Read chopi Jeremiya 9 Bible Online

Jeremiya 9 - chopi bible

Jeremiya 9

¹I ti ku msungo wangu ka Txizimu wo hinduka wu ve mati, ni maso angu kuva txibuka txa mirongo, sekoko ni ndi na va dila wusiku ni mitshikari, vafi va mwanana wa txisikati wa vathu vangu!

²I ti ku no va ni dizumbo da vatsimbili muwa txiwulani, sekoko ni ndi nava ni di lekile vathu vangu, ni khukha hagari kwawe, nguko votshe va ni wugango, msengeletano wa vakangayisi.

³Se va domba tidimi tawe nga malaho kasi kuhemba makuhu, va na ni mtamo ditikoni, aniko kha va wu thumisi kumaha ta tinene, nguko vaya masoni ngu kubiha ni kubiha, kha va ti zivi, kuwomba MKOMA.

⁴Ti woneleni motshenu ngu mhaka ya vaakelani, mi nga thembeni vananu, nguko votshe vanathu va duketa kukanganyisa, ni mwakelani mmwani ni mmwani mbo singetana.

⁵Vona votshe va kanganyisana, kha va wombawombi ditshuri; va gondisile tidimi tawe kuhemba makuhu, ve ti karata ngu kumaha kubiha.

⁶U akile hagari ka wukanganyisi, ngu mhaka ya wukanganyisi va lamba ku ni ziva, kuwomba MKOMA.

⁷Ngu konaho, kuwomba MKOMA wa Mabutho a Tiyimbi, ni na va nyekisa, ni va xola; nguko ni nga mahisa kutxani ngu m'horana wa vathu vangu kani?

⁸Lidimi lawe mseve wu dayako, li womba-womba kukanganyisa. Ngu txisofu txakwe m'thu a womba-womba kuthutha ni mwakelani, aniko mbiluni kwakwe wa mriyela

⁹Ina ani na mbi va tsayisa ngu mhaka ya sona siya kani? Kuwomba MKOMA. Ni na ti pharelela ka ditiko do nga diya kani?

¹⁰Ni na theketa mirongo ni peka huwa ngu mhaka ya mimango, ni dilela wudyiseloni ka txiwula, nguko ku hyite; kha ku ngadi ni m'thu a pindako ngu kona, hambi kupfa kubhoma ka tihomu; sinyana sa nzuma ni sihari si tutumile, si tsute.

¹¹Ni na maha ngu Jerusalema mimumbu ya marigwi, dizumbo da maxolwa; madhoropa a ka Judha ni na ma maha marumbi, ku si vi ni m'thu.

¹²I mani a nga txhariha madingano ni ku e ziva tiya kani? I mani wuwa txisofu txa MKOMA txi nga womba-womba kwakwe, kasi e hi zivisa ti taku ditiko di onhisilwe ngu kutxani kala di ti hisilwe kufana ni txiwula, ku si ngadi kupinda ni m'thu kani?

¹³Se MKOMA a to khene: Nguko va lekile mlayo wangu, awu ni nga wu huwelela masoni kwawe, kha va engisa dipswi dangu, hambi ku di londeta.

¹⁴Kambe, va tsimbite ngu kuranda ka timbilu tawe, ni kulondeta va ka Bhahali, ku nga ti va nga gondiswa ngu vatate vawe.

¹⁵Ngu konaho, kuwomba MKOMA wa Mabutho a Tiyimbi, Txizimu txa Israyeli, a txi khene: Ni na va dyisa manonwe, ni ku va seta txhefu.

¹⁶Ni na va hangalasa hagari ka matiko awa vona hambi vatate vawe va nga mbi ma ziva, ni na rumela ditxhari, niza ni va heta.

¹⁷MKOMA wa Mabutho a Tiyimbi a khene: Alakanyani mi dhana vavasikati va va zivako kusaluka, va txita; mi dhana ni vavasikati va va nga txhariha kumaha txidilo, va txita.

¹⁸Va na kuluvete ve hi pekela huwa, kuva maso athu ma na humisa mirongo, ni mikohe yathu yi tala ngu mati!

¹⁹Nguko dipswi da txidilo di pfate ngu Siyoni, di txi kha dona: Yowe! Kuloviswa kwathu! Hi ta so mba tingana, nguko hi lekile ditiko, se vona va hasamute tinyumba tathu.

²⁰Anu vavasikati, hi nga pfani mhaka ya MKOMA, ni tinzeve tanu ti na amukele dipswi da txisofu txakwe. Gondisani txidilo ka vanana vanu va txisikati, mmweyo ni mmweyo e gondisa lisima la txidilo.

²¹Nguko kufa kukwete ngu mafasitela athu, kuwulete tinyumbani kwathu ka wukoma; kudaya vanana tiruwani ni mazambi sidingeni.

²²Womba! MKOMA a khene: Sirumbi sa vathu si nawa nga sinoniso mu thembweni ni ku nga milumbi ya mueluli, kha nga ho wa kurolela.

²³MKOMA a khene: Txhari nga yi si ti dhundi ngu wutxhari wa yona, ni ndena nga yi si ti dhundi ngu wundena wa yona, hambi wu a ku naso, nga asi ti dhudhi ngu kumana kwakwe.

²⁴ Aniko awu a ti dhundako e ti dhundela ka yiya mhaka, ti taku a di ni kupfisisa e ni ziva, ti taku ngani MKOMA ni mahako wumbilu, ni kupamula ni wululamo ha mafuni; nguko na xalaliswa ngu sa ku ngeto, kuwomba MKOMA.

²⁵Wona, mata masiku, kuwomba MKOMA, aha ni no peka sithiva, ni makhuna:

²⁶Ka Egipta, ni Judha, ni Edhomi, ni vanana va ka Amoni, ni Mowabhi, ni votshe vale va wilako makhona a misisi yawe, va zumbako txiwulani, nguko otshe matiko makhuna, ni yotshe nyumba ya ka Israyeli dikhutu mbiluni ka yona.