Read chopi Ezekhiyele 21 Bible Online

Ezekhiyele 21 - chopi bible

Ezekhiyele 21

¹Se di tile kwangu dipswi da MKOMA, di txi ta kha dona:

²Awe mwanana wa m'thu, rendekela Jerusalema na u di thuvikile, u theketa mapswi ako o wukela makhalo o sawuleka, ni kuprofeta u wukela ditiko da ka Israyeli.

³Womba ka ditiko da ka Israyeli u txi khawe: MKOMA a khene: Wona taku na kuwukela, ni na swomola ditxhari dangu ngu msavani kwangu, ni fuvisa hagari kwako, vo lulama ni vabihi.

⁴Ngu kumaha keto, ni no fuvisa hagari kwako vo lulama ni vabihi, ditxhari dangu di na huma ngu msavani, di txi wukela yotshe nyama, kukhukhela Wulambwe kala Wuphemba.

⁵Se yotshe nyama yi a tiziva taku, ani MKOMA, ni swomote ditxhari dangu ngu msavani; kha di na mbi ngadi di tshumelela msavani ka dona.

⁶Awe koko mwanana wa m'thu, hefemuteka; hefemuteka va txi kuwona, ni kuwika msana ni kupandiseka.

⁷Ina mbimo yile va no kha vona: U hefemuteka ngu kutxani kani? Awe u na khawe: Ngu mhaka ya ti tatiphya titako; se totshe timbilu ti na tsivala, otshe manza ma na karala, wotshe moya wu na xomuleka, ni otshe mazolo ma na txutxeka me maha mati; wona taku tata, kambe ti na maheka, kuwomba MKOMA Txizimu.

⁸Se di tile kwangu dipswi da MKOMA di txi ta kha dona:

⁹Awe mwanana wa m'thu, profeta u txi khawe: MKOMA a khene: Ditxhari, ditxhari di lotilwe, kambe di swililikile;

¹⁰di lotetwe kudaya, di swililikisetwe kuphatima; ina koko hi na tsaka kuwa kani? Ndonga ya mwanana wangu, ya eyisa mndonga.

¹¹Ditxhari di swililikiselwa kuphatima, kuva di txi na thumiswa; di lotilwe ni kuswililikiswa, kasi ku di txi ya vekwa manzani ka txidayi.

¹²Kwangula u txi dhudhumela, awe mwanana wa m'thu, nguko di na wukela vathu vangu, di na wukela votshe vathangeli va ka Israyeli; va na xamala vathu vangu, ngu mhaka ya ditxhari; peka nyonga yako koko.

¹³Nguko ku na vaho kuxolwa; se ti ndi na txani i tiku kha ku nga ni ndonga yo tsayisa ngu yona kani? Kuwomba MKOMA Txizimu.

¹⁴Awe koko mwanana wa m'thu, profeta, u txi bhwabhwatela; nguko ditxhari hambi ka wuraru di na wila; ditxhari do thola vathu, di txi va thola ve fa, di na wulela kala tinyumbani kwawe.

¹⁵Kasi ku ti txi thidhela timbilu tawe, ku txi tala siphariyeta, ka sotshe sike sawe, ni vekile tshoka ya ditxhari, do fana ni nyangafula, yo rumelwa kuya daya!

¹⁶Awe ditxhari, rendekela didhawa da txinene, u rendekela didhawa da txibhabha, amu u lavako taku khohe yako yi wonetela kona.

¹⁷Se ni na bhwabhwatela manza, ni boxisa kuhenya kwangu, ani MKOMA ni wombile.

¹⁸Se di tile kwangu dipswi da MKOMA di txi ta kha dona:

¹⁹Awe koko mwanana wa m'thu, komba tinzila timbidi, ati di nota ngu ka tona ditxhari, ka mfumeli wa Bhabhilona; totshe ti nava ka ditiko dimwedo; veka ka tona sikombiso, ngu ha txikeni ka nzila yo wulela didhoropani.

²⁰U na kombisa nzila ayi di nota ngu yona ditxhari do lwisa vanana va Amoni, ditikoni ka Rabha, ni kulwisa Judha, kona Jerusalema, didhoropa da kutsaniswa.

²¹Nguko mfumeli wa Bhabhilona a na ema mahandakanyani, ngu txitimwi ka tinzila timbidi kasi ku e hutetela; a na lota tingove takwe, a na xaxuva titerafime, a txi dhunga ni sa mndani.

²²Ka didhawa dakwe da txinene, ku na hutetelwa madingano ni Jerusalema, kasi kugela vale va nga emeleta ve khata kuxasela, va txi kwangula ngu kutsaka ka hombe, vaemeleti ve guleta siparako sa matimba, ve aka txitezi txa vavhikeli.

²³Eto masoni kwawe va na kha vona ngu hutetela ka walo, nguko va xambanyisilwe ngu kuxambanyelana hagari kwawe; aniko ene a na alakanya ngu wubihi, kasi kuza ve manwa.

²⁴Nguko mahe keto, MKOMA Txizimu a khene: Wonani taku ma ni alakanyisa wubihi wanu, mi humisa kubasani wuhambunyeti wanu, kuwoneka sionho sanu ka yotshe mithumo yanu, ti kombako ku mi tile ngu kualakanya, mi na ñolwa ngu manza.

²⁵Awe mthangeliwe wa muonhi wa ka Israyeli, awe u no hokelwa ngu ditshiku do biha ngutu;

²⁶MKOMA Txizimu a khene: Thavisa txigoko, u gula m'bhoti; kha wu na mbi va wona kambe m'bhoti wuwa; guleta si si ku hahatshi, u wisa sile sa kutikulisa.

²⁷Ni na khundumusa, ni na khundumusa, ni na khundumusa m'bhoti wuwa, kha wu na mbi va i di wona kambe m'bhoti wuwa, ku nata wule wu lumbako m'thu wa kona, se ni na ninga eneyo.

²⁸ Se awe mwanana wa m'thu, profeta u txi khawe: MKOMA Txizimu a khene madingano ni kutxhipiswa ka vanana va ka Amoni: Womba ku khawe: Ditxhariu, ditxhari di hindisilwe ni kuswililikila kudaya ni kufuvisa, ni kuphatimaphatima;

²⁹Hambi va txi kuwona u si nyawuli, hambiko va txi kuhuta makuhu kasi ku kuhayeka mkoloni ka vaonhi, ava va nga dayiselwa va txi fa, ditshiku di nata da kutsayiswa ka hombe.

³⁰Tshumeta ditxhari dako msavani ka dona; ka wukhalo wule u nga velekwa ka wona, i ku ditiko di u nga velekwa ka dona, ni na kulamula.

³¹Kambe ni na tshakunuta txitimwi kwako kuhenya kwangu, ni na futeta kwako mndilo wa kuhenya kwangu, ni txi kuningela manzani ka vavamna va sigevenga, i ku vanyamne va wuhasamuli.

³²U na va kudya ka mndilo, mnoha wako wu na va hagari ka mafu, khu na mbi alakanywa kambe; nguko ani MKOMA ni wombile.