Read chopi Sidilo 2 Bible Online

Sidilo 2 - chopi bible

Sidilo 2

¹Eto MKOMA a nga fenengetisa tona mwanana wa Siyoni wa dihorana kupandisekani kwakwe ngu marefu! A puluwundisile wudhumo wa Israyeli kukhukhela nzumani kala ha mafuni, kha alakanya txikhigelo txa mikondo yakwe; ka ditshiku da kuhenya kwakwe.

²MKOMA a khundumusete yotshe miti ya va ka Jakobe, kha yi pfela wusiwana; kupandisekani kwakwe a khundumusete mikhokhola ya mwanana wa dihorana wa Judha; a txi yi wisa hahatshi; a onhetete wukoma ni vafumeli va kona.

³Ha kupandisekani ka kuhenya kwakwe, a funyetete mtamo wa va ka Israyeli. A txi tshumetela msana txivhikelo txawe, msana ka valala vawe. A txi tura masoni ka va ka Jakobe nga dituro da mndilo wu wuhisako sotshe.

⁴A dombile wulaho wakwe, nga mlala, a tekile lingove lakwe nga mlala; kambe a dayete sotshe si i nga ti so tshura ni ku si wona. A theketile txiviti txakwe txitimwi ka ditenda da mwanana wa muhorana wa Siyoni.

⁵MKOMA a hindukile nga mlala; a hetile va ka Israyeli, a khundumusete totshe tinyumba tawe ta wukoma, a fayetete mikhokhola yawe; e engetela kudila ni kupandiseka ka mwanana wa ka Judha.

⁶Ngu mtamo wa hombe a guatile m'dhuti wakwe, nga msakulo; a hasamute msengeletano wa kona. MKOMA a divatisile mibuso ni Sabbata kona Siyoni. Ha kupandisekani kwakwe, a tsukute ngu txieyiso vafumeli ni vaphaxeli.

⁷MKOMA a lekile txiluvelo txakwe a tsukute ni wukhalo wakwe wo sawuleka, a ningete manzani ka valala maguma a tinyumba tawe ta wukoma; va pekile huwa Nyumbani ka MKOMA nga disthiku da msengeletano wa mpipi.

⁸MKOMA a ni txikungo txo hoxota diguma da muhorana wa Siyoni; a txi ganyatela asi divaleli a mahile ti to ku va ni dikhodho nguko ku fayetetwe diguma ni lithango se ve maneka va si tsana.

⁹Matimba akwe ma fayetetwe; MKOMA a khundumusete ni kufunyeletela matimba a tisimbi; mfumeli wakwe ni vathangeli va kona va ka matiko o mbi na milayo, kuve vaprofeti kha va mani txiwoniso ni txatximwetxo ngu ka MKOMA.

¹⁰Sekoko madhota a dihorana da Siyoni ma khalahatshile ha ka mafu, ma txi dwe; me ti theletela lithulu ha misungo ma txi ambala masaka; votuma va Jerusalema va namisile misungo ha mafuni.

¹¹Maso angu ma karate ngu mirongo, moya wangu wu ha kukaratekani. Ni gumile mtamo ngu kupandiseka ngu mhaka ya kuloviswa muhorana wa vathu vangu; nguko va tsivala vafana ni timenzani to mama, magondoni ka didhoropa.

¹²Va womba ka vamame vawe, va txi kha vona: “Yi hayi fulaho ni vhinya kani?” Mbimo yi va tsivalako nga va to dayiswa tinzilani ka didhoropa, va txi tshakunuta mimoya yawe ka vamame vawe.

¹³Awe Jerusalema, ni kuninga wufakazi wa txani kani? Ni nga kudinganisa ni mani awe mwanana wa dihorana wa Jerusalema kani? Ni nga kufananisa ni mani kasi ku kuthavelela awe wotuma wa Siyoni kani? Nguko txilonda txako nja hombe nga linene; i mani a no kukalamukisa kani?

¹⁴Vaprofeti vako va ku wonete siwoniso sa manyala ni wuhundwa, kambe va tandekile kunuwela wubihi wako, kasi kuretha wukhumbi wako; aniko va woni tithundu ta walo, ni so dingana ku kutovelisa va txi kuxenga ngu tona.

¹⁵Votshe va vapindako ngu nzila vo bhwabhwatela manza, awe mwanana wa dihorana wa Jerusalema Va txi kuvetela miloti, va txi kuzinginisela misungo, va txi kha vona: “Ina ngu wona m'ti wu wu nga ti dhanwa kale ti to mburi ya timburi, txitsakiso mafuni kotshe kani?”

¹⁶Votshe valala vako va asamile sisofu, ni ku kuveteta miloti, ve gegeresela makwasa Va txi kha vona: “He mkhawuliseni! Ditshiku diya i kale hi ti di verete, di hokile, ha di wona!”

¹⁷MKOMA Txizimu a hetisile makungo akwe, a mahile ngu ha a nga womba ngu kona; a kha hindula makungo akwe a kale. A hasute, asi divaleli, a tsakisile valala ngu kuwa kwako a txi va engetela mtamo.

¹⁸Guleta dipswi u txi dila ka nyamne wa sotshe! Awe diguma da mwanana wa dihorana wa Siyoni! Mirongo yako yi na khulunge wusiku ni mitshikari nga txinambwana. Maso ako ma nga thuke ma txi humula, u nga leke kudila.

¹⁹Wuka, u peka nyandayeyo, u dila kukhatani ka sigava sa mikombelo ya wusiku, tshakunuta sotshe si si ku mbiluni kwako. U txi si humisa kubasani, masoni ka nyamne wa sotshe. Guleta mawoko ako kwakwe, u txi phaxela vanana vako, ava vafako ngu nzala sidingeni ka otshe magondo.

²⁰Awe MKOMA, wona! U txi wonisisa ti to i mani u mmahelako tiya. Ina vamame va fanete ku ti dyela vanana va va va randako, kani? Ina vaphaxeli ni vaprofeti va dingana kudawa va txi fela ka wukhalo wako, wo sawuleka kani?

²¹Mazambi ni vathu vahombe va mwalate, ha lithuluni ka magondo. Majaha ni votuma vangu, va datwe ngu matxhari. Ditshiku dile u nga ti henyile, u txi dayela u si divaleli.

²²U ni rambete votshe va ni va thavako vata nga ova ditshiku da m'buso. Ngu ditshiku da kuhenya ka MKOMA, kupwatekile ni wammweyo wo pshwitimuka, e huluka. Vanana va ni nga va kulisa ni ku va xayisa, mlala wangu a va hetile.