Read chopi Sidilo 4 Bible Online

Sidilo 4 - chopi bible

Sidilo 4

¹Hi nga wona ati nzalama yi nga khurumbelisa tona, yi luzeketwe ngu kudikha ka yona! Marigwi a wukhalo wo sawuleka, ma hangalasilwe kotshe mabhudhulani.

²Vanana vo randeka va Siyoni ava va nga ti fananiswa ni nzalama yo tshura se konkuwa va fana ni tikhadi ta dibumba, ti ti nga mahwa ngu manza a muwumbi.

³Tihongonyi ti xayisa vanana va tona ti txi va mamisa; aniko mwanana wa dihorana wa vathu vangu a ni tshofu kufana ni timbuwu ta txiwulani.

⁴Lidimi li vamamako ngu lona, li namarela ngu ditora; vanana va kombela sakudya, aniko kuwalo wu a va ningako.

⁵Ava va nga ti tidya silo so nona konkuwa vawa ngu nzala mu tinzilani; avale va nga kula ngu kuambekwa tinguwo to vangama va handakasela amu matalani.

⁶ Nguko wubihi wa vathu va ka kwathu, mbwa hombe kupinda wa Sodhoma, i ku m'ti wu wu nga mwalatwa ngu mbimwanyana, i si nga ngu diwoko da m'thu aniko da Txizimu.

⁷Tinganakana ta Jerusalema ti ti basile kupinda gapongo, ti ti basile kupinda ni masi; mimidi ya tona yi ti tshurile kupinda so bomba ngu sona yi txi phatima ngutu ta tinene.

⁸Se konkuwa va hindukile va kwalate; kha vaziveki ha tinzilani; mimidi yawe yi khwanyete yi txi namarelana ni marambu, yi txi oma ku nga likhuni.

⁹Avale va nga dawa ngu ditxhari, va katekile kupinda vale va nga dawa ngu nzala, i ku vale va nga sika va txi goma, ngu kupwateka ka mihando tithembweni.

¹⁰ Manza a vamame vale va nga ti zivaneka ngu wunene, ngu ona ma nga bhika vanana vawe mapune, ve tshumela ve dya, nguko m'ti wa ka kwathu wu xasetwe ngu nzala.

¹¹MKOMA Txizimu a hetisile kupandiseka kwakwe a kusute mndilo wa txiviti txakwe. Wu txi hisa m'ti wa Siyoni, wu txi hetisa ni makhato a wona.

¹²Vafumeli va hawa mafuni, hambi i di vaaki va ona otshe kha va kholwa ti to valala va nga thuka va di wulete sikenini ka Jerusalema.

¹³Ngu mhaka ya sionho sa vaprofeti ni wubihi wa vaphaxeli vawe, i ku vona va nga daya vathu vale vo lulama va txi theketa mnoha amu m'tini se ku vangekile dikhombo diya.

¹⁴Vo nga mabhofu amu tinzilani, va tsimbila va di nyetisetwe ngu mnoha, a ha ko ni wammweyo kha sikoti kugwesa syambalo sawe.

¹⁵Va ti tshumetela vathu va txi kha vona: “Khukhani! Mi nyete! Khukhani, khukhani, mi nga hi khuteteni!” Se va hindukile va tendeleki ni valuveli; hambi va matiko va ti ti: “Vathu vava va nge sikoti kuzumba hagari kwathu.”

¹⁶Kupandiseka ka MKOMA ku va abanisile; ene kha na mbi thuka a di va woni kambe, mwendo kuveka txithavo ka vaphaxeli hambi ka vahombe vawe.

¹⁷Maso athu, ma ti guma mtamo, hi txi verela kuvhunwa, hi si mani m'vhuni. Hi ti wonisela vathu hi txi tandeka ku va hulukisa.

¹⁸Va zingela mazambo athu, hi txi tandeka ni kutsimbilatsimbila magondoni kwathu; Kuguma kwathu kuhokile: Masiku athu ma guma, mbimo ya kuhetiswa kwathu yi hokile.

¹⁹Avale va hi tovelisako va ni livilo, va siya ni sinyana sa nzuma; ve hi tovela mimangoni, va txi hi zingela, txiwulani.

²⁰Msawuleki wa MKOMA, ene mtsimbilisi wathu va mñote kufana ni txihari txo wela diphalani. Kuve athu hi ti emete ene, ku a txi hi vhikela, hahatshi ka mtsudi wakwe, hi na hanya hagari ka matiko.

²¹Tsaka ngutu, u tsaka awe mwanana wa muhorana wa Edhomi, u zumbako ditikoni ka Uzi, digombe di na hoka kwako; se u na leva, u sala u sa ambala txilo.

²²Anu vanana va Siyoni, kupekwa kwanu ku gumile MKOMA kha na mbi ngadi a txi mi yisa wukhumbini. Kasi anu vanana va Edhomi, a ngadi a txi na mi pekela sionho sanu a txi humisa minandu yanu hakubasani.