Read chopi Ezekhiyele 36 Bible Online

Ezekhiyele 36 - chopi bible

Ezekhiyele 36

¹Se awe mwanana wa m'thu, profeta ka mimango ya Israyeli u txi khawe: Anu mimango ya ka Israyeli, engisani dipswi da MKOMA.

²Ngu kumaha keto MKOMA Txizimu a khene: Eko mlala wanu a ku khene ngu nganu: Yowe! Yowe! Kala ka timbimo ta kwa mbi gwita, mi na va thomba yathu;

³Ngu kumaha keto, profeta u txi khawe: Ngako va nga mi xasela ni ku mi randela, kasi ku mi txi mahwa thomba ya matiko ale ma nga sala, ni ku mi ku sisofuni ka vo biha, va makuhu,

⁴ngu tona eto, engisani dipswi da MKOMA Txizimu anu mimango ya ka Israyeli: MKOMA Txizimu a khene ka mimango ni ka simangwana, ka minambo ni ka mikova, ka makhalo a marumbi ni ka txiwunda, ni ka madhoropa ale ma nga lekwa, o ñolwa, a txisekiso ka matiko ale ma nga sala madhawani kwawe.

⁵Ngu konaho, MKOMA Txizimu a khene: Ngu ditshuri kuhisekani ka kuhenya kwangu, ni wombawombile ni wukela matiko ale ma nga sala, ni ditiko da Edhomi. Vona va honyote mafu angu, ngu kutsaka ka totshe timbilu, ni kutxhipisa muhefemulo, kasi ku wu rinza kuñolwani.

⁶Ngu tona eto, profeta madingano ni ditiko da ka Israyeli, u womba ka mimango, ni ka simangwana, ni ka minambo ni ka mikova, u txi khawe: MKOMA Txizimu a khene: Wona taku ni wombile ngu kutiningetetela kuhenyani kwangu, nguko mi tekile sile mi nga honyola ka vamatiko.

⁷Ngu konaho, MKOMA Txizimu a khene: Ni guletile dianza, kasi ku vamatiko vale va nga mi randela, ve rwala tingana tawe vapune.

⁸Aniko anu mimango ya ka Israyeli, mi na humisa madhavi, mi txi ninga mihando ka vathu vangu va ka Israyeli; nguko va hafuhi ni kuwuya.

⁹Nguko wonani taku ani ni ni nanu; ni na mi rendekela, mi na dimwa mi txi phaywa.

¹⁰Ni na andisa vathu txitimwi kwanu, ka yotshe nyumba ya ka Israyeli, ina, ka yotshe ngu ditshuri; se madhoropani ku nava ni vo zumba, ni makhalo ale ma nga xaselwa ma na aketwa.

¹¹Aniko ni na andisa vathu ni sihari txitimwi kwanu; vona va na velekela ve anda; se ni na mi maha mi zumba nga kukhatani, ni txhukwata dihanyo danu kupinda kukhatani; mi na tiziva taku ani, ngani MKOMA.

¹²Ni na maha taku vathu vangu va ka Israyeli ve tsimbila-tsimbila txitimwi kwanu; vona va na kuteka, u na va thomba yawe, khu na mbiswa kambe u txi daya vanana vawe.

¹³MKOMA Txizimu a khene: Wonani, a ti va wombako ngu nganu: Awe u ditiko do heta vathu, kambe u ditiko do dayela vanana va vathu;

¹⁴ngu kumaha keto, khu na mbi ngadi u txi heta vathu, kambe khu na mbiswa u dayela vanana va vathu vako, kuwomba MKOMA Txizimu.

¹⁵Kambe ni na maha taku, ku si ngadi kupfala kambe kulwa ka vamatiko; se khu na mbi ngadi u teka sile u nga honyola ka mamwani matiko, hambi ku ngadi u txi dayela vanana va ditikoni kwako, kuwomba MKOMA Txizimu.

¹⁶Se di tile kwangu dipswi da MKOMA, di txi ta kha dona:

¹⁷Awe mwanana wa m'thu, mbimo yile va nyumba ya ka Israyeli va nga ti ti zumba ditikoni kwako, va di nyenyezisile ngu dihanyo dawe ni mithumo yawe; kufana ni wamsikati wu a ku ka mbimo yakwe yo zumba didhawa, edo i ti ti dihanyo dawe, masoni kwangu.

¹⁸Ni to tshakunuta koko kuhenya kwangu txitimwi kwawe, ngu mhaka ya mnoha wule va nga wu theketa txitimwi ka mafu, ni sithombe sawe va ngadi nyenyezisa ngu sona.

