Read chopi Ezekhiyele 24 Bible Online

Ezekhiyele 24 - chopi bible

Ezekhiyele 24

¹Se di tile kwangu dipswi da MKOMA, ngu dilembe da wutxhanu ni mune, ka mtxima wa wugumi, ka ditshiku da wugumi da mtxima, di txi ta kha dona:

² Awe mwanana wa m'thu, bhala ditina da ditshiku diya, da dona ditshiku diya; nguko mfumeli wa Bhabhilona wa tshuketela Jerusalema ka dona ditshiku diya.

³Kambe maha txidinganiso u txi m'gela tiya: MKOMA Txizimu a khene: Releka khadi ha mndiloni, yi releke u thela mati ka yona,

⁴beta sitxuwu sa sinene sa nyama, minenge ni siphanga u txi yi tata ngu marambu o langelwa.

⁵Ñola txifuyo txatxinene ka mtxhambi, hisa marambu a kona hahatshi ka khadi; yi halise kha kwati, kambe ma na vitwe kha kwati marambu ale.

⁶Ngu kumaha keto, MKOMA a khene: Dikhombo ka didhoropa do theketa mnoha, ka khadi yo nzihala, eyo kunzihala ka kona ku si thavekiko! Thavisa txitxuwu txa nyama ka yona tximwetxo ngu tximwetxo, u nga wise txilo.

⁷Nguko mnoha wa kona wu hagari ka dona; wu nga thelwa txitimwi ka dirigwi, kha wa thekela hahatshi, kasi ku wu si kuletelwi ngu mafu;

⁸kasi ku kwelisa kuhenya, kuteka ku ti photela, ni thete mnoha amuka dirigwi do keleka, kasi ku wu si kuletelwi.

⁹Ngu tona eto, MKOMA a khene: Dikhombo ka didhoropa do theketa mnoha! Kambe ni na dhivela txikho txa hombe.

¹⁰Sengeletela tikhuni tatingi, dhivela mndilo, vitiswa nyama, u txi yi thela sithimbelo, marambu a kona ma na ture.

¹¹Sekoko, u na releka khadi yiya txitimwi ka makala a mndilo na yi si nga ni txilo, kasi ku yi txi hisa, ku txihya kubhirela kule, ku txi mwalala yotshe nzambwa, ku txi guma ku nzihala ka yona.

¹²Ngu thuma ka walo; kha ka thaveka ku nzihala ka khadi; ku nzihala ka yona ku na ya mndiloni.

¹³Amu ka wubihi wako ku ni nduma yo biha, nguko ni ku sawulekisile, aniko awe khwa ti sawulekisa; khu na mbiswa u sawulekiswa ka wubihi wako, ngako ni si leki ku ku henyela.

¹⁴Ani MKOMA ni ti khani: Ti na maheka, ni na ti maha; kha ni na mbi tshumelela msana, kambe kha ni na mbi pimela, hambi kutilaya; madingano ni tinzila tako, ni madingano ni mithumo yako, va na kulamula, kuwomba MKOMA Txizimu.

¹⁵Se di tile kwangu dipswi da MKOMA, di txi ta kha dona:

¹⁶Awe mwanana wa m'thu, wona taku ni na thavisa kunavela ka maso ako ngu ku kupeka, aniko khu na mbi pandiseka, kambe khu na mbi dila, hambi kuwa mirongo yako.

¹⁷Dilisa kutipimela; u nga dilele vafi, ambala txigoko txako, ni tikathula mikondoni kwako; u nga sisale u txi dya sakudya sa vathu.

¹⁸Ni mixo ni wombawombile ka vathu, se ni minova a txi fa msikati wangu. Ni ti mahile ngu mlayo wa kona ni mixo.

¹⁹Se vathu va to kha vona kwangu: Ina khu na mbi hi ninga txhamuselo ya tona ti u mahako kani?

²⁰Se ani ni to khani kwawe: Di tile kwangu dipswi da MKOMA, di txi ta kha dona:

²¹I nda khawe ka nyumba ya ka Israyeli: MKOMA Txizimu a khene: Wonani taku ni na nyenyezisa nyumba yangu yo swuleka, i ku wudhumo wa kutsaniswa kwanu, ni kunavela ka maso anu, ni kutsaka ka mihefemulo yanu; se vanana vanu va mazambi ni vamahorana vale mi nga va siya, va na dawa ngu ditxhari.

²²Kambe mi na mahisa ti ni nga mahisa tona; mi nga sisaleni, kambe mi nga dyeni sakudya sa vathu.

²³Kambe mi na ambala sigoko ka misungo yanu, ni tikathula mikondoni kwanu; kha mi na mbi pandiseka hambi kudila, aniko mi na fela ka wubihi wanu, mi txi dila vamwevo ka vamwani.

²⁴Ngu kumaha keto, Ezekhiyele a na va txikombiso kwanu; mi na maha totshe tile a no va a di mahile; se mbimo yi eto ti no maheka, mi na tiziva taku, ani ngani MKOMA Txizimu.

²⁵Se ngu kwako awe mwanana wa m'thu: Kha ku na mbi maheka taku, ka ditshiku di ni no thavisa mkhokhola wawe, i ku wudhundo wa ku ti bombisa kwawe, ni kunavela ka maso awe, kuwusetwa ka mihefemulo yanu, ni vanana vanu va mazambi ni vamahorana,

²⁶kedo ditshiku, ina a nata wokari kwako, ka vale va no huluka, a txi ta womba tinzeveni kwako tona tiya kani?

²⁷Kedo ditshiku, txi na tuleka txisofu txako ka wule a no huluka; se u na womba-womba, khu na mbi maha txiduma ka mbimo yo lapha; ngu kumaha keto, u na va txixamaliso kwawe, kambe va na tiziva taku ani ngani MKOMA.