Read chopi Ezekhiyele 3 Bible Online

Ezekhiyele 3 - chopi bible

Ezekhiyele 3

¹Msana keto, a to khene kwangu: Awe mwanana wa m'thu, dyana si u si manako; dyana dibhuku diya do petelwa, kambe tusla u ya womba ka nyumba ya ka Israyeli.

²Sekoko ni to tula txisofu txangu, se a to ni dyisa dibhuku do petelwa.

³Se a to khene kwangu: Awe mwanana wa m'thu, dyisa mrumbu wako, u tata disusu ngu dibhuku diya do petelwa ni ku ningako. Sekoko ni to didya, di ti ti tshambisa kufana ni wulombe.

⁴Se a to ni gela ku khene: Awe mwanana wa m'thu, tsula u ya wulela ka nyumba ya ka Israyeli, u txi ya va gela timhaka tangu.

⁵Nguko awe khu rumwi ka vathu va mawombawombelo o hambana, mwendo va lidimi lo karata, aniko ka nyumba ya ka Israyeli;

⁶hi nga ka vathu votala va mawombawombelo o hambana hambi tidimi to karata, va ku khu na kutipima timhaka ta kona; i di ku ni to kurumela ka vathu vo nga evo, ngu ditshuri va ndi na kuengisa.

⁷Aniko nyumba ya ka Israyeli, kha yi na mbi ti lava ku kuengisa, nguko kha va lavi ku ni engisa ani; nguko yotshe nyumba ya ka Israyeli yi ni khohe yo eyisa ni mbilu yo banga.

⁸Wona taku ni tsanisile khohe yako kupinda yawe, ni bangisa mbanza yako kupinda mbanza yawe.

⁹Mbanza yako ni yi mahile yi fana ni dhayimani, yi bangi ngutu kupinda dirigwi; u nga va thave koko, hambi ku tunywa ngu tikhohe tawe, nguko mba nyumba yo eyisa.

¹⁰A ni gete kambe ku khene: Awe mwanana wa m'thu, veka mbiluni totshe timhaka tangu, ati ni no kugela, kambe u txi ti pfisisa ngu tinzeve tako.

¹¹Tsula koko ka vale va ku wukhumbini, ka vanana va vathu va ka kwanu, u na ya womba-womba kwawe, u txi khawe: A womba tiya MKOMA Txizimu, mwendo va na tiengisa mwendo kha va na mbi tiengisa.

¹²Se Moya wu to ni gula, nipfa dipswi msana kwangu, da kubhonga ngutu, di txi kha dona: Wu na kateke wudhumo wa MKOMA, ha wukhaloni kwakwe.

¹³Se ni to pfa diguwa da tibhapi ta sihari, ti nga ti ti gwesana, ni diguwa da madangarita ngu masoni ka sona, ni dipswi da kudhinda ka hombe.

¹⁴Sekoko Moya wu to ni gula wu txi ni teka; se ni to tsula ni di henyile ngutu, ku txi tura moya wangu; aniko dianza da MKOMA di ti ti ni mtamo txitimwi kwangu.

¹⁵Se ni to ta ka vale va wukhumbini, kona Teli-Abhibhe, va nga ti ti zumba hafuhi ni mnambo wa Kebhari, kambe ani ni ti ti zumba kona eho va nga ti zumba kona; se ni zumbile mtxhanu wa masiku ni mambidi, ni xamala, ni txi kayee, hagari kwawe.

¹⁶Se ku to maheka taku, ku di gumile mtxhanu wa masiku ni mambidi, yi tile mhaka ya MKOMA kwangu, yi txi kha yona:

¹⁷Awe mwanana wa m'thu, ni kuvekile kuve muwoneleli wa nyumba ya ka Israyeli; se awe u na pfa dipswi da txisofu txangu, se u na va txharihisa wukhaloni kwangu.

¹⁸Ngako ni txi khani ka wa kubiha: Ngu ditshuri u na fa; u si mtxharihisi, u si wombawombi, u txharihisa wa kubiha, ka nzila yakwe yo biha, kasi kuhanyisa wutomi wakwe, m'bihi wule a na fa ka wubihi wakwe, aniko mnoha wakwe, ni na wu lava manzani kwako.

¹⁹Aniko u txi txharihisa m'bihi, se ene asi hunduluki ka wubihi wakwe, ni ka nzila yakwe yo biha, a na fa ka wubihi wakwe, aniko awe u txhatxhisile moya wako.

²⁰Kufana ni toneto, ngako m'thu wo lulama a txi huma ka nzila yakwe yo lulama, e maha to biha, se ani ni veka txa ku mu humba masoni kwakwe, a na fa; ngako u sa mtxharihisa, a na fa ka wubihi wakwe, se a tile to lulama a nga maha, kha ti na mbi alakanywa, aniko mnoha wakwe, ni na wu lava manzani kwako.

²¹Kambe ngako u txi txharihisa m'thu wo lulama, kasi ku awu wo lulama asi onhi, se ene asi onhi, ngu ditshuri a na hanya, nguko a txharihisilwe; se awe u txhatxhisile moya wako.

²²Se kona hale dianza da MKOMA di ti txitimwi kwangu, e ni gela ku khene: Khukha u tsula mkovani, ni na ya womba-womba kona ni nawe.

²³Se ni to khukha ni tsula mkovani, wona taku koneyo ku ti ni wudhundo wa MKOMA, wo fana ni wudhundo wule ni nga wu wona hafuni ni mnambo wa Kebhari; se ni to wa ngu khohe.

²⁴Sekoko Moya wu to wulela kwangu, wu txi ni emisa, se a to womba-womba ni nani a txi khene: Wulela nyumbani kwako, u txi ti vhalela.

²⁵Nguko awe mwanana wa m'thu, va na ku hariketela tingoti, va txi ku sungelela ngu tona; khu na mbi khukha koko hagari kwawe.

²⁶Se ani ni na maha ti to lidimi lako, li txi namara mkanani kwako, u va txiduma, khu na mbi va wamwamna wule wa ku va txharihisa; nguko mba nyumba yo eyisa.

²⁷Aniko ngako ni txi womba-womba ni nawe, ni na tula txisofu txako, se u na va gela ku khawe: MKOMA a womba tiya: Awu a engisako a na engise, awu asi laviko kuengisa a na leke; nguko vona mba nyumba yo eyisa.