Read chopi Ezekhiyele 42 Bible Online

Ezekhiyele 42 - chopi bible

Ezekhiyele 42

¹Msana keto, a to ni humisa hahanze, niya ka wukhalo wa hahanze, ngu didhawa da nzila ya wulambwe; se e ni yisa ka tinyumba ti nga ti ti ngu masoni ka wukhalo wo mbi na txilo, ti nga txi maneka masoni ka nyumba, ngu didhawa da wulambwe.

²Txike txa wulambwe txi ti ni kulapha ka dizana wa mikono; se kuanama i ti ti ka mtxhanu wa magumi wa mikono.

³Ngu masoni ka magumi mambidi a mikono, ku nga ti ti ni m'hubhe wa mndani, ni masoni ka m'hubhe wa mtendela ku nga ti ti ni m'hubhe wa hahanze, ku ti ti ni wukhalo wo tshuriselwa wo rendekelana ni wumwani wukhalo wo tshuriselwa, wa sitezi siraru.

⁴Se ngu masoni ka tinyumba ku ti ti ni wukhalo wa digumi da mikono kuanama, ngu didhawa da mndani, ni nzila ya mkono wumwewo; se sike sa kona si ti ti rendekete didhawa da wulambwe.

⁵Tinyumba ta txitimwi i ti ti to patana ngutu; nguko ahawa, makhalo o tshuriselwa ma ti ti tekile wukhalo wa hombe ngutu, kupinda ale a hahatshi, ni ale a hagari ka nyumba.

⁶Nguko tona i ti ti ta sitezi siraru, kambe ti si nga ni tisika kufana ni tisika ta tigumbagumba; ngu mhaka yeto, kukhukhela hahatshi ti txo songa kupinda ta hahatshi ni ta hagari.

⁷Se diguma dile di nga ti ti ngu hahanze, ngu masoni ka tinyumba, ka nzila ya kuya ka ligumbagumba, masoni ka tinyumba di ti ti ni mtxhanu wa magumi wa mikono kulapha.

⁸Nguko kulapha ka tinyumba ti ti nga ti ti ka ligumbagumba la hahanze, i ti ti ka mtxhanu wa magumi wa mikono; se masoni ka dithepele ku ti ti ni dizana wa mikono .

⁹Ngu didhawa da hahatshi ka tinyumba tiya, ku ti ti ni txike ngu didhawa da wutxani, ngako u txi wulela ka tona ngu ligumbagumbani ka hahanze.

¹⁰A kheno ko anama ka diguma da ligumbagumba ka nzila ya wutxani, masoni ka wukhalo wa didhawa, ni masoni ka nyumba, ni kona ku ti ti ni tinyumba.

¹¹Se nzila ya masoni ka tona, i ti yo fana ni tinyumba, kambe yi ti rendekete ka nzila ya wutxani; madingano ni kulapha ka kona, ni kuanama ka kona i ti toneto; ni sike so huma ngu sona si ti fana ni so wulela ngu sona, madingano ni kufana ka ona, ni madingano ni sike so wulela ngu sona.

¹²Nga kule sike so wulela ngu sona tinyumbani, si nga ti ti rendekete nzila ya wulambwe, ku ti ti ho kambe txike txo wulela ngu txona ngu txitimwi ka nzila, ka nzila ya masoni ka diguma da txinene, ka nzila ya wutxani, ngako ku txi wulelwa ngu ka tona.

¹³Sekoko a to khene kwangu: Tinyumba ta wuphemba ni tinyumba ta wulambwe, ti manekako ka wukhalo wa didhawa da kusawuleka, ndinyumba to sawuleka, emo vaphaxeli va no dyela kona silo so sawuleka ngutu; va na veka kona eyo silo so sawuleka ngutu, ni miningelo ya kudyiwa, ni ya kudivalelwa ka sionho, ni ya kudivalelwa mnandu; nguko wukhalo mbwo sawuleka.

¹⁴Ngako vaphaxeli va txi wulela, kha va na mbi huma ka wukhalo wo sawuleka, va txi ya ka ligumbagumba la hahanze, aniko va na veka kona syambalo sawe sile va nga thuma ngu sona, nguko sona ngu sawuleka; se va ti ambeka simwani syambalo, va txi tshuketa ka wukhalo wu lumbako vathu.

¹⁵Se a di hetile kupimeletela mndani ka dithepele, a to ni humisa ngu nzila ya ditimba do rendekela nzila ya wutxani; se a to pima hahanze ka kona.

¹⁶A to pima didhawa da wutxani ngu litshava lo pima ngu lona: 500 wa tipimo a nga pima ngu litshava lo pima ngu lona.

¹⁷A to pima kambe didhawa da wulambwe: 500 wa tipimo ngu litshava lo pima ngu lona.

¹⁸A to pima kambe didhawa da wuphemba: 500 wa tipimo ngu litshava lo pima ngu lona.

¹⁹A to horoloka eya ka didhawa da wuphemba, eya pima 500 wa tipimo ngu litshava lo pima ngu lona.

²⁰A to pima otshe madhawa a mune; kambe ku ti ti ni diguma madhawani, da 500 wa tipimo kulapha, ni 500 kuanama, kasi kuabanisa so sawuleka ni so nyenyeza.