Read chopi Ezekhiyele 4 Bible Online

Ezekhiyele 4 - chopi bible

Ezekhiyele 4

¹Txizimu txi ti kha txona: Awe mwanana wa m'thu, teka txitini, u txi txi veka masoni kwako, u bhala ka txona didhoropa da Jerusalema.

²Bhala txikombiso txa kurandelwa ka dona ngu valala, u bhiya ngu diguma do tsana, veka so tshinga ngu sona, u veketela magovelo, ni so khundumusa ngu sona.

³Aniko, awe lava dipani da simbi, u txi di maha diguma hahanze, hagari kwako ni didhoropa, se u txi di rendekela; di na randeliswa eto, u na di randela; eto ti na maha txikombiso ka nyumba ya ka a Israyeli.

⁴Nanawe otela ngu didhawa da txibhabha, se u txi kombisa txionho txa nyumba ya ka Israyeli; madingano ni mtengo wa masiku ale u no otela, u na rwala wubihi wawe.

⁵Nguko ni vekile malembe a kuonha kwawe, o dingana ni 390 wa masiku; se u na rwala txionho txa nyumba ya ka Israyeli.

⁶Se u di mahile tiya, u na otela kambe ngu didhawa dako da txinene, u rwala txionho txa ka Judha, amu ka mune wa magumi a masiku; ni ku ningile ditshiku dimwedo ka dilembe ni dilembe.

⁷U na rendekelisa khohe yako koko ka diguma da Jerusalema, na u di nawulutile diwoko dako, se u na profeta u txi di kawuka.

⁸Kambe wona taku ni na kusunga ngu tingoti; kasi ku u si tshembereki u rendekela kheno ni kheno, kala kuza u txi heta masiku a kurandela kwako.

⁹Se awe teka fulaho, ni sevhadha, ni mahesa a wulombe, ni tinyemba, ni mahuva, ni mahila, u si thela mu ka txiya, u maha ngu sona dipawu; madingano ni mtengo wa masiku ale u no otela ngu didhawa, i ku 390 wa masiku, ngu soneso u no dya.

¹⁰Se sakudya si u no dya nzo dingana magumi mambidi a maxekele ngu ditshiku; u na dya ngu mbimo ni mbimo.

¹¹Kambe u na sela mati ngu kupimela, mabhikiri mambidi ngu ditshiku; u na sela ngu mbimo ni mbimo.

¹²Se asi u no dya, si na nga txibhubhutela txa sevhadha, kambe u na si bhika ngu mitximba yi yi humako ngu ka m'thu, na va txi ti wona.

¹³Se MKOMA a to khene: Ngu toneto, vanana va ka Israyeli va na dya dipawu dawe da nzambwa, ka ni dihi ditiko di va no tshotshwa ka dona.

¹⁴Sekoko ani ni to khani: O! MKOMA Txizimu! Moya wangu kha wa bihiswa, nguko kha ni zivi ku nga dya txokari txa kufa, mwendo txo phatulelwa, kukhukhela wujahani kwangu kala kuwa, hambi nyama yo nyenyeza kha ya wulela mkanani kwangu.

¹⁵Se a to ni gela ku khene: Ngono, ni ku ningile mitximba ya tihomu ta vamakati, wukhaloni ka mitximba ya vathu; se u na maha dipawu dako ngu yona.

¹⁶Sekoko a to ni gela ku khene: Awe mwanana wa m'thu, wona taku ni na pwatekisa dipawu Jerusalema, se va na dya dipawu da didotho ni manyenyo; ni mati va na sela ngu kupimela ni kukalala;

¹⁷kasi kuve pwatekelwa ngu dipawu ni mati, va txi xamalana mmwani ni mmwani, va txi hetwa ngu sionho sawe.