¹⁹Se ni to va hangalasa hagari ka matiko, va txi hangalaswa ka matiko; ni to va lamula madingano ni mahanyelo awe ni simaho sawe.

²⁰Kambe, va di hokile ka matiko ale va nga ya ka ona, va to nyenyezisa ditina dangu do sawuleka, nguko ku ti ti wombwa taku: Avava mbathu va MKOMA, se va humile ditikoni kwakwe.

²¹Aniko ani ni va tsetsile ngu mhaka ya ditina dangu do sawuleka, adile va nyumba ya ka Israyeli va nga ya di nyenyezisa, ka matiko ale va nga ya ka ona.

²²Womba koko ka nyumba ya ka Israyeli, u txi khawe: MKOMA Txizimu a khene; kha ni mahi tiya ngu mhaka yako, awe nyumba ya ka Israyeli, aniko ngu mhaka ya ditina dangu do sawuleka, adi u ngadi nyenyezisa hagari ka matiko ale u nga ya ka ona.

²³Kambe ani ni na sawulekisa ditina dangu da hombe, di nga nyenyeziswa hagari ka matiko, adi mi ngadi nyenyezisa hagari ka ona; se matiko ma na tiziva taku, ani ngani MKOMA, kuwomba MKOMA Txizimu, mbimo yile ni no sawulekiswa u txi ti wona.

²⁴Aniko ni na mi teka hagari ka matiko, ni txi mi sengeleta ngu ka otshe matiko, ni mi wuyisa ditikoni kwanu.

²⁵Sekoko ni na xwaya mati o sawuleka txitimwi kwanu, mi na sawulekiswa; ni na mi sawulekisa ka yotshe nzambwa yanu, ni ka sotshe sithombe sanu.

²⁶Se ni na mi ninga mbilu ya yiphya, kambe ni na thela moya wa wuphya mndani kwanu; ni na thavisa mbilu ya dirigwi ka nyama yanu, ni txi mi ninga mbilu ya nyama.

²⁷Kambe ni na thela moya wangu mndani kwanu, ni na maha ti to mi tsimbila ngu sileleto sangu, mi txi vekisa wululamo wangu, ni ku wu londeta.

²⁸Se mi na ya zumba ka mafu ale ni nga ninga vatate vanu, anu mi na va vathu vangu, ani ni na va Txizimu txanu.

²⁹Ni na mi txhatxhisa ka yotshe nzambwa; ni na tisa fulaho ni txi yi andisa, kambe kha ni na mbi tisa nzala txitimwi kwanu.

³⁰Ni na andisa mihando ya mindongani, ni siyalo sasiphya sa thembweni, kasi ku mi si swi kambe mi mana txiruko txa nzala hagari ka matiko.

³¹Sekoko mi na alakanya tinzila tanu to biha, ni simaho sanu si nga mbi va sa sinene; mi na ti laya ngu wubihi wanu, ni manyala a kona anu.

³²Kha ni mahi tiya ngu ku mi randa, kuwomba MKOMA Txizimu; ti woneni: Wanani tingana, ni kukanganyiswa ngu tinzila tanu, anu nyumba ya ka Israyeli.

³³MKOMA Txizimu a khene: Ka ditshiku dile ni no mi sawulekisa ka wotshe wubihi wanu, sekoko ni na maha taku mi txi zumba madhoropani, ku txi aketwa makhalo ale ma nga xaselwa.

³⁴Se mafu ale a txisapa ma na dimwa, ma si ngadi me wonwa i di txisapa, ngu votshe vapindi.

³⁵Se va na kha vona: Mafu awa a txisapa ma nonile nga thembwe ya Edheni; kambe ni na tsanisa madhoropa a txiwunda, a sisapa, o khundumuselwa, ma txi va ni vathu.

³⁶Sekoko matiko ale ma no sala ngu madhawani kwanu, ma na tiziva taku, ni wusile madhoropa o khundumuselwa, ni kuphaya mule ku nga ti xasetwe; ani MKOMA ni wombile, kambe ni na ti maha.

³⁷MKOMA Txizimu a khene: Kambe ngu mhaka ya tona eto, nyumba ya ka Israyeli yi na ni kombela, ati to ni txi yi mahela: Kuandisa vathu va yona, kufana ni mtxhambi.

³⁸Kufana ni mtxhambi wo sawulekiswa, nga mtxhambi wa Jerusalema amu ka mipipi yakwe, ngu tona eto ma no wonekisa tona madhoropa a siwula, ngu mimwaya; se va na tiziva taku, ani ni MKOMA.