Read chopi Jeremiya 44 Bible Online

Jeremiya 44 - chopi bible

Jeremiya 44

¹Dipswi di nga ta ka Jeremiya madingano ni votshe Vajudha va nga txi maneka ditikoni ka Egipta, kona Migidholi ni Tafinasi, ni Nofe, ni ditikoni ka Patrosi, di txi kha dona:

²A womba tiya MKOMA wa Mabutho a Tiyimbi, Txizimu txa Israyeli: Anu mi woni wotshe wubihi wu ni nga wu maha txitimwi ka Jerusalema, ni txitimwi ka otshe madhoropa a ka Judha, wona ti taku ona nziwula, kha ku nga ni wo zumba ka ona;

³ngu mhaka ya kubiha ku va nga kumaha, va txi ni henyisa, ve hisela miphaxo sizimu sa walo ni ku si thumela, vona, anu, ni vatate vanu.

⁴Ni mi rumelete sotshe sithumi sangu i ku vaprofeti, ni mixo ngutu ku ta womba tiya: Mi nga maheni wubihi wu ni wu nyenyako.

⁵Aniko vona kha va engisa, kha va namisa tinzeve tawe, ku va ve huma ka wubihi wawe, kasi va si hiseli miphaxo sizimu sa walo.

⁶Ku thekete koko, kuhenya kwangu ku txi tura txitimwi ka madhoropa a Judha, ni mu ka tinzila ta hombe ta Jerusalema; ona ma to maneka i ti siwula ni sihala nga ti ma wonekisako tona nyamsi.

⁷Kona kuwa koko, MKOMA, Txizimu txa Mabutho a Tiyimbi, Txizimu txa ka Israyeli, a womba tiya: Ngu kota ya ku anu mi mahako kubiha ka hombe ku lwako ni mimoya yanu, kasi kulovisa vavamna ni vavasikati, ka vanana ni ka vale va mamako, hagari ka va ka Judha, mi txi mahela ti to ku si sali ni wammweyo.

⁸Mi txi ni henyisa ngu mithumo ya manza anu, mi txi hisela miphaxo sizimu sa walo ditikoni ka Egipta, eyo mi nga wulela kuya luvela kona, kasi ku anu mi txi ti lovisa, ni ku mi va txiruko ni kutseketselwa hagari ka matiko otshe ha mafuni kani?

⁹Se mi divate konkuwa kubiha ka vatate vanu, ni wubihi wa vafumeli va ka Judha, ni wubihi wa vasikati vawe, ni wubihi wanu, ni wa vasikati vanu, mi nga kumaha ditikoni ka Judha ni mu ka tinzila ta Jerusalema kani?

¹⁰Kha mi ti soli kala ni nyamsi kuwa, kha mi kombi txithavo, kha ma tsimbila ngu milayo yangu ni sileleto sangu, ni nga si veka masoni kwanu ni ka vatate vanu.

¹¹Ngu konaho, MKOMA wa Mabutho a Tiyimbi, Txizimu txa Israyeli, a womba tiya: Ni na mi henyela, ni txi mi thuvikela, ni txi fuvisa Judha.

¹²Ni na teka misalela ya Judha, va nga veka tikhohe tawe kuve va txi na wulela Egipta, kasi kuya luvela kona, se va na ya guma votshe ditikoni ka Egipta; va na hetwa ngu ditxhari, ni kufa ngu nzala; va na hetana kukhukhela ka mwanana kala ka wa hombe; ngu ditxhari ni nzala va na fa: Va nava txisekiso ni txixamaliso, txiruko ni txinyenyeko.

¹³Nguko ni na endela avale va manekako ditikoni na Egipta, nga kule ni nga endela Jerusalema, ngu ditxhari, ni nzala, ni mtungu.

¹⁴Aha kaku kha ku na mbi huluka ni wammweyo e maneka didhawa e sala wa ka Judha a nga wulelela ditikoni ka Egipta, kuya luvela, kasi kuteka ditiko da ka Judha, adi a nga txi navelwa kutshumela eya zumba ka dona; kha va na mbi tshumela, hahanze ka vale va nga huluka.

¹⁵Sekoko va to mu xamula Jeremiya votshe vavamna vale va nga ti tiziva ti to vasikati vawe va hisela dibaselo sizimu sa walo, ni dotshe dibutho da hombe da vavasikati vale va nga ti emile, kumweko ni votshe vathu vale va nga ti ti zumba Patrosi ditikoni ka Egipta, va txi kha vona:

¹⁶Kasi ngu dipswi di u nga hi zivisa ngu ditina da MKOMA, kha hi na mbi kuxonipha awe;

¹⁷hi na londisa kotshe kuwomba ku ku nga huma ngu txisofuni kwathu, hi txi hisela dibaselo txizimu txa txisikati txi dhanwako ku Mfumeli wa Nzumani, ni ku txi luva.

