Read chopi Ezekhiyele 32 Bible Online

Ezekhiyele 32 - chopi bible

Ezekhiyele 32

¹Ku to maheka taku, ngu dilembe da digumi ni mambidi, ka mtxima wa wugumi ni yimbidi, ka ditshiku do khata da mtxima, di tile kwangu dipswi da MKOMA di txi kha dona:

²Awe mwanana wa m'thu, wusa txidilo txitimwi ka Faro, mfumeli wa Egipta, u txi khawe: U ti ti fana ni txingonyamwana ka matiko, kambe awe u ti ti nga ngwenya tineneni, u txi bhanda minambo yako, ni ku vhilusa mati ngu mikondo yako, se u txi nzihatisa minambo yako.

³MKOMA Txizimu a khene: Ngu tona eto, ni na gwimba likoka langu txitimwi kwako ni msengeletano wa vathu votala, va na ku kwelisa ka likoka langu.

⁴Sekoko ni na kuleka ha mafuni; ni txi kurinza txitimwi ka mafu, sinyana sotshe sa nzuma si na zumba kwako; ni sotshe sihari sa ha mafuni, si na khura ngu ngawe.

⁵Se ni na veka tinyama tako txitimwi ka mimango, ni txi tata mikova ngu kulapha kwako.

⁶Se mafu ale u sambelako ka ona, ni na ma theletela ngu mnoha wako kala mimangoni, se milonga yi na tala ngu ngawe.

⁷ Aha ni no ku tima, ni fenengeta nzuma, ni txi phumisa tinyeleti ta kona; ditambo ni na di tsivela ngu direfu, se mtima kha wu na mbi woninga.

⁸Otshe malambu o woninga a nzumani ni na ma phumisa kwako, ni txi tisa txidema txitimwi ka mafu ako, kuwomba MKOMA Txizimu.

⁹Kambe ni na dayisa timbilu ta vathu votala, mbimo yile ni no kukhundumusa hagari ka matiko, ka matiko ale u nga mbi ma ziva.

¹⁰Se ni na maha ti to vathu votala va txi kuxamala, ni vafumeli vawe va txi dhudhumela ngutu, mbimo yi ni no tshawunyetisa ditxhari dangu khoheni kwako; va na dhudhumela yotshe mbimo, mmweyo ni mmweyo ngu mhaka ya wutomi wakwe, ka ditshiku da kuwa kwako.

¹¹Nguko MKOMA Txizimu a khene: Ditxhari da mfumeli wa Bhabhilona di nata txitimwi kwako.

¹²Ni na wisa dibutho ngu matxhari a tindena, i ku vale va tshofu ngutu va matiko; kambe vona va na khundumusa kutikulisa ka Egipta, se dotshe dibutho di na mwalala.

¹³Ni na lovisa sotshe sihari ka mati o tala; mkondo ni wawumwewo wa m'thu kha wu na mbi ma vhilusa, hambi sitsendo sa sihari.

¹⁴Ni na tengisa mati, ni maha minambo yawe yi khulunga kufana ni mtona, kuwomba MKOMA Txizimu.

¹⁵Mbimo yi ni no maha taku ditiko da Egipta di va dirumbi, di maha txisapa txo gwita, ni dayela votshe vale va zumbako ka dona, sekoko va na tiziva ti to ani ngani MKOMA.

¹⁶Aawa madilelo ya va no dila ngu ona; vanana vamahorana va vamatiko va na m'dila; ku na dilwa Egipta ni dibutho dakwe, kuwomba MKOMA Txizimu.

¹⁷Se ku to maheka taku, ngu dilembe da wugumi ni mambidi, ka ditshiku da digumi ni mtxhanu ka mtxima, di tile kwangu dipswi da MKOMA, di txi ta kha dona:

¹⁸Awe mwanana wa m'thu, peka huwa ngu dibutho da Egipta, u txi di releta, dona ni vanana vamahorana va matiko a mtamo, va txi ya hahatshi ngutu ka mafu, ni vale va relelako diphalani.

