Read chopi Ezekhiyele 39 Bible Online

Ezekhiyele 39 - chopi bible

Ezekhiyele 39

¹Awe koko mwanana wa m'thu, profeta kambe u wukela Goge, u txi khawe: MKOMA Txizimu a khene: Wona taku, ani na kuwukela, awe Goge, mkoma ni mthangeli wa Meseki ni Tubhali.

²Se ni na ku horolokisela, ni txi kuvekela mtxhanu wa simemba ni tximwetxo, ni txi kukwelelisa ngu didhawa da Wuphemba, ni txi kutisa ka mimango ya ka Israyeli.

³Kambe ni na thavisa wulaho ka dianza dako da txibhabha, ni wisa tingove ti ku ka dianza dako da txinene.

⁴Awe ni dotshe dibutho dako da yimbi, mi na yawa mimangoni ka Israyeli, ni vathu va va ku ni nawe; u na dyiwa ngu makoti, ni sotshe sinyana si ku ni tibhapi, ni sihari sa txitinga.

⁵U na wa txitimwi ka mafu, nguko ni wombile, kuwomba MKOMA Txizimu.

⁶Se ni na rumela mndilo txitimwi ka Magoge, ni hagari ka vale va zumbako ko tsana sitondoloni; va na tiziva taku ani ngani MKOMA.

⁷Ni na zivekisa ditina dangu do sawuleka, hagari ka vathu vangu va Israyeli, kambe kha ni na mbiswa ni leka ditina dangu do sawuleka di txi nyenyeziswa; kambe matiko ma na tiziva taku, ani ngani MKOMA, wo Sawuleka kona Israyeli.

⁸Wona taku, tata, kambe ti na maheka, kuwomba MKOMA Txizimu: Adiya ngu dona ditshiku ni khalako ku di womba.

⁹Se vazumbi va madhoropa a ka Israyeli va na huma, va na hisa otshe matxhari ni sitxhavangu, ni malaho, ni tingove, ni tindonga ta manzani, ni miseve; va na turisa mndilo ngu sona, amu ka mtxhanu wa malembe ni mambidi.

¹⁰Kambe kha va na mbi tisa tikhuni ngu txitingani, hambi kuganga txipoponi, aniko va na turisa mndilo ngu matxhari; va na pa ka vale va nga va pela, ni kuhanda ka vale va nga va handa. Kuwomba MKOMA Txizimu.

¹¹Ku na maheka taku, ka ditshiku dile, Goge ni na mninga wukhalo kona Israyeli, wa kutshotshwa ka wona, i ku mkova wa vale va pindako wutxani ka linene; se va na xamala va le va no pinda ngu kwakwe; a na tshotshwa kona Goge ni dotshe dibutho dakwe, se va na kha vona Mkova wa Dibutho da Goge.

¹²Va nyumba ya ka Israyeli va na va tshotsha, mndani ka mtxhanu wa mitxima ni yimbidi, kasi kusawulekisa ditiko.

¹³Ina, votshe vathu va ditiko va na ya va tshotsha, kambe kwawe di na alakanywa ditshiku di ni no dhumiswa ngu dona, kuwomba MKOMA Txizimu.

¹⁴Kambe ku na sawulwa vathu vale va no tsimbila-tsimbila ditikoni ve tshotshela sirumbi sile si no va si di saletete, kasi ku di sawulekisa; ewo mthumo wu na heta mtxhanu wa mitxima ni yimbidi.

¹⁵Se avale va pindako ngu ditikoni va na di tshawunyeta, se awule a no wona dirambu dokari da m'thu, a na veka txikombiso hafuhi nado, kala va txi ta hoka vale va nota di tshotsha mikovani ka Dibutho da Goge.

¹⁶Se ni dona ditina da didhoropa i nava Hamona; di na sawulekisiswa eto ditiko.

¹⁷Awe koko, mwanana wa m'thu, MKOMA a khene: Gela sinyana sa totshe tixaka, ni sotshe sihari sa txitinga, u txi khawe: Patanani mi txi ta, mi txi ta ngu ka otshe madhawa, mi ta ka mphaxo wangu, ni phaxako ngu mhaka yanu, mphaxo wa hombe mimangoni ka Israyeli, mi txi dya nyama ni kusela mnoha.

¹⁸Mi na dya nyama ya vanyamitamo, ni kusela mnoha wa vathangeli va mafu, tinvuta, sinvutana, vamabhongwe, ni marole, sotshe sa kunona, kona Bhasani.

¹⁹Mi na dya mafura kala mi kolwa, ni kusela mnoha kala mi txi leva, mafura ni mnoha sa mphaxo wangu, ni no wu phaxa ngu mhaka yanu.

²⁰Ha mezani kwangu mi na khura, mahantxhi, sikotxikani, tindena, ni votshe vavamna va yimbi, kuwomba MKOMA Txizimu.

²¹Kambe ni na veka wudhundo wangu hagari ka matiko. Se otshe matiko ma na wona wulamuli wangu, awu ni nga wu maha, ni dianza dangu, na ni ti di sanzekile txitimwi kwawe.

²²Va nyumba ya ka Israyeli, va na tiziva taku ani ngani MKOMA, Txizimu txawe, kukhukhela ka ditshiku dile, ni kuya masoni.

²³Kambe matiko ma na tiziva taku va nyumba ya ka Israyeli, ngu mhaka ya wubihi wawe, va tsulisilwe wukhumbini, nguko va ni eyisile, se ni va sisete khohe yangu, ni va ningela manzani ka valala vawe, votshe va dayetwe ngu ditxhari.

²⁴Madingano ni wubihi wawe ni wuhambunyeti wawe, ni va thumisile, ni ku va sisela khohe yangu.

²⁵Ngu konaho, MKOMA Txizimu a khene: Kona kuwa, ni na tshumela ni wuyisa tikhumbi ta ka Jakobe. Kambe ni na mahela wumbilu yotshe nyumba ya ka Israyeli, ni na emela ditina dangu do sawuleka.

²⁶Se va na rwala tingana tawe, ni wotshe wueyisi wawe, awule va nga ni eyisa ngu wona, ngako va txi zumba va di tsani ditikoni kwawe, ku si maneki wa ku va dhukisa;

²⁷Ni txi na va ni di va tshumetile ve wuya ngu hagari ka vathu, ni kuva ni di va tshanganisile ngu ka matiko a valala vawe, ve maneka va ti sawulekisilwe masoni ka mamwani matiko.

²⁸Sekoko va na tiziva taku ani ngani MKOMA, Txizimu txawe, va txi wona taku ni va mahile ve yiswa wukhumbini hagari ka matiko, ni tshumela ni va sengeleta ve wuya ditikoni kwawe, ni si siyi ni wammweyo kwawe.

²⁹Kha ni na mbiswa ni va sisela kambe khohe yangu, mbimo yi ni no va ni di tshakunutile Moya wangu txitimwi ka nyumba ya ka Israyeli, kuwomba MKOMA Txizimu.