Read chopi Ezekhiyele 43 Bible Online

Ezekhiyele 43 - chopi bible

Ezekhiyele 43

¹Sekoko a to ni yisa ha txikeni, ka txike txo rendekela nzila ya wutxani.

²Kuphatima ka Txizimu txa ka Israyeli ku ti ti ta ngu nzila ya wutxani; se dipswi da txona di ti nga ova diguwa da mati amangi, se mafu ma to vangamela ngu mhaka ya kuphatima ka txona.

³Se zumbelo ya txiwoniso txi ni nga txi wona, i ti yofana ni txiwoniso txi ni nga ti txi woni mbimo yile ni ngata khundumusa didhoropa; kambe i ti siwoniso so nga txi ni nga txi wona hafuhi ni mnambo wa Kebhari; se ni to wa ngu khohe yangu.

⁴Se kuphatima ka MKOMA ku to wulela dithepeleni ngu nzila ya ditimba di nga ti rendekete wulambwe.

⁵Se Moya wu to ni gula wu txi ni yisa ka mtendela wa mndani; se kuphatima ka MKOMA ku to tata dithepele.

⁶Kambe ni to pfa dipswi di nga ni angula ngu mndani ka dithepele; se wamwamna wokari a to ta hafuhi ni nani,

⁷a txi ta khene kwangu: Awe mwanana wa m'thu, awuwa mbukhalo wangu wa wukoma, aho mikondo yangu yi kandako kona, ni na zumba kona hagari ka vanana va ka Israyeli kala kupinduka; kambe va nyumba ya ka Israyeli, kha va na mbi ngadi ve nyenyezisa ditina dangu do sawuleka, vona, hambi vafumeli vawe, ni wugelegele wawe, ni sirumbi sa vafumeli vawe, siluveloni kwawe.

⁸Na veka mitshunzuti yawe hafuhi ni mtshunzuti wangu, ni misasimo yawe, hafuhi ni msasimo wangu, na ku ti ni diseta hagari kwangu navo; se va nyenyezisile ditina dangu do sawuleka ngu manyala awe va nga ti ti ma maha; ngu mhaka yeto, ni va fuvisile kuhenyani kwangu.

⁹Kona kuwa, va na tshotshe kule ni nani, wugelegele wawe ni sirumbi sa vafumeli vawe, se ni na zumba hagari kwawe, ngu ha ku si gwitiko.

¹⁰Awe koko, mwanana wa m'thu, va nyumba ya ka Israyeli, va kombe nyumba yiya, kasi va txi wa tingana ta wubihi wawe; yi na va txikombiso kwawe.

¹¹Se mbimo yi va no xowoka ngu totshe ti va nga maha, va mahe ve ziva txiemo txa nyumba yiya, ni zumbelo ya yona, ni sike so huma ni so wulela ngu sona, ni otshe mazumbelo a sona, ni sotshe sileleto sa kona, ni ma zumbelo a sona, ni yotshe milayo ya kona; kambe bhala eto na va txi ti wona, kasi ku va na vekisa yotshe zumbelo ya kona ni sileleto sa kona, va txi si maha.

¹²Awuwa mlayo wa nyumba. Txitimwi ka mimango, kotshe madhawani ka yona ku nava ku di sawulekile ngutu; ngu wona wuwa mlayo wa nyumba.

¹³Tipimo ta txiluvelo ngu mikono ngu tiya (mkono wumwewo ni mune wa titiho); tshokani ka kona i nava ka mkono wumwewo kuguleka, ni mkono wumwewo kuanama, se msendo wa madhawani ka kona kotshe, ka lipimo la dianza; aha i hahatshi ka txiluvelo.

¹⁴Ngu mndani, kukhukhela ha ka mafu kala ka m'dhweva wa hahatshi, mikono yimbidi ni kuanama ka mkono wumwewo; se kukhukhela ka m'dhweva wa wudotho kala ka m'dhweva wa hombe, mune wa mikono, ni kuanama ka mkono wumwewo.

¹⁵Ni Txikho txa mune wa mikono; se kukhukhela ka txikho kala txitimwi, ku ti ti ni mune wa titxheho.

¹⁶Se Txikho txiya txi na va ni kulapha ka digumi da mikono ni yimbidi, ni digumi da mikono ni yimbidi kuanama, mune wa makhona madhawani ka txona.

¹⁷Se m'dhweva, wa digumi da mikono ni mune kulapha, ni digumi ni mune kuanama, ka madhawa a kona a mune; se ni likasa lo ranganyeta la hafu ya mkono; se sivango sa kona si ti rendekete wutxani.

¹⁸Se a to khene kwangu: Awe mwanana wa m'thu, MKOMA a khene: Asiya ngu sona sileleto sa txiluvelo, ditshiku di mi no txi maha, kasi kuningela txitimwi ka txona, miningelo yo hiswa, ni kuhangalasela ka txona mnoha.

¹⁹Se vaphaxeli va ka Levhi, i ku va liveleko la ka Zadhoki, va tshuketelako kwangu (kuwomba MKOMA Txizimu) ku ta ni thumela, u na va ninga dirole, kasi kukuwula sionho.

²⁰Kambe u na teka mnoha wa kona, u txi wu veka ka mune wa makhona, ni ka mune wa titshulu ta m'dhweva, ni ka likasa lo ranganyeta, u na mahisa eto kusawulekisa ni kudivalela sionho.

²¹Sekoko u na teka dirole da kudivalelwa ka txionho, di txi ya hiswa ka wukhalo wa nyumba yile ku no leletwa ka yona, hahanze ka nyumba yo sawuleka.

²²Se ka ditshiku da wumbidi, u na ningela mabhongwe mmweyo wa kwa mbi na txibawa, kasi kudivalelwa ka sionho; a na basisa txiluvelo, nga kule va nga txi sawulekisa ngu dirole.

²³Kambe u txi gwita kusawulekisa txiluvelo, u na ningela dirole da kwa mbi na txibawa, ni hamba ya mtxhambini, ya kwa mbi na txibawa.

²⁴U na si ningela masoni ka MKOMA; se vaphaxeli va theletela mnyu txitimwi ka sona, va txi si maha mningelo wo hiswa, ka MKOMA.

²⁵Mndani ka mtxhanu wa masiku ni mambidi, u na lulamisa mabhongwe mmweyo ditshiku ni ditshiku, kasi kudivalela sionho; kambe mi na lulamisa dirole, ni hamba ya mtxhambini, ya kwa mbi na txibawa.

²⁶Mndani ka mtxhanu wa masiku ni mambidi, mi na basisa txiluvelo, ni ku txi sawulekisa, ngu kumaha keto, va na va va di txi sawulekisile.

²⁷ Ngako va di xayisile masiku awa a mtxhanu ni mambidi, kukhukhela ka ditshiku da wutxhanu ni mararu kuya masoni, vaphaxeli va na lulamisela miningelo yanu yo hiswa, txitimwi ka txiluvelo, ni miphaxo yanu ya kudikha; se ani ni na tsakiswa ngu nganu, kuwomba MKOMA Txizimu.