Read chopi Ezekhiyele 33 Bible Online

Ezekhiyele 33 - chopi bible

Ezekhiyele 33

¹Se di tile kwangu dipswi da MKOMA, di txi ta kha dona:

²Awe mwanana wa m'thu, womba-womba ka vanana va vathu vanu, u txi khawe kwawe: Ngako ni txi tisa ditxhari txitimwi ka mafu, se vathu va ditiko ve teka wamwamna wokari hagari kwawe, ve mmaha muwoneleli wawe;

³ngako a txi wona taku ditxhari data txitimwi ka mafu, e veta mpundu e txharihisa vathu;

⁴se ngako wule a pfako mpundu asi khatali, ditxhari di txi ta m'daya, mnoha wakwe wu na va txitimwi ka msungo wakwe.

⁵Nguko a pfite diguwa da mpundu asi khatali ngu tona; mnoha wakwe wu na va txitimwi kwakwe; aniko wule a khatalako, a na hulukisa wutomi wakwe.

⁶Kambe ngako muwoneleli a txi wona taku data ditxhari, asi veti mpundu, se vathu va si txharihiswi; ngako ditxhari di txi ta daya wokari hagari kwawe, m'thu wuwa a datwe ngu mhaka ya wubihi wakwe, aniko mnoha wakwe, ni na wu lava manzani ka muwoneleli.

⁷Awe koko mwanana wa m'thu, ni kumahile muwoneleli wa nyumba ya ka Israyeli; awe koko u na engisa dipswi da txisofuni kwangu, u na zivisa kwakwe wukhaloni kwangu.

⁸Ni txi khani ka m'bihi: Awe m'bihi, ngu ditshuri u na fa; se awe u si wombi kasi ku hambukisa m'bihi ka nzila yakwe, m'bihiyo a na fa ka wubihi wakwe, aniko mnoha wakwe, ni na wu lava manzani kwako.

⁹Se ngako awe u di wombile kasi ku hambukisa m'bihi ka nzila yakwe, ku a txi hunduluka ka yona, se ene asi hunduluki ka nzila yakwe, a na fa ka wubihi wakwe, aniko awe u hulukisile muhefemulo wako.

¹⁰Awe koko mwanana wa m'thu, womba ka nyumba ya ka Israyeli ku khawe: Anu ma womba mi txi khanu: Sihambunyeto sathu ni sionho sathu si txitimwi kwathu, athu hi na fela ka sona, sekoko hi na hanyisa kutxani kani?

¹¹Va gele, ani na hanya, kuwomba MKOMA Txizimu, kha ni tsakiswi ngu kufa ka m'bihi, aniko ngu ku m'bihi e hunduka ka nzila yakwe, e hanya; hundulukani, hundulukani ka tinzila tanu ta walo; nguko koko mi na fela txani, anu va nyumba ya ka Israyeli kani?

¹²Awe koko mwanana wa m'thu, womba ka vanana va va ka kwanu, u txi khawe: Kululama ka wo lulama, kha ku na mbi mmaha e huluka ka ditshiku da kuhoheta kwakwe; se m'bihi kha na mbi dawa ngu wubihi wakwe, ka ditshiku dile a hundulukako ka wubihi wakwe; hambi mlulami kha na mbi hanya ngu kululama ka ditshiku dile a no onha.

¹³Ngako ni txi womba ka mlulami ku khani, ngu ditshuri u na hanya, se ene ngu kuthemba kululama kwakwe a txi maha to biha, kha ku na mbi alakanywa ni txa tximwetxo txa wululamo wakwe, aniko wubihi wakwe, wule a wu mahako, a na fela ka wona.

¹⁴Ngako kambe ni txi khani ka muonhi: Ngu ditshuri u na fa; a txi hunduluka ka txionho txakwe e maha kululama,

¹⁵ngako m'bihiyo a txi tshumeta sile a nga ti vekisile, ni kudiha sile so piwa, e londeta sileleto sa kuhanya, asi mahi to biha, ngu ditshuri a na hanya, kha na mbi fa.

¹⁶Sotshe sionho sakwe sile a nga onha, kha si na mbi alakanywa; a mahile wululamo ni tinene, ngu ditshuri a na hanya.

