Read chopi Ezekhiyele 23 Bible Online

Ezekhiyele 23 - chopi bible

Ezekhiyele 23

¹Di tile kambe kwangu dipswi da MKOMA, di txi ta kha dona:

²Awe mwanana wa m'thu, ku vile ni vavasikati vambidi, vanana va mame mmweyo.

³Va to maha wugango Egipta; va mahile wugango i di ngadi vavaphya; va khutaretwe tikhana tawe, titshumbu ta wumbiri wawe ti kamaretetwe.

⁴Se matina awe i ti ti awa: Ohola, i ku mkomwa kona, ni Oholibha, i ku mnanda; va vile vangu, va velekile vanana vavafana ni vamahorana; kasi ngu ditina dakwe Samariya, i Ohola, se Jerusalema, i Oholibha.

⁵Se Ohola, na kuve mbwangu; kambe a randanile ni sigango sakwe sa Vasiriya, i ku vaakelani vakwe.

⁶Va ti ambate sa mkuxe, vathangeli ni vathaviseki, votshe vavaphya, ni vagadhi va mahantxhi na va di ma gadhile.

⁷Ngu kumaha keto, Ohola a mahile navo wugango, i ku vona i nga ti ti siluva sa vanana va ditiko da Asiriya, ni votshe vale a nga randana navo; a ti nyenyezisile ngu sotshe sithombe sawe.

⁸Ni wotshe wugelegele wule a nga ta nawo ngu Egipta kha wu leka; nguko va otete nayo i di ngadi mphya, kambe va ñoletete titshumbu ta wuhorana wakwe, se ve thela kwakwe wubihi wawe.

⁹Ngu kumaha keto, ni mningete manzani ka sigango sakwe, i ku manzani ka vanana va Vasiriya, avale a nga randana navo.

¹⁰Vona va vhunungute wumbwiri wakwe, va tekile vanana vakwe va txiwamna ni va txisikati, aniko ene va m'date ngu ditxhari; se a vile ni nduma hagari ka vavasikati, kambe kulamula ku vile txitimwi kwakwe.

¹¹Mnanda wa kona Oholibha mbimo yile a nga ti wona, a to kulisa wugelegele wakwe kupinda wa mkomwakwe, wugelegele wakwe wu to maha wa hombe kupinda wa mwanawe.

¹²A randani ni vanana va Vasiriya, ni vathangeli ni vathaviseki, i ku vaakelani vakwe, va nga ambala so tshura, va di gadhile mahantxhi, votshe majaha o tshura.

¹³Se ni woni taku a ti ti nyenyezisile; nzila yawe ngu wumbidi wawe i ti ti yimweyo.

¹⁴Oholibha a to engetekelana ka wugelegele wakwe, nguko a woni vavamna vo pendwa, ha disetani, i ku sifananiso sa Vakaldewu, sa mxowo wo bhilivila;

¹⁵na siwunu sawe si di sungiliwe, ni sigoko so anama msungoni kwawe, votshe va txi fanana ni vathangeli va yimbi, na va txi fanana ni vanana va Bhabhilona kona Kaldheya, eyo va nga velekelwa kona.

¹⁶Se Oholibha a to randana navo, mbimo yi a nga va wona, a to rumela mtumi kwawe kona Kaldheya.

¹⁷Sekoko vanana va Bhabhilona va to mtela, va txi otela nayo ha ditahoni ka lirando; se ene a to ti nyenyezisa navo; sekoko moya wakwe wu hambana navo.

¹⁸Ngu kumaha keto, a to maha wufenze, e humisa wumbwiri wakwe; sekoko moya wangu wu to ya kule nayo, nga kule moya wangu wu nga ti ti tsute kule ni mkomwakwe.

¹⁹Ene koko a to andisa wugelegele wakwe, a txi alakanya masiku a wuhorana wakwe, mbimo yile a nga ti ti maha wugango, ditikoni ka Egipta.

²⁰Se a to randana ni sigango sakwe, esso siro sa sona si fanako ni sa timbongola, ni minavelo ya kona yi fanako ni minavelo ya mahantxhi.

²¹Ngu kumaha keto, u wuyisile mapimoni kwako, zumbelo ya wuhorana wako, mbimo yile Vaegipta va nga txi ñoletela titshumbu tako, hakhana ka wuhorana wako.

²²Ngu konaho, awe Oholibha, MKOMA a khene: Wona taku ni na wusa sigango sako, asile moya wako wu nga ti ti hambani naso, se ni na si wuyisa ngu ka otshe madhawa, si txi ta kuwukela.

²³I ku vanana va Vabhabhilona, ni votshe Vakaldheya va niya Pekodhe, va ku Sowa, Kowa, ni votshe vanana va Vasiriya va ku navo, mazambi ni mahorana o tshura, kumweko ni votshe vathangeli ni vathaviseki, vathangeli va tiyimbi ni votshe va ku ni nduma, votshe nava di gadhile mahantxhi.

²⁴Se va nata kuwukela va di ni sikotxikani ni vathu votala; va txi ta kurandela va di ni sitxhavangu, ni sigoko; kambe ni na veka masoni kwawe valamuli, ava va no kulamula ngu malamulelo awe.

