Read chopi Ezekhiyele 10 Bible Online

Ezekhiyele 10 - chopi bible

Ezekhiyele 10

¹ Msana keto, ni to wona ndengalenga ya txitimwi ka misungo ya makerubhima, yi to woneka txitimwi kwawe ni dirigwi da safira, do wonekisa kufana ni txitulu txa wukoma.

²Se a to womba ka wamwamna wule wo ambala sa linyu, a txi khene: Pinda ngu hagari ka madangarita, kala hahatshi ka dikerubhima, u tata manza ngu makala o tura hagari ka makerubhima, se maxwaye didhoropani. Se ene a to wulela ni txi muwona.

³Kambe makerubhima ma ti ti ka didhawa da txinene da nyumba, mbimo yile a nga wulela awule wa wamwamna; direfu dokari di to tata muhubhe wotshe.

⁴Sekoko wudhundo wa MKOMA wu to khukha ngu txitimwi ka makerubhima, wu txi ya txikenini ka nyumba; se nyumba yi to tatwa ngu direfu, ni muhubhe wu to tala ngu kuphatima ka wudhundo wa MKOMA.

⁵Se diguwa da tibhapi ta makerubhima di to pfala kala ka muhubhe wa hahanze, kufana ni dipswi da Txizimu txa Mtamo-wotshe txi txi womba-womba.

⁶Se ku to maheka koko taku MKOMA a txi ruma wamwamna wule a nga ti ambate sa linyu a txi khene: Hala mndilo wa hagari ka madangarita, a hagari ka makerubhima, ene a to wulela eya maneka hagari ka madangarita.

⁷Sekoko dikerubhima dimwedo di to nawuluta dianza ngu hagari ka mamwani makerubhima, ka mndilo wule wu nga ti ti hagari ka makerubhima; se di to hala di txi wu thela manzani ka wule a nga ti ambate sa linyu, ene a to wu amukela e huma.

⁸Se ka makerubhima ku to woneka txo fana ni dianza do nga da m'thu ngu hahatshi ka tibhapi ta ona.

⁹Sekoko ni to wona mune wa madangarita hafuhi ka makerubhima, didangarita dimwedo hafuhi ka dikerubhima dimwedo ni dimwedo; se mawonekelo a madangarita ma ti ti nga mxowo wa dirigwi da lisima.

¹⁰Se ngu mawonekelo a ona, otshe madangarita amune ma ti ti fana; ma ti ko ngako va ni didangarita hagari ka dimwani.

¹¹Ma txi tsimbila makerubhima, ni ona madangatira ma ti ti tsimbila ka mune wa madhawa; ma ti si tshemberekeli ma txi tsimbila, aniko ma ti tikomba khe msungo wu nga ti ti rendekete kona; ma ti si tshemberekeli ma txi tsimbila.

¹²Kambe wotshe mmidi wa makerubhima ni misana ya ona, ni manza a ona, ni tibhapi ta ona, se ni madangarita a ona, madangarita ale mune wa makerubhima ma nga ti nawo, ma ti randetwe ngu maso amangi.

¹³Se ma to raywa madangarita awa ni txi tiengisa ani, taku kutshemberekela.

¹⁴Se dikerubhima dimwedo ni dimwedo di ti ti ni mune wa tikhohe: Khohe ya do khata i ti ti ya dikerubhima, khohe ya da wumbidi i ti ti ya m'thu, khohe ya da wuraru i ti ti ya ngonyamo, se khohe ya wumune i ti ti ya digama.

¹⁵Se makerubima ma to guleka meya txitimwi; asiya ngu sona sihari sile ni nga si wona hafuhi ni mnambo wa Kebhari.

¹⁶Se ma txi tsimbila makerubhima, madangarita ni ona ma ti tsimbila; se makerubhima ma txi guleta tibhapi ta ona, kasi ku ma txi guleka ngu ha mafuni, ni ona madangarita ma ti si ti hambanisi nawo.

¹⁷Ma txi ema makerubhima, ni ona madangarita ma ti ko ema, ma txi guleka, ni ona ma ti ko guleka, nguko moya wa wutomi wu ti tiho ka madangarita ale.

¹⁸Sekoko wudhundo wa MKOMA wu to khukha ngu ha txikeni ka nyumba, wu txi ta ema txitimwi ka makerubhima.

¹⁹Se makerubhima ma to guleta tibhapi ta ona, me guleka ngu ha mafuni, na ni txi ma wona, mbimo yile ma nga khukha; se madangarita ma to ma heleketa ma txi ta ema ka txike txa didhawa da wutxani ka Nyumba ya MKOMA; se wudhundo wa Txizimu txa Israyeli, wu ti ti ngu txitimwi ka ona.

²⁰Asiya ngu sona sihari si ni nga si wona hahatshi ka Txizimu txa Israyeli, hafuhi ni mnambo wa Kebhari, se ni si zivile taku i ti ti makerubhima.

²¹Dikerubhima dimwedo ni dimwedo di ti ti ni mune wa tikhohe, ni mune wa tibhapi, ni sa kufana ni manza a m'thu, ngu hahatshi ka tibhapi ta ona.

²²Se tikhohe tona ti txi fanana ni tile ni nga ti wona hafuhi ni mnambo wa Kebhari; ti di ni mawonekelo mamwewo, i ti ka so va tona tipune; dimwedo ni dimwedo ti ti tsimbilela ha di nga rendekela kona.