Read chopi Sidilo 1 Bible Online

Sidilo 1 - chopi bible

Sidilo 1

¹Hi nga wonani txiwunda txa didhoropa dileya, adiya kale di nga ti ti ni vathu votala! Se konkuwa di hundukile nga noni adi i nga ti da hombe hagari ka matiko; ni mfumeli wa txisikati ka sidhoropana, di hundukile di txi maha m'dihi wa resa.

²Didhoropa da Jerusalema di simama di txi dila ni wusiku; mirongo ya dona yi pyololoka khoheni ka dona; kha di nga ni mmalateli ka sotshe sirandwa sa dona; votshe vangana va dona va di lekile ve maha valala va dona.

³Judha a tsute wukhumbini, ngu mhaka ya kupandiseka, ni kukula ka wukhumbi wawe; a zumba hagari ka matiko, kha humuli; votshe vatovelisi vakwe va mkhakhetile ha kupandisekani kwakwe.

⁴Tinzila ta Siyoni ta dila nguko kha nga ho wu a tako ha msengeletanoni ka habanza; sike sakwe sotshe si savatisilwe vaphaxeli vakwe vatilaya; votuma vakwe va pandisekile, ni nene apune a ni kupandiseka.

⁵Valala vakwe va mxute, valala vakwe va humelela nguko MKOMA a mu wuyisete ngu mhaka ya kutala ka sihoxo sakwe; vanana vakwe, vayiswa wukhumbini masoni ka valala.

⁶Se ngu ka mwanana wa txisikati wa Siyoni wu hangalakile wotshe wudhumo wakwe; vathangeli vakwe va sate va txi fanana ni timbavala to pwata libala lo dya ka lona; ti tsimbila-tsimbila ti si nga ni mtamo masoni ka mxoti.

⁷Khumbula awe Jerusalema, ka masiku a kuxaniseka ni ku ti lambisa kwako ni sotshe si u nga ti si dhunda, si u nga ti naso ngu kale; mbimo yi vathu vako va nga ti ti wa manzani ka mlala, se ene a ti si nga ni muhefemuti valala va muwoni va txi poyila kuwa kwakwe.

⁸Jerusalema a onhile ngutu se ngu toneto, a tote nzambwa. Votshe vale va nga ti mxonipha, se vamnyenyile, nguko va woni wumbwiri wakwe; se ene apune wa kuma a txi namisa thamo.

⁹Nzambwa yakwe yi mu ka syambalo sakwe; kha za a di alakanyile ngu magwito akwe; ngu toneto, kuwa kwakwe kuvite ka hombe ngutu. A pwata ni mmalateli: “Wawo, MKOMA, kuxaniseka kwangu! Nguko mlala wa ti guleta!”

¹⁰Mlala wakwe a mtekete tithomba takwe; nguko a woni matiko ma txi wulela ka wukhalo wakwe wo sawuleka, eyo awe MKOMA, u nga ti ma tsimbile kuwulela ka msengeletano wako.

¹¹Votshe vathu vakwe va dila va txi lava sakudya; va xavisile tithomba tawe ngu kulava sakudya, kasi kuva txi wusa mitamo yawe; “wona MKOMA, wonisisa koko, a ti ni nyenyiswako tona.”

¹²Kha ti pandisi tiya, kwanu motshenu mi pindako ngu nzila, kani? Emani, mi wonisisa, mwendo ku ni mpando wo nga wangu! MKOMA a nga ni tisela wona, ngu ditshiku da txiviti txa kupandiseka kwakwe.

¹³Kukhukhela txitimwi, a rumete mndilo wu txi ta wulela marambuni kwangu; a ni riyete ngu mlawu e ni wisa ngu nyamsane dotshe ditshiku ni sate ni di dirumbini ni si nga ni kutsaka.

¹⁴Ngu dianza dakwe a sungelete nyanda ya sionho sangu e si sungelela hamakata kwangu, nga dikange; MKOMA a emisile mitamo yangu se a txi ni ningela ka valala vangu; se na tandeka kukhukha ni txi ema.

¹⁵MKOMA a txhipisile totshe tindena tangu hagari kwangu; a sengeletile vathu vo talwa ni majaha angu a ni kandetete a txi nga o suka mauvha ha libangani, ani ni ku dihorana da Judha.

¹⁶Se kona kuwa, ni dila ngu totshe ti ti nga ni humelela; maso angu kha ma emi kuhuma mirongo; awule a nga ti fanete ku ni malatela ni ku ni tsanisa a maneka kule ngutu ni nani; vanana vangu va hangalasilwe, nguko mlala a ni xute.

¹⁷A guletile mawoko akwe Siyoni a txi khongela: Aniko kha ku nga ni wo mthavelela; MKOMA a rumile tito, ava va nga gwatama ni Israyeli ve va valala vakwe; Jerusalema a fana ni nzambwa yo nyenyeza.

¹⁸“MKOMA a lulamile, nguko ani koko ni eyisile milayo yakwe; engisani koko anu motshenu, vathu, mi txi wona kupandiseka kwangu; votuma vangu ni majaha angu va tsute wukhumbini.

¹⁹Ni dhani vale va nga ti ni dhunda, aniko va ni kanganyisile; vaphaxeli vangu ni madhota angu va gumile amu didhoropani, mbimo yi va nga ti lava sakudya, so va txi wuseta mitamo yawe.

²⁰Wona MKOMA, ati ni xanisekisako tona; moya wangu wu ha kukaratekani ngutu. Ni ha kupandisekani ka hombe ngutu, nguko ni ti lambisile ngutu. Hahanze kheya, ni dawetwe vanana ngu ditxhari; mndani kwangu ku ni lifo.

²¹Va tipfa to na kuma, aniko kha ni nga nayo wa ku ni xanguta. Votshe valala vangu ava va nga ziva kuxaniseka kwangu, va tsaka ngu ti u nga ni mahela; aniko u txi na wuyisa ditshiku dile u ngadi womba, ni vona va na fana ni nani.

²²Wu nata wotshe wubihi wawe masoni kwako, se va mahe ti u nga ni maha, ngu mhaka ya sionho sangu. Nguko sidikwi sangu nza singi, ni mbilu yangu ya panda ngutu.”