¹⁹U pinda mani ngu kutshura kani? Relela u txi ya otela ka vale va makhutu.

²⁰Va na wa hagari ka vale va nga dawa ngu ditxhari; a ningetwe ka ditxhari; mndindeni ene ni dotshe dibutho dakwe.

²¹Avale va mtamo ngutu hagari ka tindena, va na mu angula va di hagari ka mndilo, kumweko ni vale va mu emelako: Va relete, va koneyo vale va makhutu, va datwe ngu ditxhari.

²²Koneyo waho Asuri ni dibutho dakwe; madhawani kwakwe ku ni mathitha awe; votshe vale va to dawa ngu ditxhari va txi wa.

²³Mayiva awe ma vekilwe hahatshi ngutu ka diphala, se dibutho dakwe di madhawani kwakwe; votshe va to dayelwa, ve wiswa ngu ditxhari, avale va nga ti dhukisile ditikoni ka vale vo hanya.

²⁴Koneyo waho Elame ni dotshe dibutho dakwe, di nga randela diyiva dakwe; votshe va to dayelwa, va txi wiswa ngu ditxhari; va relete hahatshi ngutu ka mafu; va wusile kuthava ha mafuni ka vo hanya, ve rwala tingana tawe kumweko ni vale va nga relela diphalani.

²⁵Hagari ka vale va nga dayelwa, va m'vekete m'bhedhu hagari ka dotshe dibutho dakwe; madhawani kwakwe ku ni mathitha awe; votshe makhutu, va nga dayelwa ngu ditxhari; nguko va wusile kuthava mafuni ka vo hanya, kambe va rwate tingana tawe kumweko ni vale va nga relela diphalani; a to vekwa hagari ka vale vo dayelwa.

²⁶Koneyo waho Meseki ni Tubhali, ni dotshe dibutho dakwe; madhawani kwawe ku ni mathitha awe; votshelele makhutu, va nga dayelwa ngu ditxhari, nguko va nga wusa kuthava ha mafuni, ka vo hanya.

²⁷Se kha va na mbi manwa ni tindena tile ta makhutu ti nga wiswa, atile ti nga relela diyivani ni matxhari a tona a yimbi, se matxhari awe ma vekilwe hahatshi ka misungo yawe, ni wubihi wawe wu txitimwi ka marambu awe, nguko i ti ti wudhukiseli wa tindena, mafuni ka vo hanya.

²⁸Nanawe Egipta, u na phatulelwa hagari ka makhutu, se u na otela ka vale va nga dayelwa ngu ditxhari.

²⁹Koneyo waho Edhomi, vafumeli vakwe ni vathangeli vakwe, avale hambiko va nga ti ni mtamo, va ti ya vekwa ni vale va nga dayelwa ngu ditxhari; avava, va otete ni makhutu, ni vale va nga relela diphalani.

³⁰Koneyo vaho votshe vathangeli va Wuphemba, ni votshe Vasidhoni, va nga relela ngu kudayelwa, va nga wiswa tingana ngu kudhukiselwa ko wuswa ngu mtamo wawe; se ve otela i di makhutu, kumweko ni vale va nga dayelwa ngu ditxhari, ve rwala tingana tawe, ni vale va nga relela diphalani.

³¹Faro a na va wona, a txi tsaka ni dotshe dibutho dakwe; ina, ene Faro apune, ni dotshe dibutho dakwe, va nga dayelwa ngu ditxhari, kuwomba MKOMA Txizimu.

³²Nguko nani ni vekile kudhusa kwangu ha mafuni ka vo hanya; ngu kumaha keto a na otela hagari ka makhutu, ni vale va nga dayelwa ngu ditxhari, ene Faro ni dotshe dibutho dakwe, kuwomba MKOMA Txizimu.