¹⁸Aniko kukhukhela hi leka kuhisela dibaselo Mfumeli wa Nzumani ni kuningela miphaxo, hi to kelelelwa ngu sotshe, hi to dawa ngu ditxhari ni nzala.

¹⁹Ina mbimo yile hi nga hisela dibaselo Mfumeli wa txisikati wa Nzumani ni ku mninga miphaxo ni sa kusela, hi mmahela sibhubhutela kasi ku m'dhunda, ni ku mninga sa kusela hi si nga ni vamna vathu kani?

²⁰Sekoko Jeremiya a to womba ka votshe vathu, ka vavamna ni ka vavasikati, ni ka votshe vathu vale va nga ti mningile xamulo yiya, a txi khene:

²¹Ina a ngava a sa alakanya MKOMA, kha da hoka mbiluni kwakwe dibaselo dile mi nga hisa madhoropani ka Judha ni tinzilani ka Jerusalema, anu ni vatate vanu, ni vafumeli vanu ni tinduna, kumweko ni vathu va ditiko kani?

²²MKOMA a ti sa dingana kuxaniswa mbimo yayingi ngu wubihi wa mithumo yanu, sinyenyeko si mi nga si maha; ngu toneto ditiko danu di mahile txiwula, ni txixamaliso, ni txiruko, ku si na vo zumba, nga ti ku wonekisako tona nyamsi.

²³Ti komba ku mi hisile dibaselo, mi onhete MKOMA, kambe kha ma thava dipswi da MKOMA, kha ma tsimbila ngu sileleto ni wufakazi wakwe, mi humeletwe ngu dikhombo diya, nga ti ti wonekisako tona ni ka diya ditshiku.

²⁴Jeremiya a to engeta e womba ka votshe vathu ni ka vavasikati a txi khene: Engisani dipswi da MKOMA anu motshe va ka Judha, mi ku ditikoni ka Egipta.

²⁵MKOMA wa Mabutho a Tiyimbi, Txizimu txa Israyeli, a womba tiya: Anu ni vasikati vanu kha ma womba dwe ngu txisofu txanu, aniko kambe mi ti mahile ngu manza anu, mi txi khanu: Ngu ditshuri hi na maha ati hi nga thembisa, ta kuhisela dibaselo Mfumeli wa txisikati wa Nzumani, ni ku mninga miphaxo; ngu ditshuri mi tsanisile sixambanyo sanu, kambe ngu ditshuri mi mahile sixambanyo sanu.

²⁶Ngu toneto, engisani dipswi da MKOMA, motshenu va ka Judha mi zumbako Egipta: Na xambanya ngu ditina dangu da hombe, kuwomba MKOMA, ati to kha di na mbi ngadi di txi khumbukwa kambe ditina dangu ngu txisofu txa m'thu wa ka Judha ditikoni kotshe ka Egipta, a txi khene: MKOMA Txizimu a hanyako!

²⁷Sekoko ni na va pfisa kupanda na i si nga wunene; se votshe vathu va ka Judha va ku ditikoni ka Egipta va na hetwa ngu ditxhari ni nzala, veza votshe va txi bhi.

²⁸Se avale va no huluka ditxhari va na khukha ngu ditikoni ka Egipta va txiya ditikoni ka Judha, na i ti vadotho ngu mtengo; se yotshe misalela ya ka Judha yile yi nga wulela ditikoni ka Egipta, kuya luvela kona, yi na tiziva taku ngu kuhi kuwomba ku nga tatiseka, ngwangu mwendo ngwawe.

²⁹Atxiya txi na va txikombiso kwanu, kuwomba MKOMA, ani ni na mi tsayisa ka wuwa wukhalo, kuva mi txi na ziva tito, kha ditshuri, mapswi angu ma na mi wukela.

³⁰MKOMA a khene: Wonani ti to ni na ningela Faro Hofira, mfumeli wa Egipta, manzani ka valala vakwe, ni manzani ka vale va xotako kum'daya, nga kule ni nga ningela Zedhekiya, mfumeli wa ka Judha, manzani ka Nebhukodhonosori, mfumeli wa Bhabhilona, i ku mlala wakwe a nga ti lava ku m'daya.