Read chopi Ezekhiyele 30 Bible Online

Ezekhiyele 30 - chopi bible

Ezekhiyele 30

¹Se di tile kwangu dipswi da MKOMA, di txi ta kha dona:

²Awe mwanana wa m'thu, profeta u txi khawe: MKOMA Txizimu a khene: Dilani mi txi khanu: Yowe! Ditshiku dileya!

³Nguko di hafuhi ditshiku da MKOMA, ditshiku da marefu; i nava ditshiku da vamatiko.

⁴Se ku nata ditxhari ka Egipta, kambe Etiyopiya ku nava ni kupandiseka ka hombe, mbimo yile va no wa vale va no dayetelwa Egipta; ni kutekwa dibutho, ku txi khundumuswa sitsaniso sa kona.

⁵Etiyopiya, ni Pute, ni Ludhe, ni votshe vathu vale va nga patanelana, ni Kubhe, ni votshe vanana va ditiko da txitumelelano, va na wiswa kumweko nayo ngu ditxhari.

⁶MKOMA a womba tiya: Va na wa ni vona vale va emelako Egipta, se matshanza a mtamo wawe ma na boxa; kukhukhela Migidholi kala Seveni, eyo va na wiswa ngu ditxhari, kuwomba MKOMA Txizimu:

⁷Va nava marumbi hagari ka matiko ale i ku marumbi; se madhoropa awe ma nava hagari ka madhoropa a txiwula.

⁸Se va na tiziva taku ani ngani MKOMA, aha ni no hisa Egipta ngu mndilo, va txi fuviswa votshe vale va nga ti ti m'vhunetela.

⁹Ka ditshiku dileya, ku na khukha mitumi masoni kwangu ngu sitimela sa matini, kuya dhukisa Etiyopiya, ka mihoni yakwe; ku nava ni kupandiseka ka hombe, ku nga ka ditshiku da Egipta; wonani taku data.

¹⁰MKOMA Txizimu a khene: Ani koko, ni na fuvisa dibutho da Egipta, ngu dianza da Nebhukodhonosori, mfumeli wa Bhabhilona.

¹¹Ene kumweko ni vathu vakwe, i ku va mtamo ngutu hagari ka matiko, va na ya khundumusa ditiko da Egipta; va na swomola matxhari awe, ve wukela Egipta, ditiko di na tala ngu sirumbi.

¹²Kambe ni na omisa minambo, ni xavisa ditiko, ni txi di ningela manzani ka va tshofu, se ni na fuvisa ditiko ni mipfuno ya dona, ngu manza a vamatiko; ani MKOMA ni wombile.

¹³MKOMA Txizimu a khene: Kambe ni na khundumusela sithombe, ni kufuvisa sifananiso sa Nofe; kha ku na mbi ngadi kuva ni mthangeli wa ditiko da Egipta; ni na veka kuthava ditikoni ka Egipta.

¹⁴Se Patrosi a na va dirumbi, ni na hisa Zowani, ni na lamula Nomi.

¹⁵Ni na tshakunuta kuhenya kwangu txitimwi ka Simi, i ku mtamo wa Egipta, ni fuvisa dibutho da Nomi.

¹⁶Se ni na dhivela mndilo Egipta; Simi a na pfa kupanda ka hombe, Nomi a na bhandiselwa, Nofe a na va ni kuxaniseka ditshiku ni ditshiku.

¹⁷Majaha a Avheni ni a Pi-Bheseti va na dawa ngu ditxhari, se madhoropa awa ma nava wukhumbini.

¹⁸Aniya Tafinesi ditshiku di na phuma, mbimo yi ni no funyeletela makange a Egipta, me guma matshanza a mtamo wakwe; direfu dokari di na fenengeta Egipta, se vanana vakwe vamahorana va na va wukhumbini.

¹⁹Ngu tona eto, ni na lamula kona Egipta, va na tiziva taku ani ngani MKOMA.

²⁰Se ku to maheka taku ka dilembe da wugumi ni dimwedo, ka mtxima wo khata, ngu ditshiku da mtxhanu ni mambidi ka mtxima, di to ta kwangu dipswi da MKOMA di txi ta kha dona:

²¹Awe mwanana wa m'thu, ani ni funyile diwoko da Faro, mfumeli wa Egipta, wona taku kha va na mbi mthela mrende, hambi ku msungelela mabhanditxhi, hambi ku mtsanisa, kasi ku e ñola ditxhari.

²²Ngu tona eto, MKOMA Txizimu a khene: Wona taku ani na wukela Faro, mfumeli wa Egipta, se ni na funya mawoko akwe, adile da dinene ni dile do funywa, kambe ni na wisa dianza dakwe ngu ditxhari.

²³Ni na hangalasa Vaegipta hagari ka matiko, ni txi va hangalasa ha mafuni.

²⁴Ni na ninga mtamo ka mfumeli wa Bhabhilona, se ni na veka ditxhari dangu manzani kwakwe; aniko ni na funya mawoko a Faro, se a na ketisa ku nga wule a dawako.

²⁵Ni na guleta mawoko a mfumeli wa Bhabhilona, aniko mawoko a Faro manawa; se va na tiziva taku ani ngani MKOMA, mbimo yi ni no veka ditxhari dangu manzani ka mfumeli wa Bhabhilona, se ene a txi di yisa txitimwi ka ditiko da Egipta.

²⁶Kambe ni na hangalasa Vaegipta hagari ka matiko, ni txi va hangalasa ha mafuni; ngu tona eto, va na tiziva taku ani ngani MKOMA.