²⁵Se ni na veka kwako kuhiseka kwangu, se va na kuhenyela; va na kuthavisa thonvu ni tinzeve, kambe a txi txi no sala kwako, txi na wiswa ngu ditxhari; va na kutekela vanana vako va majaha ni vamahorana, se asi si no gwitisa kusala kwako, si na tshokomiswa ngu mndilo.

²⁶Kambe va na kuambula simaha, va txi kuhonyola si u ti bombisako ngu sona.

²⁷Ngu kumaha keto, ni heta wubihi wako, ni wugango wako wa ditikoni ka Egipta; kambe khu na mbi va gulela maso, hambi ku ngadi u txi alakanya Egipta.

²⁸Nguko MKOMA Txizimu a khene: Wona taku ni na kuningela manzani ka vale u va nyenyako, i ku manzani ka vale moya wako wu nga ti ti hambanile navo.

²⁹Va na zumba ni nawe ngu livengo, kambe va na teka wotshe mthumo wako, va txi kusiya u di tximbwiri u sa ambala txilo; ku na tumbulwa tingana ta wugango wako, ni wubihi wako, ni wugelegele wako.

³⁰Eto ti na ku mahekela, nguko u mahile wugango ni vamatiko, kambe u ti nyenyezisile ngu sithombe sawe.

³¹U tsimbite ngu nzila ya mkomwako; ngu kumaha keto, ni na ningela digombe dakwe manzani kwako.

³²MKOMA Txizimu a khene: U na sela digombe da mkomwako do tshima ni kuanama; u na va txiruko ni txisekiso; nguko di tate ngutu.

³³U na leva ngutu, ni kupandiseka; digombe da mkomwako Samariya ndigombe da txixamaliso ni xomulo.

³⁴U na di sela koko, u heta, u na phatulela likasani ka dona, kambe u na txukulutela titshumbu tako; nguko ni zivisile, kuwomba MKOMA Txizimu.

³⁵Ngu toneto, MKOMA Txizimu a khene: Ngako u nga ni divala, u ni tshuralela, u na rwala wubihi wako ni wugelegele wako.

³⁶Se MKOMA a to khene kwangu: Awe mwanana wa m'thu, ina u nga lamula Ohola ni Oholibha kani? Va kombe manyala awe koko.

³⁷Nguko va mahile wugango, se ku ni mnoha manzani kwawe; va mahile wugango ni sithombe sawe, ni vanana vale va nga ni velekela, va va pindisile ngu mndiloni, wu txi va tshokomisa.

³⁸Timwani va nga ni mahela ngu tiya: Va nyenyezisile nyumba yangu yo sawuleka, ka dona ditshiku edo, ve nyenyezisa Masabbata angu.

³⁹Ngako va nga phaxela ngu vanana vawe ka sithombe sawe, va ti ti ta ka nyumba yangu yo sawuleka ka dona ditshiku edo, va txi ta yi nyenezisa; kambe va si mahile hagari ka nyumba yangu.

⁴⁰Kambe va tisile vavamna vokari ngu kule; va nga va rumelela mtumi, se vona va nje kuta; u sambile ngu mhaka ya ku va randa, u pendetete maso ako, u txi ti bombisa ngu so tshurisela.

⁴¹Kambe u khalahatshile ha m'bhedhuni ka lisima, eho ku ngadi lulamisetwe meza; se u to ya sanzeka ka yona dibaselo dangu ni mafura angu.

⁴²Ku to pfala dipswi da kutsaka da dibutho, se ku to tiswa vathu va wusiwana kumweko ni madevi a txiwulani; va to va ambeka masinda mawokoni kwawe, ni mibhoti yo phatima ka misungo yawe.

⁴³Sekoko ni to khani ka wule wo kumbela wugangoni: Konkuwa va na ti nyenyezisa nayo, se nene kumweko navo.

⁴⁴Se va to randana nayo, kufana ni loku va txi randana ni digelegele; ngu kumaha keto, va to randana ni Ohola ni Oholibha, i ku vavasikati va nduma yo biha.

⁴⁵Ngu kumaha keto, vavamna vo lulama, va na lamula Ohola ni Oholibha, ngu malamulelo a magelegele, ni ku nga vo lamula vale va theketako mnoha; nguko vona magelegele, kambe mnoha wu manzani kwawe.

⁴⁶Nguko MKOMA Txizimu a khene: Ni na va maha ve lwiswa ngu msengeletano, ni txi va ningela ve thaviswa ditikoni, va txihandwa.

⁴⁷Se msengeletano wu na va balisela ngu marigwi, ni ku va tholetela ngu matxhari; vanana vawe va mazambi ni vamahorana va na dawa, ni tinyumba tawe ti na hisetelwa ngu mndilo.

⁴⁸Ngu kumaha keto, ni na wilisa nduma yo biha amu ditikoni, kasi ku votshe vavasikati va na leka kulondeta nduma yanu yo biha.

⁴⁹Se wubihi wanu mi na wu rwala, mi na rwala ni sionho sa sithombe sanu; kambe mi na tiziva taku ani ngani MKOMA Txizimu.