Read chopi Ezekhiyele 26 Bible Online

Ezekhiyele 26 - chopi bible

Ezekhiyele 26

¹Se ku to maheka taku, ngu dilembe da wugumi, ka ditshiku do khata ka mtxima, di txi ta kwangu dipswi da MKOMA, di txi da kha dona:

²Awe mwanana wa m'thu, nga kule Tiro a nga khene ka Jerusalema: Yowe! Yowe! Di fayilwe ditimba da vathu; di rendekete kwangu; ni na talelwa, aniko ene a xasetwe!

³Ngu kumaha keto, MKOMA Txizimu a khene: Wona taku ani na kuwukela awe Tiro, se ni na maha ti to matiko o tala ma txi kulwisa, ku nga linene li guletako mavimbi a lona.

⁴Ona ma na khundumusa maguma a Tiro ni sitezi sa kona, kambe ani ni na hiyela lithulu la kona, ni wumba dirigwi do kenyeka.

⁵Hagari ka linene ku na omiselwa kona tikoka; nguko ani ni zivisile eto, kuwomba MKOMA Txizimu; kambe dona di na handwa ngu matiko.

⁶Se vanana vakwe vamahorana va ku thembweni va na dawa ngu ditxhari; kambe va na tiziva taku ani ngani MKOMA.

⁷Nguko MKOMA Txizimu a khene: Wona taku Tiro ni na mtisela Nebhukodhonosori, mfumeli wa Bhabhilona, kukhukhela Wuphemba, mfumeli wa vafumeli, ni mahantxhi, ni sikotxikani, ni vagadhi va mahantxhi, ni vaheleketi, ni vathu votala ngutu.

⁸Mlala a na daya vanana vako vamahorana ngu ditxhari, vale va manekako thembweni, kambe a na ti mahela txivhikelo masoni kwako, ni ku ti akela sitsaniso, ni ko rithimuka ngu kona.

⁹A na veka so khundumusa maguma ako u txi si wona, ni kukhundumusa sitezi sako ngu matxhapu.

¹⁰A na ku fenengeta ngu lithulu la mahantxhi akwe o tala; maguma ako ma na zinginika ngu sigingo sa mahantxhi, ni sa madangarita, ni sa sikotxikani, mbimo yile mlala a no wulela ngu matimba ako, nga o wulela ngu sike si nga tuletelwa sa didhoropa.

¹¹Ngu sitsendo sa mahantxhi akwe, a na ganyatela totshe tinzila tako; a na daya vathu vako ngu ditxhari, ni tiphande ta mkhokhola wako ti na wa hahatshi.

¹²Se va na pa tithomba tako, va txi handa siya sako, ve khundumusela maguma ako, ni kukhundumusela tinyumba tako ta lisima; ni marigwi ako, ni mapulango ako, se lithulu lako va na li xwaya hagari ka mati.

¹³Se ni na emisa diguwa da tindando tako, ni dipswi da tiharipa tako kha di na mbi pfala kambe.

¹⁴Kambe ni na kumaha dirigwi da kwa mbi keleka; u na va wukhalo wule ku no omisela kona tikoka, khu na mbiswa u txi aketetwa kambe; nguko ani MKOMA ni wombile, kuwomba MKOMA Txizimu.

¹⁵MKOMA Txizimu a khene ka Tiro: Ina sitondolo kha si na mbi deka-deka ngu diguwa da kuwa kwako, mbimo yile va no keta vale va no dayelwa, mbimo yile ya kudayelwa ko xamalisa hagari kwako kani?

¹⁶Se vathangeli va lineneni va na txhika ngu situluni kwawe ka wukoma, kambe va na thavisa sifenengelo sawe, ve ambula simaha sawe so lukelwa; va na ambekwa kudhudhumela, va khalahatsha ha mafuni, va txi dhudhumela yotshe mbimo; kambe ngu mhaka yako, va na xamala.

¹⁷Se va na kudila va txi kha vona: Eto u nga lovisa tona awe didhoropa do akwa kwati do tshura. Awe u ngadi mtamo lineneni; awe ni vaaki vako, mi nga dhukisa votshe vale va nga kuendela!

¹⁸Konkuwa, si na zinginika sitondolo ngu ditshiku da kuwa kwako; sitondolo si ku lineneni, si na dhungeka ngu kukhukha kwako.

¹⁹Nguko MKOMA Txizimu a khene: Mbimo yi ni no kumaha didhoropa da dirumbi, nga madhoropa ale ma kuwalo vo zumba, aha ni no maha kuhokoma kwako, se mati o tala ma txi kumita,

²⁰sekoko ni na kureleta ni vale va relelako diphalani, ka vathu va kale, ni txi ya kuotelisa ka makhalo a hahatshi ngutu mafuni, ka makhalo a siwula sa kale, ni vale va relelako diphalani, kasi ku ku si maneki vo zumba kwako; kambe ni na veka wudhundo ka mafu a vale vo hanya.

²¹Ni na kumaha txixamaliso txa hombe, kambe khu na mbi va i di awe kambe; mbimo yi va no kulava, khu na mbi ngadi u manwa kambe, kuwomba MKOMA Txizimu.