Read chopi Jeremiya 52 Bible Online

Jeremiya 52 - chopi bible

Jeremiya 52

¹A ti ni magumi mambidi a malembe Zedhekiya, mbimo yi a nga khata kufuma, a fumile digumi da malembe ni dilembe dimwedo Jerusalema; se ditina da mame wakwe i ti Hamitali, mwana Jeremiya, wa Libhina.

²Se a to maha kubiha masoni ka MKOMA, kufana ni ti a khalako kumaha Jehoyakimi.

³Ngu kota yeto ku to maheka tito, ngu mhaka ya kuhenyelwa ka Jerusalma ni Judha ngu MKOMA, ene a to va tshotsha kule nayo; se Zedhekiya a to wukela mfumeli wa Bhabhilona.

⁴ Se amu ka dilembe da wutxhanu ni mune da kufuma kwakwe, ka mtxima wa wugumi, ka ditshiku da digumi ka mtxima, kutile Nebhukodhonosori, mfumeli wa Bhabhilona, ku ta lwisa Jerusalema, ene ni dibutho dakwe dotshe, ve ta ranganyeta, ve tsivela otshe madhawa.

⁵Didhoropa di to randeliswa toneto, kala ka dilembe da wugumi ni dimwedo da Zedhekiya.

⁶Ngu mtxima wa wumune, ka ditshiku da wutxhanu ni mune ka mtxima, aha nzala yi nga txi simama didhoropani, se vathu va ditiko va to pwata sakudya,

⁷ku to tuleka lisoko lo kari didhoropani, se votshe valwi va yimbi va to thava, ve huma ni wusiku, ngu nzila ya txike, hagari ka maguma mabidi ma nga txi maneka thembweni ka mfumeli (nguko Vakaldheya va txi lwa ni didhoropa), va tutumile ngu nzila ya mkovani.

⁸Se dibutho da Vakaldheya di to londisa mfumeli, di ti ya manela Zedhekiya mikovani ka Jeriko, se dotshe dibutho dakwe di to hangalaka, di txi msiya.

⁹Va to ñola mfumeli, ve m'heleketa ka mfumeli wa Bhabhilona, kona Ribhila, ditikoni ka Hamati, eho a nga ya lamulwa kona.

¹⁰Se mfumeli wa Bhabhilona a to wilela mikolo ya vanana va Zedhekiya khoheni kwakwe, ni mikolo ya votshe vathangeli va ka Judha, kona Ribhila.

¹¹ A to xokola maso a Zedhekiya, e msunga ngu titxhini timbidi ta msuku; se mfumeli wa Bhabhilona a to tsula nayo Bhabhilona, eya mkhotela kala ditshiku da kufa kwakwe.

¹²Se ngu mtxima wa wutxhanu, ka ditshiku da wugumi da mtxima (i ti dilembe da wugumi ni mtxhanu ni mune da kufuma ka Nebhukodhonosori), a tile Nebhuzaradhani, mthangeli wa vawoneleli, awu a nga txi wonelela mfumeli, va to wulela Jerusalema.

¹³Se a to hisa Nyumba ya MKOMA, ni nyumba ya mfumeli, ni totshe tinyumba ta Jerusalema, e lumekela totshe tinyumba ta vahombe.

¹⁴Se dotshe dibutho da Vakaldheya va va nga ti ni mthangeli wa vawoneleli, va to khundumusa otshe maguma ma nga ti ranganyetile Jerusalema.

¹⁵Se avale va sisiwana ngutu hagari ka vathu, ni vamwani vathu va nga ti sate didhoropani, se ni valwisi va va nga ti hokete mfumeli wa Bhabhilona, ni dotshe dibutho, Nebhuzaradhani, mthangeli wa vawoneleli, a to va ñola.

¹⁶Aniko ka vale vasisiwana ngutu ditikoni, Nebhuzadhani, mthangeli wa vawoneleli, a to siya vokari, kuva va txi xayisa mindonga ni kudima.

¹⁷Vakaldheya va to funya ni tona tiphande ta msuku ti nga txi maneka Nyumbani ka MKOMA, ni sitshuwa, ni Linene la msuku si tsula Bhabhilona.

¹⁸Kambe va tekile so sengeleta ka sona dikhuma, mafoxola, tifoloko, ni mikamba, ni so bhumulisa, ni sotshe siya sa msuku, asi si nga txi thumiswa.

