawe, otshe makatekwa awa ni nga va thembisa.

⁴³Ku nga txi na xavwa tithembwe ka diya ditiko, adiya anu mi ku khanu: Njiwula, kha ku na m'ti hambi txihari ka dona, di ningetwe manzani ka Vakaldheya.

⁴⁴Va na xava tithembwe ngu male, ve bhala mapapilo a mxavo, ve ma tsanisa, ve dhana tifakazi, amu ditikoni ka Bhenjamini ni madhawani ka Jerusalema, ni madhoropani ka Judha, ni ka madhoropa a mimangoni, ni madhoropa a tibalani, ni madhoropani ka mswa-ditambo; nguko ni na wuyisa vo ñolwa, kuwomba MKOMA.