Read chopi Ezekhiyele 19 Bible Online

Ezekhiyele 19 - chopi bible

Ezekhiyele 19

¹Se awe wusa txidilo txitimwi ka vakoma va ka Israyeli,

²u txi khawe: I mani mame wako kani? Ngonyamo ya makati hagari ka tingonyamo, yi wunjile vanana va yona hagari ka singonyamwana.

³Kambe yi kulisile tximwetxo ka vanana va yona, a txi maha txingonyamwana, txi gondelako kuxota, se txi kakatxute vathu.

⁴Se matiko ma di pfite kuwomba ngu yona, yi to ya manwa diphalani ka yona, ve yi vekela mkhalo va txi yi tisa Egipta.

⁵Ngonyamo yile ya makati yi di ti woni taku kha yi ngadi ni themba, yi to teka mmwani ka vanana va yona yi mmaha txingonyamwana.

⁶Se mbimo yile txi nga kula, txi tsimbila-tsimbila hagari ka tingonyamo, txi to maha txingonyamwana txo gondela kuxota, se yi txi kakatxula vathu.

⁷Yi to ziva tinyumba tawe ta wukoma, yi khundumusela madhoropa awe; va to xasela mafu ni sotshe si nga ti ti ka ona, ngu kupfa kubhonga ka yona.

⁸Sekoko vathu va matiko a hombe, va to sengeletana ve yi randela, va txi yi lwisa, veza veya yi mana diphalani ka yona.

⁹Kambe va to yi ndinda ngu mkhalo va txi yi wuleta mkorani, ve yi heleketa ka mfumeli wa Bhabhilona; va txi yi wuleta ka makhalo o banga, kasi di si ngadi di pfala dipswi da yona mimangoni ka Israyeli.

¹⁰Israyeli i ku mame wako a ti ti nga m'vhinya, wu nga phaywa hafuhi ni mati; wu tata madhavi ngu mihando, ngu mhaka ya kutalelwa ngu mati.

¹¹Wu ti ti ni tindonga to banga, tindonga to dingana vakhozisi, se wu to guleka hagari ka madhavi o txhuma, ku txi wonwa kuguleka ka wona ni madhavi a kona amangi.

¹²Aniko wu to dulwa ngu txiviti, wu txi wiswa hahatshi, moya wa wutxani wu to omisa mihando ya kona; tindonga ta kona to banga ti to funyeka ti oma, ti txi tshokomiswa ngu mndilo.

¹³Se kona kuwa wu phayilwe txiwulani, ka mafu a kuoma, a txisapa.

¹⁴Ngu ka ndonga yimweyo ya madhavi a wona ku to huma mndilo, wu tshokomisa mihando ya kona, kha kuswi kumaneka ni ya yimweyo ndonga yo banga, yo fuma ngu yona. Atxiya njidilo, txi no thumela kumaha txidilo.