Read chopi Ezekhiyele 31 Bible Online

Ezekhiyele 31 - chopi bible

Ezekhiyele 31

¹Se ku to maheka taku ka dilembe da wugumi ni dimwedo, ka mtxima wa wuraru, ngu ditshiku do khata da mtxima, di txita kwangu dipswi da MKOMA di txi ta kha dona:

²Awe mwanana wa m'thu, gela Faro, mfumeli wa Egipta, ni dibutho dakwe, ku khawe: U fana ni mani awe ka wuhombe wako kani?

³Wona taku Asiriya i ti ti mkedhari Libhanoni, wa madhavi o tshura, a mitsudi ya sididi, na ma di laphile, tshoka ya kona yi ti ti hagari ka madhavi o txhuma.

⁴Mati ma wu milisile, wu txi kuliswa ngu kuhokoma, mati a kona ma ti ti khulunga ma txi ya ka siyalo sa wona, ma txi dhoda milonga yo theletela ka yotshe mindonga ya thembweni.

⁵Ngu mhaka yeto, wu to lapha ngutu kupinda yotshe mindonga ya txitinga, se madhavi a kona ma to dhimba, ni tindonga ta kona, ngu kutala ka mati.

⁶Sotshe sinyana sa nzuma si to aka sisaka ka madhavi a wona, ni sotshe sihari sa txitinga si to velekela hahatshi ka madhavi a wona, Se votshe vathu va to khalahatshela ka mtsudi wa wona.

⁷I ti o tshura ngutu, madhavi a kona amangi, nguko mikoloti ya wona yi ti hafuhi ni mati.

⁸ Mikedhari yi ti si sikoti ku wu phumelisa thembweni ka Txizimu, misululwani yi ti si dingana ni madhavi a wona, ni mikhungu yi ti si fani ni madhavi a wona amaphya; ku ti si nga ni mndonga wo tshura kufana nawo, thembweni ka Txizimu.

⁹Ni wu tshurisete kona mu ka kutala ka madhavi a wona; ni yotshe mindonga ya Edheni, yi nga ti ti thembweni ka Txizimu, yi wu bavete.

¹⁰Ngu tona eto, MKOMA Txizimu a khene: Ngako u nga guleka ngu txiemo, tshoka yako yi txi lapha hagari ka madhavi o txhuma, se mbilu yako yi txi ti kulisa ngu kulapheko,

¹¹ani ni na mningela ka dianza da mtamo ngutu hagari ka matiko, di na mmahela ti ti m'dinganako ngu mhaka ya wubihi wakwe; ni na mrinza hahanze.

¹²Se vamatiko, avale vo karata ngutu hagari ka matiko, va to wu wila va txi wu leka; madhavi a kona ma wite txitimwi ka mmango, ni ka yotshe mikova, aale ma thungako ma phatuletwe, ka sotshe sinambwana sa ditiko; se votshe vathu va ha mafuni va to khukha ka mtsudi wa kona.

¹³Sotshe sinyana sa nzuma si ti ti zumba txitimwi ka matshanzu a wona, se sotshe sihari sa txitinga si ti ti ngu hahatshi ka madhavi;

¹⁴kasi ku yotshe mindonga ya hafuhi ni mati, yi si ti guleti ngu mhaka ya txiemo, hambi kuhumisa tshoka hagari ka madhavi o txhuma, ni ale ma selako mati, ma si ti thembiseli mapune, ngu mhaka ya kulapha ka ona; nguko otshe ma dingana kufa, kala hahatshi ngutu ka mafu, hagari ka vanana va vathu, ni vale va relelako diphalani.

¹⁵MKOMA Txizimu a khene: Ka ditshiku dile wu nga relela mndiloni, ni mahile ti to ku txi va ni txidilo; ni to fenengeta kuhokoma, ngu mhaka ya wona, ni ñote milonga ya mnambo yi txi ema; kambe ni fenengetile Libhanoni ngu mtima ngu mhaka ya wona, se yotshe mindonga ya txitinga, ngu mhaka ya wona, yi fite.

¹⁶Ngu diguwa da kuwa ka wona, ni zinginisile matiko, mbimo yile ni nga wu releta mndiloni, ni vale va relelako diphalani; se yotshe mindonga ya Edheni, ni mindonga ya yinene ya Libhanoni, votshe vale va selako mati hahatshi ngutu ka mafu va to thavelelwa.

¹⁷Ni yona yiya kumweko nawo, yi na relelela mndiloni, kuya patana ni vale va nga dayelwa ngu ditxhari; ina, vale i nga ti diwoko da wona, va nga ti khalahatshile mtsudini, hagari ka matiko.

¹⁸U nga fana ni mani ngu wudhumo ni wuhombe hagari ka mindonga ya Edheni kani? Hambi keto, u na relelela ni mindonga ya Edheni hahatshi ngutu ka mafu; hagari ka makhutu u na otela ni vale va nga dayelwa ngu ditxhari; awuwa i Faro, ni dotshe dibutho dakwe, kuwomba MKOMA Txizimu.