¹⁹Se mthangeli wa vawoneleli a to teka magombe ni so hisela ka sona dibaselo, ni mikamba, ni siya so sengeleta ka sona dikhuma, ni titshava ta malambu, ni so nungelisa, ni tifuko, asile sa nzalama yo surutetwa ni sa silivhela yo hehuka.

²⁰Tiphande timbidi ni linene limwelo, ni digumi da tihomu ni timbidi ta msuku si nga txi maneka ka wukhalo wa sitsaniso si nga mahwa ngu mfumeli Solomoni ka Nyumba ya MKOMA, msuku da sotshe siya sile u si na mipimo.

²¹Kasi tiphande, kulapha ka phande yimweyo ni yimweyo i ti ka digumi da mikono ni mtxhanu ni yiraru, na yi di ranganyetilwe ngu ngoti ya digumi da mikono ni yimbidi, ni kudhimba ka mune wa titiho, na i ti dihoko.

²²Se txitimwi ka kona ku ti ni ringi ya msuku, se kuguleka ka ringi i ti ka mtxhanu wa mikono, se sefo ni maromani si ti mabambe ka ringi, se sotshe i ti sa msuku; se yimwani phande yi txi fanana ni yiya, ni maromani a kona.

²³Se ku di ni mtxhanu wa magumi ni mune wa magumi, ni mtxhanu wa maromani ni dimwedo ka didhawa dimwedo ni dimwani; otshe maromani i ti ti dizana, ngu tikasani ka sefo.

²⁴Se mthangeli wa vawoneleli a to teka Sarayasi, mphaxeli wa hombe, ni Zefaniya mphaxeli wa wumbidi, ni vawoneleli vararu va misasimo ya ditimba.

²⁵Se amu didhoropani a tekile mthenwa mmweyo a nga txi xayisa vathu va yimbi, ni mtxhanu wa vavamna vale va nga txi wonelela khohe ya mfumeli, avale va nga manwa didhoropani, kumweko ni mabhalani wa masotxhwa, a nga txi bhalela vathu vo dingana kuya yimbini, ni mtxhanu wa magumi ni digumi dimwedo a vavamna ka vathu va ditiko, va nga manwa mndani ka didhoropa.

²⁶Sekoko Nabhuzaradhani, mthangeli wa vawoneleli, a to va teka, e va tisa Ribhila, ka mfumeli wa Bhabhilona.

²⁷Se mfumeli wa Bhabhilona a to va dayisa e va daya kona Ribhila, ditikoni ka Hamati; ngu kumaha keto, Judha a to tekwa ditikoni kwakwe e tsuliswa wukhumbini.

²⁸Avava ngu vona vathu va Nebhukodhonosori a nga va yisa wukhumbini ngu dilembe da wutxhanu ni mambidi da kufuma kwakwe: 3.023 wa Vajudha.

²⁹Ka dilembe da wugumi ni mtxhanu ni mararu a kufuma ka Nebhukodhonosori, a to teka Jerusalema 832 wa mihefemulo e va yisa wukhumbini.

³⁰Amu ka magumi mambidi a malembe ni malembe mararu a kufuma ka Nebhukodhonosori, Nabhuzaradhani i ku mthangeli wa vawoneleli, hagari ka Vajudha, a to tsulisa wukhumbini 745 wa mihefemulo; yotshe mihefemulo i 4.600.

³¹Ku to maneka koko taku, ka dilembe da wugumi ni mararu a wukhumbi wa Jehoyakimi, mfumeli wa ka Judha, ka mtxima wa wugumi ni yimbidi, ka ditshiku da magumi mambidi ni mtxhanu ka mtxima, aha Evhili-Merodhaki, mfumeli wa Bhabhilona, ka dilembe do khata da kufuma kwakwe, a to guleta msungo wa Jahoyakimi, mfumeli wa ka Judha, e mu humisa ka nyumba ya mkora;

³²a to womba-womba nayo ngu wumbilu, se e veka txikhalo txakwe txa wukoma txitimwi ka simwani situlu sa wukoma sa vale a nga ti navo Bhabhilona.

³³Se e mthavisa syambalo sa mkorani, se Jehoyakimi a dyite kumweko nayo sakudya, ka masiku otshe a kuhanya kwakwe.

³⁴Se maxayisekelo a kona, a to xayiswa kufana ni mfumeli wa Bhabhilona, o lumba ene ka masiku otshe, kala ka ditshiku da kufa kwakwe, ka masiku otshe a kuhanya kwakwe.