¹⁷Hambi keto vanana va va ka kwanu va kha vona: Kha ya lulama nzila ya MKOMA; kambe nzila yawe vona, ngu yona yi nga mbi lulama.

¹⁸Ngako mlulami a txi huma ka wululamo wakwe, a txi maha to biha, a na fela ka tona.

¹⁹Se ngako m'bihi a txi hunduluka ka wubihi wakwe, a txi maha to lulama ni ta tinene, a na hanyiswa ngu tona eto.

²⁰Aniko anu mi khanu: Kha ya lulama nzila ya MKOMA; ni na lamula mmweyo ni mmweyo, madingano ni tinzila takwe, anu va nyumba ya ka Israyeli.

²¹ Se ku to maheka taku, ngu dilembe da wugumi ni mambidi, ka mtxima wa wugumi, ka ditshiku da mtxhanu da wukhumbi wathu, kutile wokari kwangu, a nga ti ti hulukile Jerusalema, a txi ta khene: Didhoropa di dayisilwe.

²²Wona, dianza da MKOMA di ti ti txitimwi kwangu ni minova, asi se ta awule a nga ti hulukile; di to tula txisofu txangu, kala a txi ta hoka kwangu ni mixo; se txisofu txangu txi to tuleka, kha na malala kambe.

²³Sekoko di tile kwangu dipswi da MKOMA, di txi ta kha dona:

²⁴Awe mwanana wa m'thu, ava va zumbako ka makhalo awa a siwula, va womba-womba va txi kha vona: “Abrahamu i ti ti ene ekha nyamne wa mafu awa; kambe athu hi vangi; hi ningilwe ditiko diya ku va thomba yathu.”

²⁵Va gele koko u txi khawe: MKOMA Txizimu a khene: Midya ni mnoha, se mi guleta maso mi wona sithombe sanu, kambe ma theketa mnoha! Ina mi na lumbwa ngu ditiko diya kani?

²⁶Anu mi ti thembisela ngu matxhari anu, mi mahetela ta manyala, se mmweyo ni mmweyo a navela msikati wa muakelani wakwe! Ina mi na lumbwa ngu ditiko diya kani?

²⁷U na va gela tiya: MKOMA Txizimu a ti khene: Na hanya ani, ati tiku avale va no maneka ka makhalo a siwula, va na wiswa ngu ditxhari, se wule a no maneka txitingani, ni na mningela ka sibanda, si txi m'dya, ni vale va no maneka ka makhalo o tsana, ni mu ka maphala, va na dawa ngu mitungu.

²⁸Se ni na maha ti taku ditiko di maha dirumbi, ni txixamaliso, kambe wu na hunguleka mtamo wa kutikulisa kwakwe; mimango ya ka Israyeli yi na maha marumbi do gwita, aha ko ni wammweyo kha na mbi pinda ngu ka yona.

²⁹Sekoko va na tiziva taku ani ngani MKOMA, mbimo yi ni no maha ditiko di va dirumbi ni txixamaliso, ngu mhaka ya otshe manyala ale va nga ma mahetela.

³⁰Se ngu kwako awe mwanana wa m'thu: Vanana va va ka kwanu, va womba-womba ngu ngawe va di masetani, ni sikenini ka tinyumba; va so womba-womba mmweyo ka mmwani, mmwani ka mwanawe, a txi khene: Ngani, na mi kombela, mi txi ta engisa taku, ngu dihi dipswi da kuta ngu ka MKOMA.

³¹Se vona vata kwako, nga tile vathu va tisako tona kwako, ve ta khalahatsha masoni kwako kufana ni vathu vangu, kambe ve engisa dipswi dako, aniko kha va mahi txilo; va tumeletela ngu sisofu sawe, kambe timbilu tawe ti londetela ta minavelo yawe.

³²Se wona taku, kwawe u fana ni ndando ya lirando, ndando ya wule a ku ni dipswi do pfisiseka, a tshambiselako di txi kugwesa; nguko wa mapfa mapswi ako, aniko kha ma thumi ta txilo.

³³Kambe aha ti nota tiya (wona taku ti nata), sekoko va na tiziva taku, hagari kwawe ku ti nga va ni mprofeti.