Read chopi Jeremiya 42 Bible Online

Jeremiya 42 - chopi bible

Jeremiya 42

¹Sekoko votshe vathangeli va mabutho a yimbi, kumweko ni Johanani, mwana Kareya, ni Jezaniya, mwana Hoxeya, ni votshe vathu, vanana ni vahombe,

²va to ya ka mprofeti Jeremiya, va txi kha vona kwakwe: Ha kombela ti to u amukela txikombelo txathu, u txi hi kombelela ka MKOMA Txizimu txako, athu hotshe hi nga sala; hi vadotho hi nga sala ngako u ti wonako ngu maso ako:

³Kuva MKOMA Txizimu a na hi kombisa nzila yi hi no tsimbila ngu yona, ni ti hi dinganako ku ti maha.

⁴Se mprofeti Jeremiya a to khene kwakwe: Ni mi engisile; ni na mi kombelela ka MKOMA, Txizimu txanu, ngako mi ti lavisako toneto. Ni tihi ti MKOMA a no mi xamula ni na mi gela; na mbi mi sisela txilo.

⁵Sekoko vona va to kha vona ka Jeremiya: MKOMA ngene fakazi yathu ya ditshuri yo thembeka, ngako hi si mahi totshe ti MKOMA, Txizimu txako, a no kuruma ku ta hi gela tona.

⁶Hambi i di ta tinene, mwendo to biha, titako ngu ka MKOMA, Txizimu txathu, awu hi kurumako kwakwe, hi na ti londisa, kasi hi txi na humelela kha kwati, hi londisa dipswi da MKOMA, Txizimu txathu.

⁷Se ku to maheka tito, msana ka digumi da masiku, di tile dipswi da MKOMA ka Jeremiya.

⁸Sekoko a to dhana Johanani, mwana Kareya, ni totshe tinduna ta tiyimbi a nga ti ti nato, ni votshe vathu, kukhukhela ka wam'dotho kala ka wa hombe.

⁹A nje khene: MKOMA a womba tiya, Txizimu txa ka Israyeli, awu mi nga ni ruma kuheleketa kudila kwanu masoni kwakwe:

¹⁰Ngako mi txi zumba ngu wunene, ni na mi aka, ni si mi khundumusi; ni na mi phaya ni si mi duli, nguko na ti laya ngu wubihi wu ni nga mi mahela.

¹¹Mi nga thaveni mfumeli wa Bhabhilona, awu mi mthavako; mi nga mthaveni, kuwomba MKOMA, nguko ani ni na ni nanu, kasi ku mi hanyisa ni ku mi txhatxhisa manzani kwakwe.

¹²Ni na mi mahela wumbilu, kuva a txi na mi mahela wumbilu, a txi mi tshumetela ditikoni kwanu.

¹³Aniko ngako anu mi txi khanu: Kha hi na mbi zumba ka diya ditiko, mi si londisi dipswi da MKOMA, Txizimu txanu.

¹⁴Mi txi khanu: Athu hi na tsula ditikoni ka Egipta, amu hi no mbi wona yimbi, kha hi na mbi pfa kuvetwa ka mpundu, hambi kupfa nzala ya sakudya, hi na ya zumba koneyo.

¹⁵I di keto, pfanani dipswi da MKOMA, anu misalela ya Judha: Kuwomba MKOMA wa Mabutho a Tiyimbi, Txizimu txa Israyeli: Ngako anu ngu ditshuri mi txi rendekelisa tikhohe tanu txidingeni ka Egipta, mi txi wulela kuya luvela kona;

¹⁶sekoko ku na maheka ti to ditxhari di mi di thavako, di txi mi manela, ditikoni ka Egipta, ni nzala yi anu mi yi thavako yi na va ni nanu kona Egipta, mi na fela koneyo.

¹⁷Ti na mahisa toneto ka votshe vavamna vale va phikelelako kuwulela Egipta kuya zumba kona: Va na dawa ngu ditxhari, va na fa ngu nzala ni mtungu; kha ku na mbi sala kwawe ni wammweyo, hambi kuve huluka ni wammweyo ka txitsayiso txi ni no txi rumela kwawe.

¹⁸Nguko a womba tiya MKOMA wa Mabutho a Tiyimbi, Txizimu txa Israyeli: Nga ti ku nga thekelisa tona kuhenya kwangu ni txiviti txangu ka vale va zumbako Jerusalema, ku na thekelisa toneto kuhenya kwangu txitimwi kwanu, aha ni no wulela Egipta; mi na maneka mi txi ruketelwa, txixamaliso, txinyenyeko, ni kutxhipiswa, kha mi na mbi wu wona kambe wukhalo wuwa.

¹⁹MKOMA a mi gete anu misalela ya ka Judha: Mi nga wuleleni Egipta; zivani ngu ditshuri ati ni nga mi elela nyamsi.

²⁰Nguko anu mipune mi ti kanganyisile, mbimo yile mi nga ni ruma ka MKOMA, Txizimu txanu, mi txi: Hi kombelele ka MKOMA, Txizimu txathu, u nata hi gelisa toneto, hi na maha;

²¹aniko, ngako ni nga mi gela tiya nyamsi, kha ma engisa dipswi da MKOMA, Txizimu txanu, ka ni txihi txilo a nga ni ruma ngu txona kwanu.

²²Ti ziveni koko ngu ditshuri tito, mi na dawa ngu ditxhari, ngu nzala ni mtungu, konaho mi nga ya luvela kona.