Read chopi Ezekhiyele 37 Bible Online

Ezekhiyele 37 - chopi bible

Ezekhiyele 37

¹Di tile txitimwi kwangu dianza da MKOMA; se MKOMA a to ni teka ngu moya, a txi ya ni veka ka Mkova wo tala ngu marambu,

²a txi ni tsimbitisela madhawani ka marambu; i ti ti amangi ngutu mkovani mule, kambe ma ti ti omile ngutu.

³Se a txi ni gela ku khene: Awe mwanana wa m'thu, ina ma nga hanya marambu awa kani? Ani ni to khani: MKOMA Txizimu, awe wa tiziva.

⁴Sekoko a to khene kwangu: Profeta ka marambu awa, u txi ma gela tiya: Anu marambu a kuoma, engisani dipswi da MKOMA.

⁵MKOMA Txizimu a khene ka marambu awa: Wonani taku ni na wuleta moya kwanu, mi na hanya.

⁶Se ni na veketela misiha kwanu, ni na thungisa nyama txitimwi kwanu, ni fenengeta didhowo txitimwi kwanu, ni kuthela moya kwanu, mi na hanya, kambe mi na tiziva taku ani ngani MKOMA.

⁷Sekoko ni to profeta nga kule ni nga rumwa; se ku to pfala diguwa, mbimo yile ni nga ti ti profeta; marambu ma to goyana-goyana me patana, dimwedo ni dimwedo ka wukhalo wa dona.

⁸Se ni to wona taku ya humelela misiha ka ona, ku txi thunga nyama, se didhowo di txi fenengeta ngu txitimwi; aniko ku ti si nga ni moya mndani ka sona.

⁹Se MKOMA a to khene kwangu: Profeta ka moya, profeta awe mwanana wa m'thu, u txi khawe ka moya: MKOMA Txizimu a khene: Ngono ngu ka mune wa madhawa awe moya, u txi ta futeta txitmwi ka vava vofa, kasi kuva txi hanya.

¹⁰Se ni to profeta nga kule a nga ni ruma; sekoko moya wu to wulela ka sona, si hanya si khukha si txi ema, so tala ngutu ko pindisa.

¹¹Sekoko a to khene kwangu: Awe mwanana wa m'thu, marambu awa otshe, i nyumba ya ka Israyeli; wona taku va kha vona: Marambu athu ma omile, ni yona themba yathu yi lovile; athu hi witwe.

¹²Awe koko profeta u txi va gela tiya: MKOMA Txizimu a khene: Wonani taku ni na tula mathitha anu, ni txi mi humisa ngu mathithani kwanu, anu vathu vangu, se ni na mi tisa ditikoni ka Israyeli.

¹³Se mi na tiziva taku ani ngani MKOMA, mbimo yile ni no tula mathitha anu, ni txi mi humisa ngu mathithani kwanu, anu vathu vangu.

¹⁴Kambe ni na thela kwanu Moya wangu, mi na hanya, se ni na ya mi veka ditikoni kwanu, mi na tiziva taku ani MKOMA, ni wombile eto, kambe ni ti mahile, kuwomba MKOMA.

¹⁵Se di tile kwangu dipswi da MKOMA, di txi ta kha dona:

¹⁶Awe koko mwanana wa m'thu, teka txipulangwana, u bhala ka txona, u txi khawe: Ngu Judha ni vanana va ka Israyeli, ni vangana vakwe. Se teka tximwani txipulangwana u bhala ka txona, u txi khawe: Ngu Josefa ndonga ya Efrayime, ni yotshe nyumba ya ka Israyeli, ni vangana vakwe.

¹⁷Se u na si pata si maha tximwetxo dwe, manzani kwako.

¹⁸Aniko ngako va txi kuangula vanana va kakwanu, va txi kha vona: Ina khu na mbi hi gela txhamuselo ya tona tiya kani?

¹⁹Se awe u na khawe: MKOMA Txizimu a khene: Wonani taku ni na teka ndonga ya Josefa, ayile yi nga ti ti manzani ka Efrayime, ni tindonga ta tihunzu ta ka Israyeli, ni vangana vakwe, ni txi ti pata ka ndonga ya ka Judha, ni na maha ngu tona ndonga yimweyo, se tona ti nava ndonga yimweyo manzani kwangu.

²⁰Se sipulangwana sile u no va u di bhate ka sona, si nava manzani kwako, na va txi si wona.

²¹Va gele koko ku khawe: MKOMA Txizimu a khene: Wonani taku ni na teka vanana va ka Israyeli hagari ka matiko ale va nga ya ka ona, ni txi va sengeleta ngu ka otshe madhawa, ni txi va heleketa ditikoni kwawe.

²²Se ngu ka vona ni na maha mfumo wumwewo ha mafuni, mimangoni ka Israyeli, kambe mfumeli mmweyo a na fumela vona votshe; kha ku na mbi ngadi kambe i di mifumo yimbidi; kha va na mbiswa kambe ve abana ngu mifumo yimbidi ka masiku matako.

²³Kambe kha va na mbiswa kambe ve nyenyeziswa ngu sithombe sawe, hambi ngu manyala awe, ni sihambunyeto sawe; kambe ni na va txhatxhisa ka otshe makhalo ale va nga onha na va txi zumba ka ona, se ni na va sawulekisa.

²⁴Se txithumi txangu Dhavhidha a na fuma txitimwi kwawe, votshe va na va ni m'dyisi mmweyo; kambe va na tsimbila ngu wululamo wangu, ni kuvekisa sileleto sangu, va na si maha.

²⁵Va na zumba ka ditiko dile ni nga ninga txithumi txangu Jakobe, emo va nga ti zumbile kona vatate vanu; se va na zumba ka dona, vona ni vanana vawe, ni vatukulu vawe, yotshe mbimo; kambe txithumi txangu Dhavhidha a na va mthangeli wawe, ngu ha ku si gwitiko.

²⁶Ni na maha navo txitumelelano txa kuthutha; i nava txitumelelano txa kwa mbi gwita; ni na va tsanisa ni va andisa, ni veka nyumba yangu yo sawuleka hagari kwawe yotshe mbimo.

²⁷Kambe nyumba yangu yi na va hagari kwawe, ani ni na va Txizimu txawe, se vona i nava vathu vangu.

²⁸Se matiko ma na tiziva taku ani ngani MKOMA, ni sawulekisako Israyeli, mbimo yile nyumba yangu yo sawuleka yi no maneka hagari kwawe, yotshe mbimo.