Read chopi Jeremiya 39 Bible Online

Jeremiya 39 - chopi bible

Jeremiya 39

¹Ngu mtxima wa wugumi ka dilembe da wutxhanu ni mune da kufuma ka Zedhekiya mfumeli wa ka Judha, Nebhukodhonosori mfumeli wa Bhabhilona a tile ni yimbi yakwe yotshe e ta wukela ni kurandela Jerusalema.

²Se ngu dilembe da wugumi ni dimwedo da Zedhekiya, ka mtxima wa wumune, ka ditshiku da wutxhanu ni mune, didhoropa di to botetwa;

³ku to wulela votshe vathangeli va mfumeli wa Bhabhilona, va to ya ema ka txike txa hagari, i ku va va: Nergali-Sarezeri, ni Samigari-Nebho, ni Sarsekimu, ni Rabhi-Sarisi, ni Nergali-Sarezeri, ni votshe vathangeli va mfumeli wa Bhabhilona.

⁴Ku ti ngako Zedhekiya mfumeli wa ka Judha, ni votshe valwi va yimbi va di va wonile, va to pfodola ve huma didhoropani ni wusiku, ngu nzila ya thembweni ka mfumeli, ngu ka txike txi txi ku hagari ka maguma mambidi, ve huma ngu nzila ya Arabha.

⁵Aniko yimbi ya Vakaldheya yi to va tutumisa, yi txi ya ñola Zedhekiya mikovani ka Jeriko, va txi mu yisa ka Nebhukodhonosori, mfumeli wa Bhabhilona, i ku Ribhila ditikoni ka Hamati, a txi ya lamulwa kona.

⁶Mfumeli wa Bhabhilona a to daya vanana va Zedhekiya masoni kwakwe kona niya Ribhila; ni votshe va hombe va ka Judha a to va daya mfumeli wa Bhabhilona.

⁷A to thavisela maso a Zedhekiya, a txi msunga ngu titxhini timbidi ta msuku, kasi ku mu tsulisa Bhabhilona.

⁸Se Vakaldheya va to hisa nyumba ya mfumeli ngu mndilo ni tinyumba ta vathu va ditikoni, ve khundumusela maguma a Jerusalema.

⁹Vathu vale va nga sala didhoropani, ni vale va nga sala ditikoni, kumweko ni vapfodoli vale va nga ti ningela, va to yiswa Bhabhilona ngu Nebhuzaradhani, mthangeli wa vawoneleli.

¹⁰Aniko sisiwana ni vathu va hahatshi, Nebhuzaradhani mthangeli wa vawoneleli a to va leka amu ditikoni ka Judha, e va ninga ka donedo ditshiku mivhina ni tithembwe.

¹¹Nebhukodhonosori, mfumeli wa Bhabhilona, a ti ti rumisile Nebhuzaradhani, mthangeli wa vawoneleli, ngu Jeremiya, a txi khene:

¹²Mteke, u txi mxayisa, u nga dhuke u txi mmahela kubiha; aniko mmahele ti a no kugela.

¹³Sekoko Nebhuzaradhani, mthangeli wa vawoneleli, ni Nebhuxazbhani, Rabhi-Sarisi, ni Nergali-Sarezeri, Rabhi-Mage ni votshe vathangeli va mfumeli wa Bhabhilona,

¹⁴va to rumwa kuya humisa Jeremiya banzani ka vawoneleli, va txi mu ningela manzani ka Gedhaliya, mwana Ahikamu, mwana Xafani, ati to e tsula nayo m'tini kwakwe; se ene a to zumba hagari ka vathu.

¹⁵Dipswi da MKOMA di tile ka Jeremiya a di ngadi ku khotelwani dizumboni ka vawoneleli, di txi kha dona:

¹⁶Tsula u txi ya gela Ebhedhi-Meleki Muetiyopiya, u txi khawe: MKOMA wa Mabutho a Tiyimbi, Txizimu txa Israyeli, a khene: Ni na tsanisa timhaka tangu ka didhoropa diya ngu wubihi, na i si nga ngu kutshurisa; ti na maheka masoni kwako kedo ditshiku.

¹⁷Aniko ni na kuhulukisa kedo ditshiku, kuwomba MKOMA, khu na mbi ningelwa manzani ka vathuvo u va thavako.

¹⁸Kambe ni na ku xanguta, khu na mbi dawa ngu ditxhari; aniko wutomi wako u na wu honyola nguko u ni thembile, kuwomba MKOMA.