Read chopi Ezekhiyele 38 Bible Online

Ezekhiyele 38 - chopi bible

Ezekhiyele 38

¹Di tile kambe kwangu dipswi da MKOMA, di txi ta kha dona:

² Awe mwanana wa m'thu, rendekelisa khohe yako ka Goge, ditiko da Magoge, mkoma ni mthangeli wa Meseki ni Tubhali, se profeta u txi mu wukela.

³I nda khawe: MKOMA Txizimu a khene: Wona taku na kuwukela awe Goge, mkoma ni mthangeli wa Meseki, ni Tubhali.

⁴Se ni na ku horolokisela, kambe ni na vekela simemba titshayani kwako, ni txi kuteka awe ni dotshe dibutho dako da yimbi, mahantxhi ni vagadhi va ona, votshe va di ambate sa yimbi, msengeletano wa hombe, na wu di ni sitxhavangu, votshe va na xoma matxhari;

⁵Vapersa, Vaetiyopiya, ni va niya Pute, votshe ni xithavangu ni sigoko;

⁶Gomeri ni otshe masotxhwa akwe; nyumba ya ka Togarima, ngu didhawa da Wuphemba, ni otshe masotxhwa a kona, u di ni vathu votala.

⁷Ti lulamisele, ina verela awe ni yotshe misengeletano yi yi nga tshangana kwako, se awe maha muwoneleli wawe.

⁸Msana ka masiku o tala u na endelwa; ma di gumile malembe u nata ka ditiko dile u nga khukhiswa ka dona ngu matxhari, di nga ta kwako ngu hagari ka vathu, di txi ta mimangoni ka Israyeli, ayile yotshe mbimo yi nga mahwa sisapa; aniko ditiko dile di thavisilwe hagari ka vathu, se votshe va na zumba ngu kutsana.

⁹Sekoko u na kwelela, u txi ta ni txihuhuri, u na nga direfu, kasi kufenengeta mafu, awe ni otshe masotxhwa ako, u di ni vathu votala.

¹⁰MKOMA Txizimu a khene: Se ku na maheka ka dona ditshiku dile taku, u nave ni kualakanyela mbiluni kwako, se u na ziva zumbelo yo biha.

¹¹Se u na khawe: Ni na wukela matiko ka miti yile yo mbi bhiyelwa, ni nata wukela vale va ku mu ko humula, vale va zumbako va di tsani; votshe va zumba va sa ti bhiyela, kambe kha va na matimba a hombe a tisimbi, hambi matimba;

¹²eto kasi ku na mana kuteka so handwa, ni kudaya mipfimba, ni kumaha ti to dianza dako di wukela matiko a siwula, ale konkuwa ma ku ni vo zumba, ni kuwukela vathu vale va nga sengeletana va hagari ka matiko, vale va ku ni sifuyo ni tithomba, kambe va zumbako hagari ka ditiko.

¹³Sabha ni Dhedhani, ni vanyamabhindu va Tarxixi, ni sotshe singonyamwana sawe, va na kha vona kwako: Awe u tela ku ta teka so handwa kani? U sengeletile sikelemu sako kasi ku ta daya mipfimba, ku ta teka silivhela ni nzalama, kasi ku ta teka sifuyo ni tithomba, ni ku ta xasela so handwa sasingi kani?

¹⁴Ngu tona eto, profeta awe mwanana wa m'thu, u txi khawe ka Goge: MKOMA Txizimu a khene: Ina khu na mbi tiziva ka dona ditshiku dile, mbimo yile vathu vangu va ka Israyeli, va no zumba ngu kutsana kani?

¹⁵U nata koko ngu ka wukhalo wako, ngu didhawa da Wuphemba, awe ni vathu vavangi, motshenu na mi di gadhile mahantxhi, mi di msengeletano wa hombe, ni dibutho da mtengo wa hombe.

¹⁶Se u na wukela vathu vangu va ka Israyeli, kufana ni direfu, di txi fenengeta ditiko; ngu magwito ka masiku, ku na maheka taku ni txi kutisa u ta wukela ditiko dangu, kasi ku matiko ma txi na ni ziva, mbimo yi ni no va ni di sawulekisile maso ako, awe Goge.

¹⁷MKOMA Txizimu a khene: Ina hi nga awe ni nga womba-womba ngu ngawe ka masiku a kale, ngu mthumo wa sithumi sangu, i ku vaprofeti va ka Israyeli, avale ka ona masiku ale, va nga profeta ka malembe o tala, ni nga khani ni na kutisa u ta lwa navo kani?

¹⁸Ku na maheka ka dona ditshiku dile: Ka ditshiku dile a nota ngu dona Goge kutalwa ni Israyeli, kuwomba MKOMA Txizimu, kuhenya kwangu ku na hoka tithonvuni kwangu.

¹⁹Nguko ku ti hita kwangu ku ni gete, amu ka mndilo wa kuhenya kwangu, taku ka dona ditshiku dile ku nava ni kudhudhumela ka hombe, txitimwi ka ditiko da ka Israyeli,

²⁰ngu kumaha keto, si na thava masoni kwangu, sihaka sa lineneni, ni sinyana sa nzumani, ni sihari sa txitinga, ni sotshe sile si kasako txitimwi ka mafu, ni votshe vathu va ku txitimwi ka mafu; se mimango yi na wa, ni mikova yi na fuva, ni otshe maguma ma na wa hahatshi.

²¹Nguko Goge ni na m'dhanela ditxhari, txitimwi ka yotshe mimango yangu, kuwomba MKOMA Txizimu; ditxhari da mmweyo ni mmweyo di na wukela mwanawe.

²²Se ni na mlwisa ngu mitungu ni kutheketa mnoha; ni na wisa mati a ndambi, ni marigwi a hombe a maralala, mndilo ni txivavula ni na si wisa txitimwi kwakwe, ni txitimwi ka masotxhwa akwe, ni ka votshe vathu votala va no maneka va di ni nene.

²³Ngu kumaha keto, ni na ti kulisa, ni txi ti sawulekisa, ni na ti zivanekisa masoni ka matiko amangi; se va na tiziva taku ani ngani MKOMA.