Read chopi Jeremiya 47 Bible Online

Jeremiya 47 - chopi bible

Jeremiya 47

¹Dipswi da MKOMA di nga ta ka mprofeti Jeremiya, do wukela Vafilista, Faro a sanzi kupeka Gaza.

²MKOMA a khene: Ndiya ma guleka mati a Wuphemba, ma na maha mnambo wu khulungako ni kuthekelela, ma na talela ditiko ni wungi wa sotshe si kuho ka dona, didhoropa ni votshe va zumbako ka dona; vavamna va na peka huwa, ni votshe va ku ditikoni va na dila.

³Ngu mhaka ya diguwa da mahantxhi akwe a mtamo, ni diguwa da sikotxikani sakwe mbimo yile madangarita a kona ma rindilikelako; vaveleki kha va na mbi xayisa vanana vawe, ngu kukarala ka mawoko awe;

⁴ngu mhaka ya Ditshiku dile di tako da kuxaselwa ka Vafilista, ku ta wila ka Tiro ni Sidhoni, votshe vale va nga ti salela ku va vhikelwa; nguko MKOMA a na hasamula Vafilista vale va nga sala txitondoloni ka Kafitori.

⁵Ku na vaho kuyolwa ka hombe ka Gaza, kuloviswa ka Askaloni ni misalela yakwe mkovani; u na ti kuvelela kala yihi mbimo kani?

⁶Awe ditxhari da MKOMA! U na humula yihi mbimo kani? Tshumela u txi nga humula msavani kwako, u txi malala.

⁷U nga humulisa kutxani na u ti ningilwe mlayo ngu MKOMA, wo wukela Asloni, ni ku vhinganyisela mabambe ka linene kani? Ngumo u nga rumwa kona.