Read chopi Jeremiya 35 Bible Online

Jeremiya 35 - chopi bible

Jeremiya 35

¹ Di tile dipswi ka Jeremiya ngu ka MKOMA, ka masiku a Jehoyakimi, mwana Josiya, mfumeli wa ka Judha, di txi kha dona:

²Tsula ka nyumba ya va ka Rekabhi, u txi ya womba-womba, u va heleketa Nyumbani ka MKOMA, ka wumwewo wa makhalo, u txi ya va ninga vhinya ve sela.

³Sekoko ni to teka Jazaniya, mwana Jeremiya, mwana Habhaziniya, ni vanawe ni vanana vakwe votshe ni yotshe nyumba ya ka Rekabhi,

⁴ni to va tsulisa Nyumbani ka MKOMA, ka wukhalo wa vanana va Hanani, mwana Igdhaliya, i ku m'thu wa Txizimu, awule wu nga ti gwatamile ni wukhalo wa vathangeli, wu ku txitimwi ka wukhalo wa Mahaseya mwana Salumi, muwoneleti wa txike.

⁵Ni to veka tifukwana to tala ngu vhinya masoni ka vanana va nyumba ya ka Rekabhi, ni magombe, ni txi khani kwawe: Selani vhinya.

⁶Aniko va to xamula va txi kha vona: Kha hi na mbi sela vhinya, nguko Jonadhabhe, mwana Rekabhi, tate wathu, a hi layile a txi khene: Mi nga dhuki mi sela vhinya, anu ni vanana vanu.

⁷Mi nga dhuki mi aka tinyumba, mi nga phayeni timbewu, mi nga phayeni mivhina, hambi ku va naso; aniko mi na zumba matendani, masiku anu otshe, kasi mi txi na hanya masiku o tala, ka ditiko di mi luvelako ka dona.

⁸Hi engisile dipswi da Jonadhabhe, tate wathu ka totshe ti a nga hi laya ka tona; ti taku hi si seli vhinya ni ditshiku dimwedo, athu ni vasikati vathu, ni vanana vathu va txiwamna ni va txisikati;

⁹hambi ni kuaka tinyumba kuva hi zumba ka tona; kambe kha hi na txivhina mwendo thembwe, hambi ni mbewu.

¹⁰Aniko hi zumbile matendani, hi engisa ni kumaha totshe eto Jonadhabhe, tate wathu, a nga hi laya tona.

¹¹Ku to maheka taku, mbimo yile Nebhukodhonosori, mfumeli wa Bhabhilona, a nga ta ka ditiko diya, hi ti khathu: Ngonani, hiya Jerusalema, hi thava yimbi ya Vakaldheya, ni yimbi ya Vasiriya; ngukonaho hi na ya zumba Jerusalema.

¹²Sekoko dipswi da MKOMA di tile ka Jeremiya di txi ta kha dona:

¹³MKOMA wa Mabutho a Tiyimbi, Txizimu txa ka Israyeli, a khene: Tsula u txi ya va gela vathu va va ka Judha, ni vaaki va Jerusalema, u txi khawe: Ina kha mi na mbiswa mi amukela gondo ngu kupfa timhaka tangu kani? Kuwomba MKOMA.

¹⁴Timhaka ta Jonadhabhe, mwana Rekabhi, ati a nga laya vanana vakwe ti to va si seli vhinya, va ti xayisile; kha va sela kala ni nyamsi kuwa; nguko va engisile mlayo wa tate wawe; ani koko nitako ni txi womba kwanu, ni phindula ni mi gela, aniko anu, kha ma ni engisa.

¹⁵Se ni mi rumete sithumi, i ku vaprofeti, va txi phindula, ve rumela va txi kha vona: Hundulukani, konakuwa, mmweyo ni mmweyo nzilani kwakwe ko biha, mi txi txhukwatisa mithumo yanu ya yinene, kambe mi nga londeteleni simwani sizimu; kasi ku si thumela; se ngu kumaha keto, mi na zumba ka ditiko di ni nga mi ninga, anu ni vatate vanu; aniko kha ma riya tinzeve, hambi ku ni engisa ani.

¹⁶Nguko vanana va Jonadhabhe, mwana Rekabhi, va xayisile sirumo sa tate wawe, asile ene a nga va laya, aniko vathu vava kha va ni engisa,

¹⁷MKOMA, Txizimu txa Mabutho a Tiyimbi, Txizimu txa ka Israyeli, a womba tiya: Wona, ni na neha txitimwi ka Judha, ni ka votshe va zumbako Jerusalema, dotshe dikhombo ni ngadi womba kwawe; nguko ni khala ku va gela, aniko kha va engisa; ni va dhani, aniko kha va xamula.

¹⁸Se ka nyumba ya va ka Rekabhi, Jeremiya a ti khene: MKOMA wa Mabutho a Tiyimbi, Txizimu txa ka Israyeli, a womba tiya: Ngako mi nga engisa sirumo sa Jonadhabhe, tate wanu, mi txi xayisa yotshe milayo yakwe, ni kumaha totshe ti a nga mi leleta,

¹⁹MKOMA wa Mabutho a Tiyimbi, Txizimu txa ka Israyeli, a womba tiya: Kha ku na mbi pwateka wamwamna ka Jonadhabhe, mwana Rekabhi, awu a no ema masoni kwangu ka otshe masiku.