Read chopi Sidilo 5 Bible Online

Sidilo 5 - chopi bible

Sidilo 5

¹Khumbula awe MKOMA, a tile ti nga hi humelela: Wona tingana tathu.

²Thomba yathu yi ningetwe ka vamatiko, miti yathu yi tekilwe ngu vanyamthuyoyo.

³Athu hi fetwe ngu vatate, vamame vathu va hindukile va txi nga tinoni.

⁴Mati athu hi mamana ngu kuxava, hambi tikhuni hi ti mana ngu male.

⁵Vaxanisi vathu va txitimwi ka tithamo tathu; se athu hi karate, kha hi nga ni kuhumula.

⁶Athu hi ti ningete ka Vaegipta ni Vasiriya, kasi kuva txi hi vhuna ngu sakudya so enela.

⁷Vatate vathu va onhile, aniko konkuwa kha va ngaho; se athu vanana vawe hi rwekwa sionho sawe.

⁸Athu hi fumwa ngu sithumi; kha ku nga ni wu a hi hulukisako manzani kwawe.

⁹Hagari ka phango ya wutomi wathu, hi na tisa sakudya, nguko txiwulani ku ni sigevenga.

¹⁰Didhowo dathu di nzihate nga txidimbo, ngu mhaka ya kuhiswa ngu nzala.

¹¹Va pfinyile vavasikati va Siyoni; ni votuma va madhoropa a ka Judha.

¹²Vathangeli va sungeletwe mawoko ve tshongiswa, vathu va hombe kha va vekelwa txithavo.

¹³Va kurumeta majaha kuya gaya, se vafana va dhedherekela ni tinyanda ta tikhuni.

¹⁴Vahombe kha ve ngadi veya habanza, ni majaha kha me ngadi ma txi embelela.

¹⁵Kutsaka ka timbilu tathu ku gumile, kusinya kwathu ku hindukile txidilo.

¹⁶M'bhoti wa ha msungo kwathu wu wite! Se hi na txani, nguko hi onhile!

¹⁷Ngu toneto, ti tsivalisilwe timbilu tathu; kambe ni maso athu ma pfhupete.

¹⁸Nguko mmango wa Siyoni wu xasetwe, vanyapwe va tsimbila-tsimbila kona.

¹⁹Awe MKOMA, kufuma kwako, ngu ha ku si gumiko, ni wukoma wako mbwa liveleko ni liveleko.

²⁰Ngu kutxani u txi zumbela ku hi divala, ni ku hi leka timbimo totshe kani?

²¹Awe MKOMA, hi wuyisele kwako, kasi ku hi txi tshumelela kwako ngu ditshuri, hi tshumetele ka txiemo txile hi nga ti ka txona kale.

²²Ina u nga hi lekela magwito kani? U nga hi pandisekelisa tiya ngutu ngu kutxani kani?