Read chopi Ezekhiyele 25 Bible Online

Ezekhiyele 25 - chopi bible

Ezekhiyele 25

¹Se di tile kwangu dipswi da MKOMA, di txi ta kha dona:

²Awe mwanana wa m'thu, thuvikela vanana va ka Amoni, u txi profeta u va wukela.

³Se i nda khawe ka vanana va ka Amoni: Engisani dipswi da MKOMA Txizimu: MKOMA Txizimu a khene: Ngako awe u nga khawe: Yowe! Yowe! Madingano ni nyumba yangu yo sawuleka, mbimo yile yi nga nyenyeziswa; ni mhaka ya ditiko da ka Israyeli, mbimo yile di nga xaselwa; ni mhaka ya va nyumba ya ka Judha, mbimo yile va nga yiswa wukhumbini;

⁴wona taku ni na kuningela uva thomba ya va Wutxani, va na tsanisa mazambo awe kwako, ve aka tinyumba tawe kwako; va na dya mihando yako, ve sela masi ako.

⁵Ni na maha ti to Rabha eva wudyiselo wa makamelu, ni vanana va ka Amoni veva txibala txa tinvuta; kambe mi na tiziva taku ani ngani MKOMA.

⁶Nguko a womba tiya MKOMA Txizimu: U ti woni ti u nga pekisa tona manza, ni kuginga ngu mikondo, ni ti to u tsakile ngu mbilu, ka wotshe wubihi wako, u txi lwisa ditiko da ka Israyeli,

⁷wona taku ni na nawuluta dianza dangu ni txi kulwisa, se ni na kuningela u handwa ngu matiko, ni txi ku dula hagari ka matiko, kambe ni na kuhasamula hagari ka matiko; se u na tiziva ti to ani ngani MKOMA.

⁸MKOMA Txizimu a khene: Ngako Mowabhi ni Seyiri va ku kha vona: Wonani taku nyumba ya ka Judha yi fana ni otshe matiko;

⁹ngu kumaha keto, ani ni na tula ka didhawa da Mowabhi, kukhukhela ka madhoropa, ni ka madhoropa a kule ni mihingano, i ku wudhumo wa ditiko, Bheti-Jesimote, Bhahali-Meyomi, kala Kiriyatayimi;

¹⁰kala ka vanana va Wutxani, ka ditiko da vanana va ka Amoni, adi ni no di ningela di txi maha thomba, kasi ku si alakanywi vanana va ka Amoni hagari ka matiko.

¹¹Kambe ni na maha wulamuli kona Mowabhi, se va ka Mowabhi va na tiziva taku ani, ngani MKOMA.

¹² MKOMA Txizimu a khene: Ngako koko va ka Edhomi va nga ti photela ka nyumba ya ka Judha, va txi ti manisa mnandu ngutu, mbimo yile va nga ti photela kwakwe,

¹³ngu tona eto, MKOMA Txizimu a khene: Ni na nawuluta dianza do wukela Edhomi, kambe ni na dayela kwakwe vathu ni sihari; kambe ni na di maha txiwula, kukhukhela Temani kala Dhedhani, va na dawa ngu ditxhari.

¹⁴Se ni na phota txitimwi ka Edhomi, ngu dianza da vathu vangu va Israyeli; vona va na maha ka Edhomi madingano ni kuhenya kwangu, ni madingano ni txiviti txangu; se va ka Edhomi va na ziva kuphota kwangu, kuwomba MKOMA.

¹⁵MKOMA Txizimu a khene: Nga kule Vafilista va nga phota, va txi phota ngu wubihi wa timbilu tawe, va txi fuvisa ngu wulala wa kwa mbi gwita,

¹⁶ngu tona eto, MKOMA Txizimu a khene: Wona taku na nawuluta dianza dangu ni txi lwisa Vafilista, kambe ni na dayela Vakereti, ni txi khundumusa mule ku salako i ku mabambe ka linene.

¹⁷Se ni na phota ngutu kwawe, ngu sitsayiso sa txiviti, kambe va na tiziva taku ani ngani MKOMA, mbimo yi ni no va ni di photile txitimwi kwawe.