Read chopi Ezekhiyele 17 Bible Online

Ezekhiyele 17 - chopi bible

Ezekhiyele 17

¹Se di tile kwangu dipswi da MKOMA, di txi ta kha dona:

²Awe mwanana wa m'thu, maha txidinganiso ka nyumba ya ka Israyeli.

³U txi khawe: MKOMA Txizimu a khene: Digama da hombe, da tibhapi ta hombe, da maphapho a hombe, do tala ngu mitenga ya mixowo yo hambanela, di tile Libhanoni, di ta teka didhavi do lapha ngutu da mkedhari.

⁴Se di to funya tshoka ya txitimwi ngutu ya didhavi da mkedhari, di yi tisa ka ditiko da wukwewu; di ta yi veka didhoropani ka va nyamabhindu.

⁵Di to teka mbewu ya ditikonimo di yi xwaya ka thembwe yokari; di to yi phaya hafuhi ni mati, kha kwati ngutu.

⁶Tshoka yile yi to thunga yi maha m'vhinya wo nava ngutu, wo laphanyana, madhavi a kona ma txi komba ka mndonga wa kona, ni mikoloti yo tshima; se wu to maha m'vhinya, wu veleka mihando, wu txi baleka mazokoro a maphya.

⁷Ku ti ti ni dimwani digama da hombe kambe, da tibhapi ta hombe, da mitenga yo tala; se m'vhinya wu to di hokela ngu mikoloti, ni madhavi, kukhukhela hale wu nga phaywa kona, kasi ku ku theletelwa mati.

⁸M'vhinya wuwa wu phayilwe ka mafu amanene, madhawani ka mati amangi, kasi ku ma txi thunga madhavi, ni kuninga mihando, wu maha m'vhinya wa wunene.

⁹Womba u txi khawe: MKOMA Txizimu a khene: Ina wu na humelela kani? Ina kha na mbi dula ngu mikoloti, a txi wila mihando ya kona, kasi ku wu txi oma kani? Wu na oma ka otshe madhavi a wona; na i si nga ngu mhaka ya diwoko da hombe, hambi ngu mhaka ya vathu votala, wu na dulwa ngu mu ka mikoloti ya kona.

¹⁰Ina wu txi phaywa wu na humelela kani? Ina wu txi pekwa ngu moya wa wutxani kha wu na mbi oma kani? Wu na oma kukhukhela mabambe ka mule wu nga phaywa kona.

¹¹Sekoko di tile kwangu dipswi da MKOMA, di txi ta kha dona:

¹² Kona kuwa i nda khawe ka nyumba ya kutitsimba: Kha mi tizivi taku ti womba txani tona tiya kani? I nda khawe: Wonani taku, a tile kona mfumeli wa Bhabhilona, e ta ñola mfumeli wa Jerusalema ni madhota akwe, e tsula navo Bhabhilona;

¹³se a to teka mmweyo wa liveleko la wukoma, e maha txitumelelano nayo; a to mxambanyisa, e teka ni vathangeli va hombe va mafu ditiko,

¹⁴kasi ku wukoma wu txi khoziswa, wu si wuki kambe; kasi ku a txi ngadi e xayisa txitumelelano takwe, e simama e fuma.

¹⁵Aniko mfumeli wa Jerusalema a to eyisa wule wa Bhabhilona, ngu kurumela mitumi yakwe Egipta, kuya kombela ku tiselwa mahantxhi ni vathu votala; ina a na humelela hambi kuhuluka, awule a mhako eto kani? Niku mwendo a na funya txitumelelano e tutuma kani?

¹⁶Ngako ni hanyako, kuwomba MKOMA Txizimu, ka wukhalo wu a zumbako ka wona, mfumeli wule a nga fumiswa ngu ngene, akule a nga eyisa txixambanyo ni kufunya txitumelelano, ina, a na fela kona Bhabhilona.

¹⁷Se Faro, hambi ni dibutho dakwe da hombe, ni votshe vale votala va m'vhunako, kha na mbi nga maha ta txilo ta yimbi, a txi kela mibhala ni kuaka maguma kasi kuheta vathu.

¹⁸Nguko a eyisile txixambanyo, e funya txitumelelano, txo mahwa ngu kuñolana ka manza; a di mahetete totshe eto, kha na mbi huluka.

¹⁹Ngu kumaha keto, MKOMA Txizimu a khene: Na hanya ani, txixambanyo txangu atxi u nga txi eyisa, ni txitumelelano txangu u nga txi funya, si na wa ha msungo kwako.

²⁰Ni na riyela m'thu ngu milawu yangu, se a na bzetwa ngu mlawu wangu; kambe ni na mtsulisa Bhabhilona, eyo ni no ya mlamula kona, ngu mhaka ya ku a nga ni wukela.

²¹Se votshe vathu vakwe vale va tutumako, ni masotxhwa a kona, va na dawa ngu ditxhari, kambe avale va no sala, va na hangalaka ka madhawa amangi; mi na tiziva taku ani MKOMA ni wombile.

²²MKOMA Txizimu a khene: Se ni na teka tshoka ya mkedhari ni txi yi phaya; ka ale ma thungako ni na wila da diphya ngutu, ni txi ya di phaya ka mmango wo guleka, wo tshura.

²³Ka mmango wo guleka wa ka Israyeli, ni na ya phaya mkedhari, wu na humisa midhari, ni kuveleka mihando, wu na va mkedhari wa wunene; sotshe sinyana si na zumba hahatshi ka mtsudi wa madhavi a kona.

²⁴Ngu kumaha keto, yotshe mindonga ya txitinga yi na tiziva taku ani MKOMA, ni date mndonga wo lapha, ni guletile mndonga wo koma, ni omisile mndonga wo nakana, ni nakanisa mndonga wa kuoma; Ani MKOMA ni wombile, kambe ni na ti maha eto.