Read chopi Ezekhiyele 18 Bible Online

Ezekhiyele 18 - chopi bible

Ezekhiyele 18

¹Se di tile kwangu dipswi da MKOMA, di txi ta kha dona:

² Njitxani mi ku natxo anu, anu mi wombako txidinganiso madingano ni ditiko da ka Israyeli, mi txi khanu: Vatate va dyite mauvha amambisu, se makwasa a vanana ma pfite wutsila kani?

³Na hanya ani, kuwomba MKOMA Txizimu, kha mi na mbi ngadi mi womba kambe mavingu ka Israyeli.

⁴Wonani taku yotshe mihefemulo njangu; nga kule muhefemulo wa tate i ku wangu, muhefemulo wa mwanana ni wona mbwangu; muhefemulo wule wu no onha, ewo wu na fa.

⁵Ngako koko m'thu a di lulamile a maha kululama,

⁶asi dyeli mimangoni, kambe asi guleti maso e wonetela sithombe sa nyumba ya ka Israyeli, mwendo kuxenga msikati wa muakelani wakwe, hambi kuyela wamsikati wule a ti veka didhawa;

⁷asi xuphi ni m'thu mmweyo, a tshumetako ka nyamne asile a nga vekisa ngu sona, asi piko, a ningako sakudya ka wule a ku ni nzala, e ambeka wule i ku tximbwiri;

⁸asi ningeliko male yakwe ngu kubhindulisa, asi amukeli ngu kupindisa, a vayilelisako dianza dakwe ka kwa mbi lulama, a lamulako m'thu ngu kululama masoni ka mmwani m'thu;

⁹ a tsimbilako ngu sileleto sangu, ni kuxayisa wululamo wangu, kasi ku e maha madingano ni ditshuri, eyo mlulami ngu ditshuri a na hanya, kuwomba MKOMA Txizimu.

¹⁰Se ngako ene a txi veleka mwanana wa kupa, mtheketi wa mnoha, a sikotako kumaha to fana ni tiya

¹¹na asi londisi totshe tifanelo, aniko a dyelako txitimwi ka mimango, e xowokisa msikati wa muakelani wakwe,

¹²a txi xanisa txisiwana ni wule wo pwata, a txi pa, kambe asi tshumeti sile so vekiswa, a gulako maso akwe me wonetela sithombe, e mahetela to nyenyeza,

¹³a zumbako ni siya so lombwa, a amukelako so tala, ina a nga hanya kani? Kha na mbi hanya! Otshe manyala awa a ma mahile, ngu ditshuri a na fa; mnoha wakwe wu na va txitimwi kwakwe.

¹⁴Se wona taku ngako a txi veleka mwanana, e wona sotshe sionho so mahwa ngu tate wakwe, niku a di si woni, asi mahi nene tona eto,

¹⁵asi dyeli txitimwi ka mimango, asi guliko maso akwe me wonetela sithombe sa nyumba ya ka Israyeli, kambe asi xowokisiko msikati wa muakelani wakwe,

¹⁶kambe asi xanisi m'thu ni wammweyo, asi zumbiko ni so vekiswa, asi pi, a ningako sakudya ka wo pfa nzala, e ambeka wule i ku tximbwiri,

¹⁷asi nemetiseliko mxaniseki ngu dianza dakwe, asi amukeliko somaha ngu kupindeletisa, a txi londeta wululamo wangu, ni kutsimbila ngu sileleto sangu, eyo kha na mbi fa ngu mhaka ya wubihi wa tate wakwe; ngu ditshuri a na hanya.

¹⁸Tate wakwe, nga kule a nga xanisa, a txi pa somaha sa mwanawe, e maha ti i singako ta tinene hagari ka vathu, wona taku a na fa ngu mhaka ya wubihi wakwe.

¹⁹Aniko wombani ku khanu: Ngu kutxani mwanana asi tekeleli wubihi wa tate wakwe kani? Nguko mwanana a mahile tinene ni wululamo, kambe a xayisile sotshe sileleto sangu a txi si maha, ngu mhaka ya eto, ngu ditshuri a na hanya.

²⁰Muhefemulo wule wu onhako, ewo wu na fa; mwanana kha na mbi tekelela wubihi wa tate, hambi tate kha na mbi teka wubihi wa mwanana; kululama ka wo lulama ku nava txitimwi kwakwe, ni wubihi wa m'bihi wu na va txitimwi kwakwe.

²¹Aniko ngako m'bihi a txi hunduluka ka sionho si a nga si maha, se a txi xayisa sotshe sileleto sangu, a txi maha tinene ni kululama, ngu ditshuri a na hanya; kha na mbi fa.

²²Ka sotshe sihambunyeto si va nga si maha, kha si na mbi alakanywa; a na hanyiswa ngu kululama kwakwe a nga kumaha.

²³Ina ani ni ndi na tsaka ngu kufa ka wo biha kani? Kuwomba MKOMA Txizimu; kha ni tsakeli ku e hunduluka ka tinzila takwe e hanya kani?

²⁴Aniko ngako m'thu wo lulama a txi leka kululama kwakwe, se a txi maha ta kwa mbi lulama, a txi maha totshe ta manyala tile ti mahwako ngu m'bihi, ina a nga hanya kani? Kotshe kululama kule a nga kumaha, kha ku na mbi alakanywa; wuhambunyeti wu a nga hambunyeta ngu wona, ni txionho txile a nga txi maha, a na fela ka sona.

²⁵Ma womba mi txi khanu: Nzila ya MKOMA hi nga yo lulama. Engisa koko awe nyumba ya ka Israyeli: Nzila yangu kha ya lulama kani? Hi nga tinzila tanu ti nga gombonyeka kani?

²⁶Ngako m'thu wo lulama a txi huma kululamani kwakwe a txi maha wubihi, a na fa ngu wona; a na fela ka wona wubihi wule a nga wu maha.

²⁷Aniko ngako m'bihi a txi hunduluka ka wubihi wakwe wule a nga wu maha, se a txi maha tinene ni kululama, a na xayisa muhefemulo wakwe, wu txi hanya.

²⁸Nguko awule a tshumelako e hunduluka ka sotshe sihambunyeto sile a nga si maha, ngu ditshuri a na hanya, kha na mbi fa.

²⁹Hambi keto nyumba ya ka Israyeli yi kha yona: Nzila ya MKOMA kha ya lulama. Ina tinzila tangu kha ta lulama, awe nyumba ya ka Israyeli kani? Ina tinzila tanu kha ta gombonyeka kani?

³⁰Ngu kumaha keto, ani ni na mi lamula, mmweyo ni mmweyo ngu tinzila takwe, awe nyumba ya ka Israyeli, kuwomba MKOMA Txizimu; ngonani, hundulukani ka sotshe sihambunyeto sanu, se wubihi kha wu na mbi mi humba.

³¹Tshotshani sotshe sihambunyeto si mi nga hambunyeta ngu sona, se kulaveka mi va ni mbilu ya yiphya ni moya wa wuphya; nguko mi ndi na fela txani anu nyumba ya ka Israyeli kani?

³²Nguko kha ni tsakeli kufa ka wule afako, kuwomba MKOMA Txizimu; hundulukani koko, kambe hanya.