Read chopi Jeremiya 38 Bible Online

Jeremiya 38 - chopi bible

Jeremiya 38

¹Xefatiya, mwana Matani, ni Gedhaliya, mwana Paxuri, ni Jukali, mwana Xelemiya, ni Paxuri, mwana Malikiya, va ti ti pfite timhaka ti Jeremiya a nga huwelela ka votshe vathu, a txi khene:

²MKOMA a khene: Awu a no sala ka diya didhoropa a na fa ngu ditxhari, ni nzala, ni malwati; aniko awule a no thavela ka Vakaldheya a na hanya, a na nga o honyola wutomi wakwe e hanya.

³MKOMA a khene: A diya didhoropa kambe di na ningelwa manzani ka yimbi ya mfumeli wa Bhabhilona, ene a na di khozisa.

⁴Sekoko vathangeli va to gela mfumeli va txi kha vona: Awuwa m'thu a na dawe, nguko wa rera mawoko a tindena ti ti nga sala ka diya didhoropa, ni mawoko a votshe vathu ngu ku va gela timhaka to nga tiya; m'thu wuwa kha xuveli wunene amu ka ditiko diya, aniko a di xuvela makhombo.

⁵Mfumeli Zedhekiya a to xamula a txi khene: Hi nga wonani, ene a manzani kwanu, nguko mfumeli kha sikoti ku mlambela txilo.

⁶Sekoko, va to ñola Jeremiya ve mu releta diphalani ka Malikiya, mwana mfumeli, adi di nga txi maneka dizumboni ka vawoneleli; ve mreleta Jeremiya ngu ngoti. Diphalanimo ku si nga ni mati, hahanze ka madhaka; se Jeremiya a to txhibela madhakani.

⁷Ngako Ebhedhi-Meleki, Muetiyopiya, mthenwa wu a nga ti nyumbani ka mfumeli, a di ti pfite ti to Jeremiya va mtshotshile diphalani, na mfumeli a ti khalahatshile ha txikeni ka Bhenjamini.

⁸Ebhedhi-Meleki a to huma nyumbani ka mfumeli, a to ya womba-womba ni mfumeli, a txi khene:

⁹Mfumeli, nyamne wangu, vavamna vava kha va maha ta tinene ka totshe tile va nga mahela mprofeti Jeremiya, awule va nga mtshotsha diphalani; a na fa ngu nzala aha a ku kona, nguko kha ku ngadi ni mapawu amu didhoropani.

¹⁰Se mfumeli a to ruma Ebhedhi-Meleki Muetiyopiya, a txi khene: Teka magumi mararu a vavamna hawa, mi txi ya humisa mprofeti Jeremiya amu diphalani asi se fa.

¹¹Ebhedhi-Meleki a to tsula ni vavamna vale, veya nyumbani ka mfumeli, ve khokhomela ngu hahatshi ka txisangala, va txi rolela sigwanda sa kale so sina, va txi luka majoke, ve si releta ka Jeremiya amu diphalani.

¹²Ebhedhi-Meleki Muetiyopiya, a to khene ka Jeremiya: Vekela sigwanda siya mkhatani kwako, ngu hahatshi ka tingoti. Se Jeremiya a to maha tona eto.

¹³Se va to ndinda Jeremiya ngu tingoti, va txi mu humisa diphalani, se ene Jeremiya a to zumba banzani ka vawoneleli.

¹⁴Sekoko mfumeli Zedhekiya a to va ruma kuya dhana mprofeti Jeremiya ku va e maneka ka txike txa wuraru txa Nyumba ya MKOMA. Se mfumeli a to khene ka Jeremiya: Na nga ku wotisa mhaka, u nga ni sisele txilo.

¹⁵Jeremiya a to khene ka Zedhekiya: Ngako ni txi kugela mhaka, u na ni daya; ni kungako ni txi kuninga wusungukati, khu na mbi ni engisa.

¹⁶Sekoko mfumeli Zedhekiya a to xambanya ka Jeremiya txihunjani, a txi khene: MKOMA a hanyako, awu a nga hi ninga wutomi wuwa, kha ni na mbi kudaya, hambi ku kuningela manzani ka vathu vale va xotako wutomi wako.

¹⁷Sekoko, Jeremiya a to khene ka Zedhekiya: MKOMA, Txizimu txa Mabutho a Tiyimbi, Txizimu txa ka Israyeli, a khene: Ngako u txi huma u ya ti ningeka ka vanana va mfumeli wa Bhabhilona, se awe u na hanya, ni didhoropa diya kha di na mbi hiswa ngu mndilo; u na hanya awe ni nyumba yako.

¹⁸Aniko ngako u si humi u ya ti ningela ka vanana va mfumeli wa Bhabhilona, adiya didhoropa di na ningelwa ka Vakaldheya, va txi di hisa ngu mndilo, na nawe khu na mbi huluka manzani kwawe.

¹⁹Mfumeli Zedhekiya a to xamula Jeremiya, a txi khene: No thava Vajudha vale va nga tutumela ka Vakaldheya, a ti to ni txi ningelwa manzani kwawe, va txi ni xanisa.

²⁰Jeremiya a to khene: Kha va na mbi kuningela; hi nga engisa dipswi da MKOMA, adi ni ku gelako dona; u na zumbiseka u hanya.

²¹Aniko ngako u txi lamba kuhuma, MKOMA a ni kombisile mhaka yiya:

²²Wona, vavasikati votshe va va nga sala nyumbani ka mfumeli wa ka Judha, va na yiswa ka vanana va mfumeli wa Bhabhilona; vavasikativo va na kha vona: “Vangana vako va ku kanganyisile, va ku xute; mikondo yako yi txhibete madhakani, vona va tshumelete msana.”

²³Votshe vasikati vako ni vanana vako va na yiswa ka Vakaldheya, hambi awe khu na mbi huluka manzani kwawe, aniko u na ñolwa ngu dianza da mfumeli wa Bhabhilona; ni didhoropa di na hiswa ngu mhaka yako.

²⁴Sekoko Zedhekiya a to khene ka Jeremiya: Ngako u si geli m'thu tiya timhaka khu na mbi fa.

²⁵Aniko ngako vathangeli va txi pfa to u wombawombile ni nani, ve ta kwako, va txi kha vona: Hi gele ti u nga womba-womba ni mfumeli, ngako u si hi siseli txilo kha hi na mbi kudaya; mfumeli a ti khene txani kani?

²⁶Sekoko u na va gela u txi khawe: Ni to khongotela mfumeli a ti to asi ngadi e ni tshumetela nyumbani ka Jonatani, ku va ni txi ya fela kona.

²⁷Se votshe vathangeli va mfumeli va to ta ka Jeremiya, va txi ta mu wotisa; ene a to va xamula ngu totshe timhaka ti a nga gelwa ngu mfumeli. Va to mleka, ve ti tsulela, nguko mhaka kha ya zivwa ngu m'thu.

²⁸ Se ene Jeremiya a to zumba ka wukhalo wa vawoneleli, kala ka ditshiku dile Jerusalema a nga khoziswa ngu dona.