Read chopi Jeremiya 37 Bible Online

Jeremiya 37 - chopi bible

Jeremiya 37

¹ Zedhekiya, mwana Josiya, a to vekwa ngu Nabhukodhonozori, mfumeli wa Bhabhilona, kumaha mfumeli wa ditiko da ka Judha, ka wukhalo wa Koniya, mwana Jehoyakimu.

²Aniko ene ni sithumi sakwe ni vathu va ditiko, kha va engisa timhaka ta MKOMA ati a nga womba ngu txisofu txa mprofeti Jeremiya.

³Mfumeli Zedhekiya a to ruma Jehukali, mwana Selemiya, ni Zefaniya, mwana Mahaseya, mphaxeli, ka Jeremiya, a txi ya khene: Hi kombelele kona kuwa masoni ka MKOMA, Txizimu txathu.

⁴Se ka yoneyo mbimo Jeremiya a ti ti wulela ni kuhuma hagari ka vathu, nguko asi se wuletwa ku khotelwani.

⁵Yimbi ya Faro yi to huma ngu Egipta, sekoko Vakaldheya ava va nga ranganyeta Jerusalema, ngako va ti ti pfite va to khukha Jerusalema.

⁶Sekoko mhaka ya MKOMA yi to ta ka mprofeti Jeremiya:

⁷MKOMA, Txizimu txa Israyeli, a khene: Gelani mfumeli wa ka Judha awu a nga mi ruma kwangu ku ta ni wotisa, mi txi khanu: Wona taku dibutho da Faro adi di nga tela ku ta mi vhuna, di na tshumelela Egipta ditikoni ka dona.

⁸Vakaldheya va na wuya, ve ta wukela didhoropa diya, va txi di khozisa ni kudihisa ngu mndilo.

⁹MKOMA a khene: Mi nga ti kanganyiseni, mi txi khanu: Vakaldheya va na khukha hagari kwathu, nguko kha va na mbi khukha.

¹⁰Nguko hambi i ti ku mi ti ko tshinda yotshe yimbi ya Vakaldheya va va mi wukelako, na ku ti sate dwe vo dayiswa, mmweyo ni mmweyo wawe a ndi na huma ngu ditendani kwawe, a txi ta hisa didhoropa diya.

¹¹Ku ti ngako yimbi ya Vakaldheya yi ti khukhile masoni ka Jerusalema ngu kuthava yimbi ya Faro.

¹²Jeremiya a to huma ngu Jerusalema a txi ya ditikoni ka Bhenjamini, kuva a txi ya henjeleta txipeto hagari ka vathu.

¹³Ku ti ngako a txi nge hoka txikenini ka Bhenjamini, mthangeli wa vawoneleli a ti ti kona kheyo, ditina dakwe i Irija, mwana Xelemiya, mwana Hananiya, awu a nga ñola mprofeti Jeremiya, a txi khene: Awe, u lava ku ti ningela ka Vakaldheya!

¹⁴Jeremiya e xamula a txi khene: Eto makuhu, kha ni tutumeli ka Vakaldheya. Aniko Jeriya kha mu engisa, a to ñola Jeremiya, a txi mu yisa ka vathangeli.

¹⁵Vanana va mfumeli va to henya ngutu ngu Jeremiya, va txi mpeka, va txi mkhotela nyumbani ka Jonatani mabhalani, nguko va nga ti yi mahile mkora.

¹⁶Jeremiya a to wuletwa mkorani, a to zumba maphalani ka kona masiku o tala,

¹⁷mfumeli Zedhekiya a to rumela kuya m'humisa, se mfumeli a to m'dhana ngu txihunja nyumbani kwakwe, a txi khene: Ina di nga vaho dipswi ngu ka MKOMA kani? Jeremiya a to xamula, a txi khene: Diho. E engeta a txi khene: Awe u na ningelwa manzani ka mfumeli wa Bhabhilona.

¹⁸Sekoko Jeremiya a to wotisa ka mfumeli Zedhekiya, a txi khene: Kasi ni to kuonhela txani, ni sithumi sako, ni vathu vava, miza mi txi ni khotela kani?

¹⁹Va hani koko vaprofeti vanu avale va nga txi profeta kwanu, va txi khene: Mfumeli wa Bhabhilona kha na mbi mi wukela hambi kuwukela ditiko diya kani?

²⁰Sekoko mfumeli, nyamne wangu, pfana txikombelo txangu, u nga ni tshumetele nyumbani ka Jonatani mabhalani, ni nga fela kona.

²¹Sekoko mfumeli Zedhekiya, a to va ruma ti to Jeremiya a txi vekwa dizumboni ka vawoneleli; e ningwa dipawu dimwedo ditshiku ni ditshiku ka digondo da vabhiki va mapawu, ma txi za otshe mapawu me guma didhoropani. Na Jeremiya a ti dizumboni ka vawoneleli.