Read chopi Ezekhiyele 11 Bible Online

Ezekhiyele 11 - chopi bible

Ezekhiyele 11

¹Sekoko Moya wu to ni gula, wu ni yisa ka ditimba da wutxani da Nyumba ya MKOMA, di nga rendekela wutxani; ha txikeni ku ti ti ni magumi mambidi a vavamna; se hagari kwawe ni woni Jazaniya, mwana Azuri, ni Pelatiya, mwana Bhenaya, vathangeli va vathu.

²Se a to ni gela ku khene: Awe mwanana wa m'thu, avava mbathu va va pimisako wubihi, kambe va ningako sileleto so biha ka diya didhoropa,

³evo va ku kha vona: Kha yi nga hafuhi mbimo ya kuaka tinyumba; didhoropa diya i khadi, se athu hi nyama.

⁴Ngu kumaha keto, profeta u txi va sola; profeta awe mwanana wa m'thu.

⁵Moya wa MKOMA koko wu to khandama txitimwi kwangu, wu txi kha wona: Womba u txi khawe: MKOMA a khene: Anu vathu va ka Israyeli mi khanu, ati ti mahekako kwanu na tiziva.

⁶Mi tatile ngu vo dayelwa didhoropa diya, kambe mi tatile magondo a kona ngu vofa.

⁷Ngu kumaha keto MKOMA a womba tiya: Vafi va mi nga va mbambamisela hagari ka didhoropa i nyama, se dona i khadi; anu koko ni na mi thavisa hagari ka dona.

⁸Mi thavile ditxhari, kambe ditxhari ni na di tisa txitimwi kwanu, kuwomba MKOMA Txizimu.

⁹Se ni na mi humisa didhoropani, ni txi mi ningela manzani ka vamwani vathu, kambe mi na londeta kulamula kwangu hagari kwanu.

¹⁰Mi na wiswa ngu ditxhari; ni na mi lamula mihinganoni ka Israyeli, se mi na tiziva taku ani ngani MKOMA.

¹¹Didhoropa diya kha di na mbi va khadi yanu, kambe anu kha mi na mbi va nyama mndani ka dona; ni na mi lamula mihinganoni ka Israyeli.

¹²Se mi na tiziva taku ngani MKOMA, nguko kha ma tsimbila ngu sileleto sangu, kambe kha ma londeta kulamula kwangu; mi to londeta malamulelo a matiko ale ma nga mi randela.

¹³Se ku to maheka taku, ni txi ngadi ni profeta, a txi fa Palatiya, mwana Bhenaya; sekoko ni to wa ngu khohe, ni dila ngu dipswi da hombe, ni txi khani: Yowe! Awe MKOMA Txizimu! U lava kuhetisa miboti ya Israyeli kani?

¹⁴Sekoko di tile kwangu dipswi da MKOMA, di txi ta kha dona:

¹⁵Awe mwanana wa m'thu, vananu, vananu vapune, vavamna va wuxakani kwako, ni yotshe nyumba ya ka Israyeli, votshe evo ngu vale va nga wombwa ngu vazumbi va Jerusalema, va txi kha vona: Tsulani kule ni MKOMA; ditiko diya hi ningilwe ku di txi hi lumba.

¹⁶Ngu kumaha keto, va gele ku khawe: MKOMA Txizimu a womba a khene: Hambiko ni nga va tshotsha kule hagari ka matiko, ni ku ni nga va hangalasa ka matiko, hambi keto, ni na va wukhalo wawe wo sawuleka, ka mbimo yayidotho, ka ona matiko ale va nga ya ka ona.

¹⁷Ngu kumaha keto, womba ku khawe: MKOMA a womba tiya: Ni na mi sengeleta hagari ka vathu, kambe ni na mi wuyisa ngu ka matiko ale mi nga tshotshwa ka ona.

¹⁸Se va nata kona hale va txi ta thavisa sotshe sile si si lavekiko, ni otshe manyala awe.

¹⁹ Kambe ni na va ninga mbilu yimweyo, ni thela moya wa wuphya mndani kwawe; se nyamani kwawe ni na thavisa mbilu ya dirigwi, ni txi va ninga mbilu ya nyama;

²⁰kasi kuva txi na tsimbila ngu sileleto sangu, va txi xayisa silayelo sangu ni ku si maha; se vona va na va vathu vangu, ani ni na va Txizimu txawe.

²¹Aniko ka vale timbilu tawe ti no tsimbila madingano ni tile ti si lavekiko, ni manyala awe, ni na maha ti to misungo yawe yi pimisela tinzila tawe, kuwomba MKOMA Txizimu.

²²Sekoko makerubhima ma to guleta tibhapi ta ona, se madangarita ma txi ma londetela; ni wudhundo wa Txizimu txa ka Israyeli wu ti ti txitimwi ka ona.

²³Se wudhundo wa Txizimu wu to guleka kukhukhela hagari ka didhoropa kala kuya hoka ka mmango wule wu ku wutxani ka didhoropa.

²⁴Msana keto, Moya wu to ni khukhisa wu txi ni gula ngu txiwoniso kala didhoropani, ka vale va nga ti ti wukhumbini; se txiwoniso txile ni nga txi wona, txi to khukha.

²⁵Se ni to geletela vale va wukhumbini, totshe tile MKOMA a nga ti ti ni wonisile.