Read chopi Ezekhiyele 22 Bible Online

Ezekhiyele 22 - chopi bible

Ezekhiyele 22

¹Se di tile kwangu dipswi da MKOMA di txi ta kha dona:

²Awe koko mwanana wa m'thu, u na lamula, u na lamula didhoropa do theketa mnoha kani? Zivanekisa otshe manyala ako.

³U txi khawe: MKOMA Txizimu a khene: Dikhombo ka didhoropa di di theketako mnoha hagari ka dona, kasi ku yi na hoke mbimo ya kona! Di ti mahelako sithombe sa kutinyenyezisa!

⁴Ngu mhaka ya mnoha wako wule u nga wu theketa, u ti onhisile, kambe u ti nyenyezisile ngu sithombe sile u nga ti mahela, u hungula masiku ako, ni kuhoka magwito ka malembe ako; ngu toneto ni kumahile txiruko ni txisekiso ka matiko.

⁵Matiko a hafuhi ni nawe ni a kule ma na kuseka, ma txi kutxhipisa, u talelwa ngu tingana.

⁶Wona taku vathangeli va ka Israyeli, mmweyo ni mmweyo madingano ni mtamo wakwe, va ku khozisile, kasi kutheketa mnoha.

⁷Tate ni mame va txhipisilwe kwako, va xanisile mluveli hagari kwanu, va khozisile wo felwa ngu vaveleki, kumweko ni noni.

⁸U txhipisile siya sangu so sawuleka, kambe u nyenyezisile Masabbata angu.

⁹Hagari kwako ku ni vavamna va sipoyilo, kasi kutheketa mnoha; kambe va dyete txitimwi ka mimango yako, ni kumahetela wukanganyisi hagari kwako.

¹⁰Va vhunungute wumbwiri wa vatate vawe, ve otela ni vavasikati vale va nga txi ti vekisa.

¹¹Mmwani a otete ni msikati wa muakelani wakwe, mmwani a txi otela ni mane wakwe, se mmwani a txi gima ndiyakwe, i ku mwanana wa tate wakwe.

¹²Ku amuketwe siningo kasi kutheketa mnoha; so honyola ni so bhindulwa u tekile, u maha likungo ka mwakelani, u txi mkhozisa; kambe ani u ni divate, kuwomba MKOMA Txizimu.

¹³Wona taku, ni pekile manza ngu mhaka ya kufelela kwako aku u nga kumaha, ni mnoha wu wu nga theketwa kwako

¹⁴Ina mwendo mbilu yako yi na va yi di tsani kani? Manza ako ma nava ma di ni mtamo, ka masiku ale ni no ku tela kani? Ani MKOMA ni wombile, kambe ni na ti maha.

¹⁵Se ni na kuhangalasa hagari ka matiko, ni txi kuhangalasa ka mafu, ni nata heta wubihi wako.

¹⁶Awe u na ti nyenyezisa upune, na u txi wonwa ngu matiko, se u na tiziva taku ani ngani MKOMA.

¹⁷Se di tile kwangu dipswi da MKOMA, di txi ta kha dona:

¹⁸Awe mwanana wa m'thu, nyumba ya ka Israyeli yi txhipile kwangu; votshe i koporo, ni mthovhu ni simbi, ni simbi yo nemela ngutu, hagari ka txikho; va ti mahile silivhela yo txhipa.

¹⁹Ngu kumaha keto, MKOMA a khene: Eko motshenu mi nga ti txhipisa, wonani taku ni na mi sengeleta Jerusalema.

²⁰Nga tile ku patiswako tona silivhela ni koporo, ni simbi, ni simbi yo nemela, ni mthovhu hagari ka txikho, kasi kufuteta mndilo txitimwi ka sona, kasi ku si txi patana, ni na mi patanisisa toneto kuhenyani kwangu ni mu ka txiviti txangu, se ni na mi leka koneho, ni mi nyekisa.

²¹Kambe ni na mi sengeleta ni futeta txitimwi kwanu, mndilo wa kuhenya kwangu; mi na pataniswa hagari ka txikho.

²²Kufana ni kule kupatanako silivhela hagari ka txikho, mi na patanisiswa toneto hagari ka txikho; kambe mi na tiziva taku ani MKOMA, ni na tshakunuta kuhenya kwangu txitimwi kwanu.

²³Se di tile kwangu dipswi da MKOMA, di txi ta kha dona:

²⁴Awe mwanana wa m'thu, di gele ku khawe: Awe u ditiko daku va u nga mbi sawulekiswa, u si welwiko ngu mati ka ditshiku da kuhenyelwa.

²⁵Kukanetisana ka vaprofeti vako kuho hagari ka dona, kufana ni gonyamo yi bhongako, yi txi ñola txihari; va honyolako tithomba ni simwani somaha, ve engetela tinoni hagari ka dona.

²⁶Vaphaxeli va dona va ndaka mlayo wangu, kambe va nyenyezisela siya sangu so sawuleka; hagari ka wo sawuleka ni wo nyenyeza kha ku nga ni kuhambana, hambi kuhambana ka wo sawuleka ni wa kwa mbi sawuleka; amu ka Masabbata angu, va pfhumisa maso awe, se ngu kumaha keto na nyenyeziswa hagari kwawe.

²⁷Vathangeli vawe hagari ka dona, va fana ni maxolwa ale ma ñolako sihari, kasi kutheketa mnoha, va txi khundumusa mihefemulo, va txi felela.

²⁸Kambe vaprofeti va kona va ti maha dibumba da kwa mbi patelwa, va txi wona kwa mbi nyawula, va txi va gela makuhu va txi kha vona: MKOMA Txizimu a khene; na a sa womba txilo MKOMA.

²⁹Va tsindaveta ngutu vathu ditikoni, va txi pa, va txi lwisa wo xaniseka ni wa kupwata, va txi khozisa mluveli ku si nga ni fanelo.

³⁰Hagari kwawe ni lavile wamwamna wa kuva a nga tsivela diguma, na a ti ka ditshoko masoni kwangu, kasi ku ni si di khundumusi; aniko kha na mana ni wammweyo.

³¹Ngu kumaha keto, ni tshakunutile kuhenya kwangu; ni va tshokomisile ngu mndilo wa kuhenya kwangu; ni maha ti to nzila yawe yi txi wa txitimwi ka misungo yawe, kuwomba MKOMA Txizimu.