Read chopi Ezekhiyele 27 Bible Online

Ezekhiyele 27 - chopi bible

Ezekhiyele 27

¹Se di tile kwangu dipswi da MKOMA, di txi ta kha dona:

²Awe koko mwanana wa m'thu, wusa txidilo txo dila Tiro.

³Se womba ka Tiro, wule a zumbako ka tinzila ta lineneni, e thumisana ni vathu ka sitondolo sasingi, u txi khawe: MKOMA Txizimu a khene: Awe Tiro u khawe: Ani ni tshurile ko hetelela.

⁴Mihingano yako yi hagari ka tinene; avale va nga kuaka, va ku tshurisete kha kwati ngutu.

⁵Va mahetete otshe mapulango a Seniri; va ku mahete tisika ngu mikedhari ya Libhanoni.

⁶Madhavi ako ngo mahwa ngu mikusu ya Bhasani; Vasiriya va ku tshurisete ngu makwasa a tinzofu ta sitondoloni ka Ketiyini.

⁷M'jiyo wako wo lukwa i ti ti wa disilika da Egipta, kasi ku wu maha ditanga; da mkuxe ni kubhilivila, sitondoloni ka Elisi i ti ti didhamba dako.

⁸U tsimbitisetwe tingalava ngu vazumbi va Sidhoni ni va Arivhadhe; va rumi va tingalava tako awe Tiro ngu titxhari.

⁹Madhota a Gebha ni titxhari ta kona, ngu vona va nga txi lemetela tifa; sotshe sitimela sa lineneni ni vatsimbitisi va sona, va ti ti maha mabhindu ako.

¹⁰Vapersa ni Validhiyo, ni va Pute, i ti ti masotxhwa ako; sitxhangu ni sigoko va hayekile kwako, va ku tshurisete ngu sona.

¹¹Vanana va Arivhadhe ni dibutho dako va ti ti randete maguma, se va ka Gamadhi va ti ti sitezi kwako; va to hayeka sitxhangu sawe ka maguma ako; vona va to ku tshurisela ngu kuhetelela.

¹²Tarxixi a ti ti thumisana ni nawe, ngu mhaka ya kutala ka totshe tixaka ta tithomba; ni silivhela, ni simbi, mthovhu ni simbi yo nemela ngutu mi ti ti thumisana ka makhalo ako.

¹³Javhani, Tubhali, ni Meseki i ti ti vaxavi kwako; mi xaviselani tikhumbi ni siya sa koporo.

¹⁴Va ti ti tisa mahantxhi ni vagadhi va ona ka makhalo ako, ngu tinyumbani ka Togarima.

¹⁵Vanana va Dhedhani i ti ti vaxavi vako; sitondolo sasingi i ti ti makhalo a wukwewu wako; sitondolo sasingi i ti ti dibhindu da manza ako; va ti ti kuninga siningo sa makwasa a tinzofu ni mapulango a mtima.

¹⁶Siriya a ti ti xaviselana ni nawe ngu mhaka ya kutala ka si u nga si thuma; sa esmeraldha, so bhilivila, ni so lukwa, ni sa disilika, ni korali, ni kristali, va txi si tisa ka makhalo ako.

¹⁷Judha ni ditiko da Israyeli i ti ti vaxavi kwako, va fulaho yota ngu Miniti, ni mpupu, ni wulombe, ni mtona, ni sa kutola, va xaviselani ni nawe

¹⁸Dhamasku a xaviselani ni nawe ngu mhaka ya kutala ka si u nga si thuma, ngu mhaka ya kutala ka totshe tixaka ta tithomba, ni vhinya ya Helibhoni, ni matoya o basa.

¹⁹Ni ene Dhani ni Javhani, va ti ti pfhukisa ngu ka makhalo ako; ka wuxavisi wako ku ti ti wulela simbi yo swilitelwa, makamba ni titshava to bhumula.

²⁰Dhedhani a ti ti xaviselana ni nawe ngu tinguwo ta lisima to veka ha ka txikotxikani.

²¹Arabhiya ni otshe madhota a Kedhari, i ti ti vona manza a wuxavisi wako, ngu tinvuta, ni tihamba, ni vamabhongwe; ka soneso va ti ti xaviselana ni nawe.

²²Vanyamabhindu va Sabha ni Rama, i ti ti vona vaxavisi vako; ka sotshe sile so bhumula ngutu, ni ka otshe marigwi a lisima, kambe ngu nzalama va ti ti xavisa ka makhalo ako.

²³Harani, ni Kane, ni Edheni, i ku vanyamabhindu va Sabha, Asuri ni Kilimadhe, va ti ti xaviselana ni nawe.

²⁴Avava i ti ti vaxavisi vako ka sotshe siya sako, sibubu sa simaha sa sinene ngutu, ni so lukwa, ni siya so veka simaha sa lisima, si di sungeletwe ngu tingoti, ni so mahwa ngu mikedhari.

²⁵Sitimela sa Tarxixi si ti ti longolokisana ngu mhaka ya wukwewu wako. Ngu mhaka ya wukwewu wako; se u ti tatete ni ku ti dhumisa hagari ka tinene.

²⁶Vatsimbitisi vako va ku tsulisile ka mati a hombe; moya wa wutxani wu ku hetile mtamo hagari ka tinene.

²⁷Tithomba tako, makhalo ako, dibhindu dako, vatsimbitisi vako, ni varumi va kona, avale vo lemetela tifa, ni vamahi va mabhindu ako, ni otshe masotxhwa ako, ale ma ku kwako, ni wotshe msengeletano wako, wu ku hagari kwako, va na bhwabhwamela lineneni ngu ditshiku da kuwa kwako.

²⁸Ngu diguwa da kuketa ka varumi vako, va na dhudhumela vatsimbitisi.

²⁹Se votshe vañoli va reme, vatsimbitisi ni votshe varumi va lineneni, va na txhika ngu sitimelani kwawe, ve ta maneka ha mafuni.

³⁰Va na pfalisa huwa yawe kwako, ve dila ngu kupandiseka ka hombe, ve ti xwayela lithulu ha msungo, se va na pulukuta ha ka dikhuma.

³¹Kambe va na yola misungo ngu mhaka yako, ve ambala masaka va na dila kwako ngu kupandiseka ka moya, ngu kudila ka hombe.

³²Se va na wusa txidilo txitimwi kwako kudilani kwawe, va na dila kwako va txi kha vona: I mani a nga nga fana ni Tiro, awu a nga malatwa hagari ka linene kani?

³³Mbimo yile simaha sako si nga ti ti tsuliswa ngu tineneni, u khurisile vathu votala; ngu kutala ka tithomba tako ni mabhindu ako, u humelelisile vafumeli va ha mafuni.

³⁴Ka mbimo yile u nga phatulelwa tineneni, hahatshi ngutu ka mati, ma wite mabhindu ako ni msengeletano wotshe hagari kwako.

³⁵Votshe vazumbi va sitondoloni va to tala ngu kuxamala ngu mhaka yako; se vafumeli vawe va to dhudhumela ngutu, se tikhohe tawe ti to thuvika.

³⁶Vanyamabhindu hagari ka vathu va to kuvetela miloti; awe u to maha txixamaliso ta hombe, kambe khu na mbiswa kambe u maneka ka yotshe mbimo.