Read chopi Ezekhiyele 28 Bible Online

Ezekhiyele 28 - chopi bible

Ezekhiyele 28

¹Se di tile kwangu dipswi da MKOMA, di txi ta kha dona:

²Awe mwanana wa m'thu, gela mthangeli wa Tiro ku khawe: MKOMA Txizimu a khene: Nguko mbilu yako yi ti guletile u txi khawe: Ani ni Txizimu, ni khalahatshile ha txituluni ka Txizimu, hagari ka tinene (na u di m'thu, khu nga Txizimu), kambe u themba mbilu yako ku nga yova mbilu ya Txizimu;

³Wona taku u txharihile kupinda Dhaniyele: Kha ku na txihunja ni txa tximwetxo txo timeleka kwako.

⁴Mtamo wako u wu mani ngu wutxhari wako ni mapimo ako, kambe u mani nzalama ni silivhela txisangalani kwako.

⁵Mtamo wako u wu engetete ngu kuanama ka wukwewu wako; se u guletile mbilu yako ngu mhaka ya mtamo wako.

⁶Ngu kumaha keto, MKOMA Txizimu a khene: U themba mbilu yako koko, ku nga yova mbilu ya Txizimu.

⁷Wona taku, ni na tisa vamatiko txitimwi kwako, avale vo karata ngutu hagari ka matiko, avale va no swomola matxhari awe, ve wukela kutshura ka wutxhari wako, kambe va na nzihalisa kuphatima kwako.

⁸Va na kureleta diphalani, u na fa ngu felo ya vale va dawako hagari ka tinene.

⁹Kambe u na khawe masoni ka wule a no kudaya: Ani ni Txizimu kani? Kuve awe u m'thu, khu nga Txizimu, manzani ka wule a ku dayako.

¹⁰U na fa ngu felo ya vanyamakhutu, manzani ka vamatiko, nguko ani ni wombile, kuwomba MKOMA Txizimu.

¹¹Di tile kambe kwangu dipswi da MKOMA, di txi ta kha dona:

¹²Awe mwanana wa m'thu, wusa txidilo txitimwi ka mfumeli wa Tiro, u txi m'gela ku khawe: MKOMA Txizimu a khene: Awe mfumeli u lipimo lo hetiseka, wo tala ngu wutxhari ni kutshura ko hetiseka.

¹³U ti ti maneka Edheni, thembweni ka Txizimu; u fenengetwa ngu otshe marigwi a lisima: I ku sardhoni, topazi, dhayimani, turkeza, onekisi, jasiperi, safira, karbhukulu, esmeraldha, ni nzalama, i ku mthumo wa tingoma tako ni makhombela ako, si ti ti kwako; si nga lulamiselwa ka ditshiku dile u nga vangwa ngu dona.

¹⁴U ti ti dikerubhima do totwa kasi kuvhikela, kambe ni kuvekile; u ti ti mmangoni ko sawuleka ka Txizimu, u ti ti tsimbila hagari ka marigwi o phatimisa ku nga mndilo.

¹⁵U ti ti hetisekile ka matsimbilelo ako kukhukhela ka ditshiku dile u nga vangwa ngu dona, kala ku ku txi ta maneka wubihi kwako.

¹⁶Ngu kutala ka wukwewu wako, mndani kwako ku to tala ngu timboyinga, se u txi onha; ngu kumaha keto ni na kutshotsha u dinyenyezile hahanze ka mmango wa Txizimu; kambe ni na kulovisa, awe dikerubhima do vhikela, hagari ka marigwi o phatimisa ku nga mndilo.

¹⁷Mbilu yako yi gulekile ngu mhaka ya kutshura kwako, u onhile wutxhari wako ngu mhaka ya kuphatima kwako, ni ku tshotshile ha mafuni, ni kuvekile masoni ka vafumeli, kasi kuva txi kuwonetela.

¹⁸Ngu mhaka ya kutala ka wubihi wako, ni wukwewu wako wo dyelela u nyenyezisile tinyumba tako to sawuleka: Ani koko ni humisile mndilo ngu hagari kwako wu txi kutshokomisa, kambe ni kumahile dikhuma txitimwi ka mafu, masoni ka votshe vale va kuwonako.

¹⁹Votshe vale va ku zivako hagari ka vathu, va ku kuxamala: U ti mahile txixamaliso txa hombe, khu na mbi nga ngadi u diho kambe.

²⁰Se di tile kwangu dipswi da MKOMA, di txi ta kha dona:

²¹Awe mwanana wa m'thu, thuvikela Sidhoni, profeta u txi muwukela.

²²Se i nda khawe: MKOMA Txizimu a khene: Wona taku na kuwukela awe Sidhoni, kambe ni na dhumiswa hagari kwako, mi na tiziva taku ani ngani MKOMA, mbimo yi ni no mlamula, ni txi ti sawulekisa kwakwe.

²³Nguko ni na rumela mtungu ka dona, ni mnoha tinzilani ka dona, se avale vo dayelwa va na wetetela hagari ka dona, ngu ditxhari di di mrandelako; se va na tiziva taku ani ngani MKOMA.

²⁴Se nyumba ya ka Israyeli, kha yi na mbiswa kambe yi di ni mpa wa ku yi tholetela, hambi mpa wo pfisa kupanda, ka ni wihi wa wule a va pelako madhawani kwawe: Va na tiziva taku ani ngani MKOMA Txizimu.

²⁵Ngu kumaha keto, MKOMA Txizimu a khene: Mbimo yile ni no sengeleta va nyumba ya ka Israyeli hagari ka matiko, ale va nga hangalaka ka ona, se ni txi ti sawulekisa hagari kwawe, masoni ka matiko, sekoko va na zumba ka ditiko dawe, dile ni nga ninga txithumi txangu Jakobe.

²⁶Se va na zumba ka dona ngu kutsana, va na aka tinyumba ni kuphaya mivhinya: Ina, va na zumba ngu kutsana, mbimo yile ni no lamula votshe vale va va pelako madhawani kwawe; va na tiziva taku ani ngani MKOMA, Txizimu txawe.